ޖަލުގައި ދަން ޖެހުނު މީހާގެ ޕޯސްޓްމޯޓަމް ހަދަން ހަށިގަނޑު ފޮނުވައިފި

މާފުށީ ޖަލުގައި ބަންދުކޮށްފައި ހުއްޓާ ދަންޖެހިގެން މަރުވެފައި އޮއްވައި ފެނުނު މީހާގެ ހަށިގަނޑު ޕޯސްޓްމޯޓަމް ހަދަން އިންޑިއާއަށް އިއްޔެ ފޮނުވައިފި އެވެ.

އެއީ، އުމުރުން 15 އަހަރުގެ އަންހެންކުއްޖަކާ އެކު ގަދަކަމުން ބަދު އަހުލާގީ އަމަލު ހިންގި ކަމުގެ ތުހުމަތުގައި، ޝަރީއަތް ނިމެންދެން މިދިޔަ މާޗު މަހުން ފެށިގެން މާފުށީ ޖަލުގައި ބަންދުކޮށްފައި ހުރި މާލޭ ގ. އެއްތެޔޮމާގޭ، އަބްދުލްޣަނީ އިސްމާއިލް، 62 އެވެ. އޭނާ ދަންޖެހިގެން މަރުވެފައި އޮއްވައި ފެނުނީ މިދިޔަ ހަފުތާގެ އަންގާރަ ދުވަހު އެވެ.

ފުލުހުން މިއަދު ބުނީ ޕޯސްޓްމޯޓަން ހެދުމަށް އޭނާ ހަށިގަނޑު ރާއްޖެއިން ބޭރަށް އިއްޔެ ފޮނުވާފައިވާ ކަމަށެވެ.

ފުލުހުން ކުރިން ބުނި ގޮތުގައި، މާފުށީ ޖަލަށް ލާފައި ހުރި މީހަކު މަރުވި މައްސަލައެއް އަންނަނީ ތަހުގީގު ކުރަމުންނެވެ. އޭނާ މަރުވީ ދަންޖެހިގެން ކަން ހޯމް މިނިސްޓްރީން އޭރު ކަށަވަރު ކޮށްދިނެވެ. އެކަމަކު އިތުރު ތަފުސީލެއް ނުދެ އެވެ. އަދި އެ ގޮޅި ތެރޭގައި ކެމެރާ ހުންނަ ކަމެއް ނުވަތަ ނޫން ކަމެއް ވެސް ސާފެއް ނުވި އެވެ.

މަގުމަތިން އަންހެނަކާ ދިމާކޮށް އޭނާއާ އެކު، ޖިންސީ ގުޅުން ހިންގުމަށް އެދުނު މައްސަލައެއްގައި ވެސް ކުށް ސާބިތުވެގެން ޣަނީގެ މައްޗަށް ކުރިން ޖަލު ހުކުމެއް އައިސްފައިވެ އެވެ. އެ މައްސަލާގައި ތިން ދައުވާއެއް ސާބިތުވެ 2021 ވަނަ އަހަރު އޭނާގެ މައްޗަށް އިއްވީ އެއް މަހާއި 24 ދުވަހުގެ ޖަލު ހުކުމެކެވެ.

ޖަލުގައި މަރުވާ ގައިދީންނާއި އެކި ތުހުމަތުތަކުގައި ބަންދުކޮށްފައިވާ ތިއްބާ މަރުވާ މީހުންގެ ޕޯސްޓްމޯޓަމް ހެދުމަކީ ލާޒިމް ކަމެއް ކަމަށް ސަރުކާރުން ކަނޑައެޅީ މިދިޔަ ޖޫން މަހު އެވެ.

ސަރުކާރުން އެކަން ލާޒިމްކުރީ މާފުށި ޖަލުގައި ބަންދުކޮށްފައި ހުއްޓާ މިދިޔަ ޖޫން މަހު މަރުވި ށ. ފުނަދޫ، ޒަމާނީ ވިލާ، މުހައްމަދު ޖަމީލު މަރުވީ ޖަލުގެ އޮފިސަރުން އަނިޔާކޮށްގެން ކަމަށް ތުހުމަތުކުރުމުންނެވެ.

އެހެންވެ، އޭގެ ފަހުން ޖަލުގައި މަރުވާ ކޮންމެ މީހެއްގެ ޕޯސްޓް މޯޓަމް ހަދާނެ ކަމަށް، ހޯމްލޭންޑް މިނިސްޓްރީން ޖޫން މަހު ބޭއްވި ނިއުސް ކޮންފަރެންސެއްގައި މިނިސްޓަރު އަލީ އިހުސާން ވަނީ ވިދާޅުވެފަ އެވެ.