ޖަލުތަކާ ބެހޭ ކޮމިޝަންގެ މަސައްކަތް އަވަހަށް ނިންމައިދޭން އިމްރާން އެދިވަޑައިގެންފި

ރާއްޖޭގެ ޖަލުތަކުގެ ހާލަތު ބެލުމަށް ހޯމް މިނިސްޓްރީން އެކުލަވާލާފައިވާ ކޮމިޝަންގެ މަސައްކަތް އަވަހަށް ނިންމުމަށް ހޯމް މިނިސްޓަރު އިމްރާން އަބްދުﷲ މިއަދު އެދިވަޑައިގެންފި އެވެ.

ޖަލުތަކުގެ ހާލަތު ބެލުމަށް ހޯމް މިނިސްޓްރީން އިއްޔެ ވަނީ ޖަލުތަކުގެ އޮޑިޓް ކޮމިޝަންގެ ނަމުގައި ކޮމިޝަނެއް އުފައްދައި، އެ ކޮމިޝަނަށް ހަތް މެމްބަރަކު އައްޔަންކޮށްފަ އެވެ.

އެ ކޮމިޝަންގެ ބައެއް މެމްބަރުންނާ މިއަދު ބައްދަލު ކުރައްވައި، އިމްރާން ވަނީ ކޮމިޝަނާ ހަވާލުވެފައިވާ މަސައްކަތަކީ މުޅި މުޖްތަމައުގެ މަސްލަހަތު ހިމެނޭ ކަމަކަށް ވާތީ ވަރަށް ފަރުވާތެރިކަމާ އެކު އަދި އަވަހަށް އެ މަސައްކަތް ނިންމައިދޭން އެދިވަޑައިގެންފަ އެވެ. އަދި އެ ކޮމިޝަންގެ މެމްބަރުންނަކީ ގާބިލްކަން ހުރި އަދި ތަޖްރިބާ ލިބިފައިވާ ބޭފުޅުން ކަމަށްވާތީ އެ ބޭފުޅުންނާ މެދު ފުރިހަމަ އިތުބާރު އެބައޮތް ކަމަށް ވެސް އެ ބައްދަލުވުމުގައި އިމްރާން ވިދާޅުވި އެވެ.

ޖަލުތަކާއި ޕްރޯލްގެ ގާނޫނުގެ ދަށުން ތިން ބާވަތެއްގެ ޖަލުތައް ރާއްޖޭގައި ހުރެ އެވެ. އެއީ ކަރެކްޝަނަލް ސާވިސް އިން ބަލަހައްޓަމުންދާ އާންމު ޖަލުތަކާއި ރިމާންޑް ޖަލުތަކުގެ އިތުރުން ފުލުހުންގެ ބެލުމުގެ ދަށުން މާލެ އާއި ރާއްޖޭގެ އެކި ރަށްރަށުގައި ހުންނަ ކަސްޓޯޑިއަލް ޖަލުތަކެވެ. ޖަލުތަކުގެ ހާލަތު ބަލައި، ޖަލުތަކުގެ ހާލަތު ބެލުމަކީ އާ ސަރުކާރުގެ ރިޔާސީ ވައުދެކެވެ.