މާލޭގެ ޕްރީ ސްކޫލްތަކުގެ ކިޔެވުން ފެށުން 20 ވަނަ ދުވަހަށް ފަސްކޮށްފި

މާލޭގެ ޕްރީ ސްކޫލްތަކުގެ ދިރާސާ އާ އަހަރުގެ ކިޔެވުން ފެށުން މި މަހުގެ 20 ވަނަ ދުވަހަށް ފަސްކުރަން އެޑިއުކޭޝަން މިނިސްޓްރީން ނިންމައިފި އެވެ.

މާލޭގެ ސްކޫލްތަކަށް އެޑިއުކޭޝަންސް މިނިސްޓްރީން އިއްޔެ އެންގި އެންގުމުގައި ވަނީ ޕްރީ ސްކޫލްތަކުގެ ކިޔެވުން ފެށުން މި މަހުުގެ 20 ވަނަ ދުވަހަށް ފަސްކުރަން ނިންމީ ފައުންޑޭޝަން ސްޓޭޖްގެ މަންހަޖަށް ގެނައި ބަދަލާ ގުޅިގެން އެކަން ޓީޗަރުންނާ ހިއްސާކޮށް، އެ މަންހަޖު ތަންފީޒު ކުރުމަށް ބޭނުންވާ ތަމްރީނުތައް ދިނުމަށް ކަމަށެވެ.

އެހެންވެ، އަންނަ އާދިއްތަ ދުވަހުން ފެށިގެން މި މަހުގެ 17 ވަނަ ދުވަހުގެ ނިޔަލަށް މާލޭގެ ޕްރީ ސްކޫލްތަކުގެ ޓީޗަރުންނަށް ވޯކްޝޮޕެއް ބާއްވަން ނިންމާފައިވާ ކަމަށް އެ އެންގުމުގައިވެ އެވެ. އެހެންވެ ޕްރީ ސްކޫލްތަކުގެ ކިޔެވުން ފެށޭނީ މި މަހުގެ 20 ވަނަ ދުވަހު ކަމަށް އެ އެންގުމުގައިވެ އެވެ.

ޕްރީ ސްކޫލްތަކުގެ ކިޔެވުން ފަސް ކުރިއިރު، އެހެން ގްރޭޑްތަކުގެ ކިޔެވުން ކުރިއެކޭ ވެސް އެއްގޮތަށް އަންނަ އާދިއްތަ ދުވަހު ފެށޭނެ އެވެ.