ފީފާ އިންތިހާބުގައި އެފްރިކާގެ ތާއީދު އިންފަންޓީނޯ އަށް

ގާހިރާ، މިސްރު (އޮކްޓޫބަރު 1) - އަންނަ އަހަރު އޮންނަ ފީފާ އިންތިހާބުގައި އެފްރިކާގެ ތާއީދު އޮތީ މިހާރު ވެސް ފީފާ ރައީސްގެ މަގާމުގައި ހުންނެވި ޖިއާނީ އިންފަންޓީނޯ އަށް ކަމަށް އެފްރިކަން ކޮންފެޑެރޭޝަން އޮފް ފުޓްބޯލް (ސީއޭއެފް)ގެ ރައީސް އަހުމަދު އަހުމަދު ވިދާޅުވެއްޖެ އެވެ.

އިންފަންޓީނޯ އަށް ތާއީދު އޮތް ކަމަށް އަހުމަދު ވިދާޅުވީ މިސްރުގައި ސީއޭއެފްގެ ހިންގާ ކޮމިޓީ އާއި އިންފަންޓީނޯ ބޭއްވި ބައްދަލުވުމެއްގެ ތެރެއިންނެވެ. އަހުމަދު ވިދާޅުވީ އެފްރިކާ އިން އެދެނީ ފުޓްބޯޅަ އަށް ފައިދާހުރި ބަދަލުތައް ގެންނަން އިންފަންޓީނޯ އަށް އިތުރު ފުރުސަތު ދިނުމަށް ކަމަށެވެ.

"އަހަރެން ދެކޭ ގޮތުގައި މިއީ އަހަރެންގެ ޒިންމާއެއް. އިންފަންޓީނޯ އަށް އެފްރިކާގެ ސަޕޯޓް އޮންނާނެ. ފީފާ އޮތީ ރަނގަޅު ޓްރެކުގައި އިންފަންޓީނޯ އަށް އިތުރު ފުރުސަތު ދޭން ޖެހޭ،" އަހުމަދު ވިދާޅުވި އެވެ.

ފީފާގެ ރައީސްގެ މަގާމުގައި އެންމެ ފަހުން ހުންނެވި ސެޕް ބްލެޓާގެ މައްޗަށް ވެސް ކޮރަޕްޝަނުގެ މައްސަލަތަކެއް ސާބިތުވެ އޭނާ ވަނީ ފުޓްބޯޅައިން ސަސްޕެންޑްކޮށްފަ އެވެ. ފީފާގެ ރައީސްގެ މަގާމަށް އިންފަންޓީނޯ އިންތިހާބުވެވަޑައިގަތީ ވެސް، ކޮރަޕްޝަނުގެ މައްސަލަތައް ބަލަން ފެށުމާ އެކު 2016 ވަނަ އަހަރު ބްލެޓާ އިސްތިއުފާ ދެއްވުމުން ބޭއްވި އިންތިހާބު ކާމިޔާބުކުރައްވައިގެންނެވެ.

އެފްރިކާގެ ތާއީދު އޮތްކަން އެނގިގެން ދިއުމަކީ ލިބުނު ވަރަށް ބޮޑު ހިތްހަމަ ޖެހުމެއް ކަމަށް އިންފަންޓީނޯ ވަނީ ވިދާޅުވެފަ އެވެ.

"މިއީ އަހަންނަށް ލިބުނު ހާއްސަ އުފަލެއް. ފުޓްބޯޅައިގައި އުޖާލާ މުސްތަގުބަލެއް އެބައޮތް އެފްރިކާގައި. އަހަންނަށް މި ބައްރުގެ ސަޕޯޓް އޮތުމުން ވަރަށް ހިތްހަމަ ޖެހިއްޖެ،" އިންފަންޓީނޯ ވިދާޅުވި އެވެ.

މިދިޔަ އަހަރު އޮތް ސީއޭއެފް އިންތިހާބު އަހުމަދަށް ކާމިޔާބު ކޮށްދިނުމަށް އިންފަންޓީނޯ ވަނީ އެހީތެރިކަން ފޯރުކޮށްދީފަ އެވެ. އޭގެ ސަބަބުން ފީފާގެ އެތިކްސް ކޮމިޓީން ވަނީ އިންފަންޓީނޯއާ ސުވާލުކޮށްފަ އެވެ. އިންފަންޓީނޯ އޭރު ވިދާޅުވީ އަހުމަދަކީ ފުޓްބޯޅައިގެ ކުރިމަގަށް ވަރަށް ބޮޑަށް ވިސްނާ މީހަކަށްވާތީ އޭނާ އަށް ހިތްވަރުދޭން ނިންމުމަކީ އިންތިހާބަށް ނުފޫޒު ފޯރުވުން ކަމަށް ނުބެލެވޭނެ ކަމަށެވެ.