ވަގު ކަލޭގެ ފަހަތުން ދުވެ އަތުލައިގަތުމަށް ފަހު ދިނީ ކޮފީއެއް

ވަގަކު އަތުލައިގަނެވިއްޖެ ނަމަ އެ މީހަކަށް އަނިޔާކުރުން ނުވަތަ ލަދުގަންނަވާލުމަކީ އާންމުކޮށް ހިންގާ ކަންކަމެވެ. އެކަމަކު ކެނެޑާގައި މަގުމަތިން ދިޔަ މީހެއްގެ ވޮލެޓް ޖަހައިގަނެގެން ފިލަން ދުވި މީހަކު އަތުލައިގަތުމަށް ފަހު ކަންތައް ދިމާވީ އެހެން ގޮތަކަށެވެ.

މަގުމަތީ ސަލާންޖަހަން އުޅުނު މީހަކަށް ފައިސާ ދޭން އުޅުނު އަންހެނެއްގެ ވޮލެޓް ޖަހައިގަނެގެން ދުވި މީހާ އަތުލައިގަތުމަށް ފަހު އެ މީހާއަށް ދިނީ ކޮފީ އެވެ. އެ މީހާ އަތުލައިގަތީ މަގުމަތިން ދިޔަ އަންހެން ދުވުންތެރިއެކެވެ. މީޑިއާއާ ވާހަކަ ދައްކަމުން އޭނާ ބުނީ ފޭރުނު މީހާ އަތުޖެހުނީ ކުނި ޑަސްބިންތަކެއްގެ ބިއްދޮށަށް ވަދެ އިނދެގެން ރޮނިކޮށް ކަމަށެވެ.

"އެ މީހާ ބުނީ އެ ހިސާބަށް އައީ އެކުވެރިންތަކަކާއެކުގައި ކަމަށް. އެކަމަކު އޭނާ ދޫކޮށްލާފައި އެ މީހުން ދިއުމުން ފައިސާ ހުސްވެ، ހަދާނެ ގޮތް ހުސްވީ ކަމަށް. ފޭރުމަކީ ކުރަން ބޭނުންވި ކަމެއް ނޫން ކަމަށާއި މާފަށް އެދޭ ކަމަށް ވެސް ބުނި،" އަންހެން މީހާ ކިޔައިދީފައިވެ އެވެ.

ހެކީގެ ގޮތުގައި ބޭނުންކުރުމަށް، ފޭރުނު މީހާގެ ފޮޓޯއެއް ނެގުމަށް ފަހު އެ މީހާ ގެންދިޔައީ ޕަބްލިކް ލައިބްރަރީއަކަށެވެ. އަދި އެ މީހާއަށް ދިނީ ކޮފީއެކެވެ. އަދި ސޯޝަލް ވޯކަރުންނާ ހަވާލުކޮށް އެ މީހާއަށް އެހީތެރިކަން ލިބޭނެ ގޮތް ވެސް ހަމަޖައްސައިދިނެވެ. އެކަމަކު މައްސަލަ ފުލުހުންނަށް ވެސް ހުށަހެޅި އެވެ.