ހުކުރު މިސްކިތް ވަށައިގެންވާ ބޮޑު ސަރަހައްދެއް ކަލްޗަރަލް ޒޯނަކަށް ބަދަލުކުރަނީ!

މާލޭގެ ހުކުރު މިސްކިތް ވަށައިގެންވާ ބޮޑު ސަރަހައްދެއް ބަފާ ޒޯނެއް ގޮތަށް، ކަލްޗަރަލް ޒޯނެއް ކަނޑައެޅުމަށް ރައީސް އިބްރާހިމް މުހައްމަދު ސޯލިހު މިއަދު ނިންމަވައިފި އެވެ.

ވަޒީރުންގެ މަޖިލީހަށް ހެރިޓޭޖު މިނިސްޓްރީން ހުށަހެޅި ކަރުދާހަކަށް ބިނާކޮށް، އެ ޒޯނުގައި ހިމަނަން ނިންމީ ހުކުރު މިސްކިތުގެ އިތުރުން މެދުޒިޔާރަތާއި ރައީސްގެ ރަސްމީ ގެކޮޅު މުލީއާގެ އާއި ދަރުމަވަންތަ ރަސްގެފާނު މިސްކިތާއި އުސްގެކޮޅާއި ކަޅުވަކަރު މިސްކިތާއި ސިފައިންގެ ހިންގާ ބަންޑާރަކޮށްޓާއި އިހުގެ ނާދީ އިމާރާތާއި ދާރުލް އުލޫމް އަދި ޖުމްހޫރީ މައިދާނެވެ.

ހެރިޓޭޖު މިނިސްޓްރީގެ ކަރުދާހުގައިވާ ގޮތުން، މިފަދަ ކަލްޗަރަލް ޒޯނެއް ހެދުމުގެ ބޭނުމަކީ ހުކުރު މިސްކިތަށް ދޭން ޖެހޭ ރައްކާތެރިކަން ދިނުމާއި އެ މިސްކިތް ދުނިޔޭގެ ތަރިކައިގެ ދާއިމީ ލިސްޓުގައި ހިމެނުމުގެ ފުރުސަތު ބޮޑު ކުރުމަށެވެ.

އެ ސަރަހައްދަށް ޒިޔާރަތްކުރާ މީހުންނާއި ޓޫރިސްޓުންނަށް ފަސޭހައިން މައުލޫމާތު ލިބި، ޓޫރިޒަމްގެ އާ ދޮރުތަކެއް އެ ނިންމުމުގެ ސަބަބުން ހުޅުވޭނެ ކަމަށް ވެސް ކަރުދާހުގައި ފާހަގަކޮށްފައި ވެ އެވެ.

"މާލޭގެ ދުވަސްވީ ތާރީހާއި އާސާރީ ބިނާތަކަށް ހިމާޔަތް ލިބޭ ގޮތަށް މި ސަރަހައްދުގައި ކަލްޗަރަލް ޒޯނެއް ކަނޑައެޅުމަކީ މުހިންމު ކަމެއްކަން ފާހަގަކޮށް، މިފަދަ ކަލްޗަރަލް ޒޯނެއް ތައާރަފު ކުރާއިރު މި ޒޯނުގެ ކަންކަން ހިނގާނެ ގަވާއިދާއި އުސޫލެއް އޮންނާނެކަން ވަޒީރުންގެ މަޖިލީހަށް މިކަމާ ބެހޭގޮތުން ހުށަހަޅާފައިވާ ކަރުދާހުގައި ފާހަގަކޮށްފައިވެ އެވެ،" ރައީސް އޮފީހުގެ ވެބްސައިޓްގައި ވެ އެވެ.