ފުޓްބޯޅަ ކްލަބެއް ކުރިއަރުވަން 18 ކުޅުންތެރިޔަކު ވިއްކާލައި ބަކަރިތަކެއް ގަނެފި

ތުރުކީގެ ފުޓްބޯޅަ ކްލަބަކަށް ފައިސާގެ ދަތިކަން ބޮޑުވެ، ކްލަބު ކުރިއަރުވަން ދަތިވުމާ ގުޅިގެން، އިންވެސްޓްމަންޓެއްގެ ގޮތުގައި ޓީމުގެ 18 ކުޅުންތެރިޔަކު ވިއްކާލައި، ބަކަރިތަކެއް ގަނެފި އެވެ.

އެ ގައުމުގެ މީޑިއާތަކުން ރިޕޯޓްކޮށްފައިވާ ގޮތުގައި ބަކަރިތަކެއް ގަންނަން ވިއްކައިލީ ދެވަނަ ޑިވިޝަނުގެ ކުޑަ ކްލަބެއް ކަމަށްވާ ގަލްސްޕޯގެ ކުޅުންތެރިންތަކެކެވެ. އެ ކްލަބުގެ 18 ކުޅުންތެރިން، 10 ބަކަރި ގަންނަން ވިއްކައިލީ ގާތްގަނޑަކަށް ތުރުކީގެ 15،000 ލިރާ (2،600 ޑޮލަރު) އަށެވެ.

މިކަމާ ބެހޭ ގޮތުން ގަލްސްޕޯގެ ރައީސް ކެނާން ބުޔުކްލެބްލެބީ ބުނީ ކުޅުންތެރިން ވިއްކައިލަން މަޖުބޫރުވި އެއް ސަބަބަކީ ޓީމް ތަރައްގީކުރަން ސަރުކާރުގެ ކަމާ ބެހޭ މުއައްސަސާތަކުން ވެސް އެކަށީގެންވާ އެއްބާރުލުމެއް ނުލިބި، މާލީ ދަތިތަކާ ކުރިމަތިލާން ޖެހުމެވެ.

އޭނާ ބުނި ގޮތުގައި ކުޅުންތެރިން ވިއްކާލައި، ގަތް ބަކަރިތަކުން އަހަރެއްގެ މައްޗަށް 4،000-5،000 ލިރާގެ އާމްދަނީއެއް ކިރާއި ބަކަރި މަސް ވިއްކައިގެން ލިބޭނެ އެވެ. އަދި ކުރިއަށް އޮތް ދުވަސްތަކުގައި ބަކަރީގެ އަދަދު 140 އަށް އިތުރުކޮށްލެވޭނެ ކަމަށް ވެސް ބުންޏެވެ.

"ޓީމެއް ތަރައްގީ ކުރަންޏާ އެބަ ޖަހޭ ފައިސާ ވެސް ހުންނަން. އެކަމަކު މި ވަގުތަށް ފަންޑް ހޯދޭނެ އިތުރު އެއްވެސް ގޮތެއް ނެތީމަ ކުޅުންތެރިންތަކެއް ވިއްކާލައިގެން، ފައިސާ ހޯދައިގެން އަލުން ޒުވާން ޓީމެއް ބިނާ ކުރުން އަހަރެމެންގެ ޓާގެޓަކީ،" ކެނާން ސީއެންއެން އަށް ބުންޏެވެ.

ގަލްސްޕޯއަކީ 1954 ގައި އުފެއްދި ޓީމެކެވެ.