ތަރިކައިގެ ލިސްޓްގައި ހިމެނޭ ހުކުރު މިސްކިތުގެ ހަރިންމަ ފާރުން ބައެއް ތަޅާލައިފި

ދުނިޔޭގެ ތަރިކައިގެ ވަގުތީ ލިސްޓްގައި ހިމެނޭ އަދި ތަރިކައިގެ ދާއިމީ ލިސްޓަށް ލާން މަސައްކަތް ކުރަމުން އަންނަ ހުކުރު މިސްކިތުގެ ހަރިންމަ ފާރުން ބައެއް ތަޅާލުމުން ހެރިޓޭޖް މިނިސްޓްރީން އެކަން ފުލުހުންނަށް ހުށަހަޅައިފި އެވެ.

އެ މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގު "މިހާރު" އަށް ވިދާޅުވީ ފުލުހުންނަށް މައްސަލަ ހުށަހެޅީ ފާރުން ބައެއް ތަޅާލައިގެން ކުރަން އުޅޭ މަސައްކަތް ހުއްޓުވަން ކަމަށެވެ.

ދެވަނަ ފަހަރަށް ބިނާކުރިތާ 300 އަށް ވުރެ ގިނަ އަހަރު ވީ ހުކުރު މިސްކިތުގެ ހަރިންމަ ފާރަކީ އެ މިސްކިތަށްވީހާ ދުވަހެއް ވެފައިވާ ފާރެއް ނޫނެވެ. ނަމަވެސް އެ މިސްކިތް ދުނިޔޭގެ ތަރިކައިގެ ވަގުތީ ލިސްޓަށް ލީ އިރު އެއީ ވެސް މިސްކިތުގެ ބައެކެވެ. އެހެންވެ، އެ ފާރަށް އެއްވެސް ބަދަލެއް ގެންނަ ނަމަ އެކަމުގެ ހުއްދަ ހެރިޓޭޖް ޑިޕާޓްމަންޓުން ނަގަން ޖެހެ އެވެ. ތޯރިގު ވިދާޅުވީ އެކަމާ ބެހޭ އެއްވެސް މައުލޫމާތެއް މިނިސްޓްރީއަށް ދީފައި ނުވާ ކަމަށެވެ.

"އަޅުގަނޑުމެންނަކަށް ނޭނގޭ އެއީ ކޮން ބަޔަކު ކުރި ކަމެއް ކަން ވެސް. ފާރުން ބައެއް ތަޅައިލި ކަން އަޅުގަނޑުމެންނަށް އެނގުމުން ދިޔަ އިރު އެ ތަނުގައި މަސައްކަތް ކުރަމަކުން ނުދޭ،" އޭނާ ވިދާޅުވި އެވެ.

ތޯރިގު ވަނީ އެކަން ކުށްވެރި ކުރައްވައި ޓްވީޓެއް ވެސް ކުރައްވައިފަ އެވެ.

ހުކުރު މިސްކިތުގެ ފާރުން ތަޅާލީ ކުރިން ޑިސްޓްރިބިއުޝަން ފޮއްޓެއް ހުރި ތަނެކެވެ. މިހާރު އެ ތަނުގައި ކޮށްފައި ހުރި މަސައްކަތަށް ބަލާއިރު ބެލެވެނީ ކުރިއަށް ވުރެން ބޮޑު ޑިސްޓްރިބިއުޝަން ފޮއްޓެއް ބަހައްޓަން ތައްޔާރުކޮށްފައި ހުރި ކަމެއް ހެންނެވެ.

ތަރިކައިގެ ލިސްޓަށް އަރަން ހުރަހަކަށް ވާނެ

ތޯރިގު ވިދާޅުވީ ހުކުރު މިސްކިތުގެ ފާރަށް އެފަދަ ގެއްލުމެެއް ވުމަކީ އެ މިސްކިތް ދުނިޔޭގެ ތަރިކައިގެ ދާއިމީ ލިސްޓުގައި ހިމަނަން ކުރާ މަސައްކަތަށް އެޅޭނެ ބޮޑު ހުރަހެއް ކަމަށެވެ. އެ ލިސްޓްގައި މިސްކިތް ހިމަނަން ކުރަން ޖެހޭ މަސައްކަތްތައް މިހާރު ވެސް ކުރިއަށް ދާ ކަމަށް އޭނާ ވިދާޅުވި އެވެ.

" ދާއިމީ ހެރިޓޭޖް ލިސްޓްގައި ހިމަނަން މިހާރު ވެސް އަޅުގަނޑުމެން މި އަންނަނީ މަސައްކަތް ކުރަމުން. އެ މަސައްކަތަށް ވަރަށް ބޮޑަށް ހުރަސް އެޅޭނެ މިކަމުން [ފާރުން ބައެއް ތަޅައިލުމުން]،" އޭނާ ވިދާޅުވި އެވެ.

ތޯރިގު ވިދާޅުވި ގޮތުގައި ދެން މަސައްކަތް ކުރާނީ ފާރުން ތަޅައިލި ބައި މަރާމާތުކޮށް ކުރިން ހުރިގޮތަށް ބަދަލުކުރާށެވެ.

"އެ ތަނުގައި ފޮއްޓެއް ހަދާ ނަމަ އަޅުގަނޑުމެން އެދޭނީ ފާރާ ވަކިން ބަހައްޓަން،" ތޯރިގް ވިދާޅުވި އެވެ.