ޔުމްނާ އިސްތިއުފާ ދެއްވީ ކަޅުވަކަރު މިސްކިތް ރޫޅާލި މައްސަލާގައި

ހެރިޓޭޖް ޑިޕާޓްމެންޓާ ހަވާލުވެވަޑައިގެން ހުންނެވި އެޑިއުކޭޝަން މިނިސްޓަރުގެ ކުރީގެ ނައިބު ޔުމްނާ މައުމޫން މިދިޔަ އެޕްރީލް މަހު އެ މަގާމުން އިސްތިއުފާ ދެއްވީ މާލޭގައި ހުރި ތާރީހީ ކަޅުވަކަރު މިސްކިތް އެތަނުން ނެގި މައްސަލާގައި ކަމަށް އޭނާ މިއަދު ވިދާޅުވެއްޖެ އެވެ.

އިސްތިއުފާ ދެއްވިތާ ހަތަރު މަސް ފަހުން ޔުމްނާ ވަނީ، ކަޅުވަކަރު މިސްކިތް ރޫޅާލި މައްސަލާގައި ސަރުކާރަށް ފާޑުކިޔުން އަމާޒުކޮށް ޓުވީޓްތަކެއް ކުރައްވައިފަ އެވެ.

އޭނާ ވިދާޅުވީ ކަޅުވަކަރު މިސްކިތް ފަދަ ތާރީީހީ މިސްކިތެއް ރޫޅާލައިގެން ނެގުމަކީ ދެރަ ކަމެއް ކަމަށެވެ. ރޫޅާލައިގެން ނެގީ ދީނާއި ސަގާފަތާއި މަސައްކަތްތެރިކަމާއި އަމިއްލަވަންތަކަމުގެ ރަމްޒެއް ނޫންތޯ އޭނާ ސުވާލު އުފެއްދެވި އެވެ.

"200 އަހަރަށް ވުރެ ގިނަ ދުވަސްވެފައިވާ މާލޭ އާސާރީ މިސްކިތެއް އެހެން އަތޮޅަކަށް ގެންދިއުން ގަބޫލުކުރަން ދަތި،" ޔުމްނާ ވިދާޅުވި އެވެ. "އެކަމާ އަޅުގަނޑު ތާއީދުނުކުރާތީ އަޅުގަނޑު އިސްތިއުފާ ދިނީ."

އޭނާ ވިދާޅުވި ގޮތުގައި ދަރިންނަށް ދަސްކޮށްދޭންވީ ދިވެހިންގެ ތަރިކަ ހިމާޔަތްކުރުމަށެވެ.

ސަލްޓަންޕާކުގައި ހުރި އެ މިސްކިތް ފުރަތަމަ ބަދަލުކުރަން ވާހަކަ ދެއްކީ ހުޅުމާލެ އަށެވެ. އެކަމަކު ފަހުން ނިންމީ އެ މިސްކިތް ބަދަލުކުރާނީ ގދ. ތިނަދު އަށް ކަމަށެވެ. އެކަމަކު ތިނަދޫގައި އެ މިސްކިތް އަދި ނުބަހައްޓަ އެވެ.

މީގެ ކުރިން ވެސް އެ މިސްކިތް އެހެން ތަނަކަށް ބަދަލުކޮށްފައިވާ ކަން ފާހަގަކުރައްވައި ޔުމްނާ ވިދާޅުވީ އޭރު އެ މިސްކިތް އަލުން މާލެ އަށް ގެންނެނެވީ ބައްޕާފުޅު، ކުރީގެ ރައީސް މައުމޫން އަބްދުލް ގައްޔޫމް ކަމަށެވެ.

ކަޅުވަކަރު މިސްކިތް ބިނާކުރެއްވީ ރާއްޖޭގައި ރަސްކަން ކުރެއްވި ސުލްތޯން ހަސަން ނޫރައްދީން އެވެ. އެ މިސްކިތް ފުރަތަމަ ހުރީ ހިނާމާގޭ ޕާކިންއާ ޖެހިގެންނެވެ. ކުރީގެ ރައީސް އިބްރާހިމް ނާސިރުގެ ވެރިކަމުގައި ކަޅުވަކަރު މިސްކިތް މާލެ އިން ބޭރަށް ގެންދިޔަ އެވެ. އެކަމަކު މައުމޫންގެ ވެރިކަމުގައި އެ މިސްކިތް އަލުން މާލެ ގެނަ އެވެ. އެ މިސްކިތް މަރާމާތުކޮށް އަލުން ހުޅުވީ 2009 ވަނަ އަހަރު ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ.

އިސްތިއުފާ ދެއްވި ސަބަބު ޔުމްނާ ހާމަކުރެއްވިއިރު، ބައްޕާފުޅު، މައުމޫނާއި ބޮޑުބޭބޭފުޅު، ރައީސް އަބްދުﷲ ޔާމީނާ ދެމެދު ވަރަށް ބޮޑަށް ހިޔާލުތަފާތުވުންތައް އުފެދި ވެރިކަން ކުރާ ޕީޕީއެމް ވަނީ ރޫޅިފަ އެވެ. ޕާޓީގެ މައްސަލަތަކަށް އެތެރެ އިން ހައްލު ހޯދުމުގެ ބަދަލުގައި ރައީސް ޔާމީނަށް ތާއީދުކުރާ މީހުން ވަނީ މައްސަލަ ކޯޓަށް ވައްދައިފަ އެވެ.

މި މައްސަލަ ކުރިމަތިވެފައި ވަނިކޮށް ފޮރިން މިނިސްޓަރު ދުންޔާ މައުމޫން ވެސް ވަނީ އިސްތިއުފާ ދެއްވައިފަ އެވެ. އޭނާ އިސްތިއުފާ ދެއްވީ ރާއްޖޭގައި މަރުގެ ހުކުމް ތަންފީޒުކުރަން އުޅޭ ގޮތާ މެދު އުފެދުނު ހިޔާލުތަފާތުވުންތަކުގަ އެވެ. މި ދެ ބޭފުޅުންގެ އިތުރުން ދިއްގަރު ދާއިރާގެ މެމްބަރު ފާރިސް މައުމޫން ވެސް ގެންދަވަނީ ރައްޔިތުންނަށް ގެއްލުންވާ ގޮތަށް ސަރުކާރުން ހުށަހަޅާ ބައެއް ބިލްތަކާ ދެކޮޅަށް ވޯޓު ދެއްވަމުންނެވެ.