ވަގަކު "ފްރެންޑްސް" ގެ ތަރި ޑޭވިޑް ޝްވިމާއާ ވައްތަރުވުން ބޮޑު މަޖާގަނޑަކަށްވެއްޖެ

އިނގިރޭސިވިލާތުގެ ރެސްޓޯރަންޓަކުން ވައްކަންކުރި ކަމަށް ތުހުމަތުކުރެވޭ މީހަކު ހޯދަން ފޮޓޯ އާންމުކުރި އިރު އެއީ މަޝްހޫރު ޓީވީ ސިލްސިލާ "ފްރެންޑްސް" ގައި ރޮސް ގެލާގެ ރޯލް ކުޅުނު އެކްޓަރު ޑޭވިޑް ޝްވިމާއާ ވައްތަރު މީހަކަށް ވުމުން ބޮޑު މަޖާގަނޑަކަށްވެއްޖެ އެވެ.

ބްލެކްޕޫލް ޓައުންގެ ފުލުހުންގެ ފޭސްބުކް ޕޭޖްގައި އާންމުކޮށްފައިވާ ފޮޓޯއިން ފެންނަ މީހާ ހުންނަނީ ޝްވިމާގެ ހެއާ ސްޓައިލް އާންމުކޮށް ހުންނަ ގޮތަށް ސްޕައިކް ޖައްސައިފަ އެވެ. އަދި ކަޅު ކުލައިގެ ޖެކެޓަކާއި ނޫ ކުލައިގެ ޖީންސެއް ލައިގެން ހުރި މީހާގެ މޫނު ބައްޓަން ހުރި ގޮތުން ވެސް، 51 އަހަރުގެ އެކްޓަރާ ވަރަށް ވައްތަރެވެ. ފުލުހުން އާންމުކުރި ފޮޓޯގައި ފެންނަނީ ވައްކަން ކުރި ކަމަށް ބެލެވޭ މީހާ ބިޔަރު ދަޅު ކޭހެއް ހިފައިގެން ދަނިކޮށެވެ.

ޕޮލިހުން ބުނި ގޮތުގައި އޭނާ ހޯދަނީ ރެސްޓޯރަންޓަކުން ކަސްޓަމަރެއްގެ ޖެކެޓަކާއި ވޮލެޓާއި މޮބައިލް ފޯނެއް ނެގި މައްސަލައެއްގަ އެވެ.

އެކަމަކު އާންމުންނަށް މިކަން މަޖަލަކަށްވީ މާ ފަރިތަ، މަޝްހޫރު މޫނަކާ "ވަގުކަލޭ"ގެ ވައްތަރުވުމުންނެވެ. އެހެންވެ ސޯޝަލް މީޑިގައި ވަނީ އެކި ކަހަލަ ޖޯކްތައް ޖަހައިފަ އެވެ. އެއް ބަޔަކު ބުނެފައި ވަނީ މަޝްހޫރު މީހަކާ ވައްތަރުވުމަކީ ވެސް ލަނޑަކަށް ވެދާނެ ކަމަށެވެެ. އަދި އެއް ބަޔަކު ބުނެފައި ވަނީ ނުކުރާ ކުށަކަށް ޝްވިމާ މިހާރު "ބޭޒާރުވެފައިވާ" ކަމަށެވެ.

އެއީ ސީދާ ޝްވިމާ ކަމަށް ބުނެ ބައެއް މީހުން ކޮމެންޓްކޮށްފައިވާތީ އެއަށް ރައްދު ދެމުން ފުލުހުން ބުނީ އެއީ ޝްވިމާ ނޫން ކަމަށާއި މި ހާދިސާ ހިނގި އިރު އޭނާ ހުރީ އުފަން ގައުމު އެމެރިކާގައި ކަމަށެވެ.

"އާންމުން މިކަމަށް އެހާ އަވަހަށް މިކަމަށް ދިން އިޖާބަ އަށް ޝުކުރު އަދާކުރަން،" ފުލުހުން ބުންޏެވެ.