ސްޓޭޑިއަމަށް ވަނުން މަނާކުރުމުން މެޗު ބެލީ ކްރޭނެއްގައި އިނދެގެން

ފުޓްބޯޅައިގެ ފޯރީގައި ކޮންމެ ކަމެއް ވެސް ކޮށްފާނެ އެވެ. ތުރުކީގެ މި މީހާ އަކީ މީގެ ތެރެއިން ވެސް އަރާ ހުރި މީހެކެވެ.

ތުރުކީގެ ކްލަބެއް ކަމަށްވާ ޑެނިޒްލިސްޕޯރްގެ ސަޕޯޓަރެއް ކަމަށްވާ އަލީ ޑެމިރްކާޔާ ސްޓޭޑިއަމަށް ވަނުން 12 މަސް ދުވަހަށް އޮތީ މަނާކޮށްފަ އެވެ. އަދި އޭނާ ސަޕޯޓްކުރާ ކްލަބް ކުޅޭ ކޮންމެ ދުވަހަކު ފުލުހުންގެ މަރުކަޒަކަށް ގޮސް، ސްޓޭޑިއަމަށް ނުދާކަން ބަޔާންކޮށް ސޮއިކުރަން ޖެހެ އެވެ. އެކަމަކު މިއީ ކޮން ކަމަކާ ގުޅިގެން އަލީ އަށް ދީފައިވާ އަދަބެއް ކަމަށް ނޭނގެ އެވެ.

އެކަމަކު އަލީގެ ލޯބިވާ ކްލަބް ރެލިގޭޝަނުން ސަލާމަތްވުމާ ގުޅިފައި އޮތް މެޗު ނުބަލާ އޭނާއަކަށް ކެތެއް ނުވި އެވެ. އެހެންވެ އޭނާ އެ މެޗު ބެލީ ކްރޭނެއް ކުއްޔަށް ހިފުމަށް ފަހު ސްޓޭޑިއަމް ބޭރުގައި ބާއްވައި ކްރޭނުގެ ދަނޑީގެ ކޮޅުގައި އިނދެގެންނެވެ.

"އެއީ ވަރަށް މުހިންމު މެޗެއް. އެ ދުވަހު ވެސް ޕޮލިހަށް ދާންޖެހޭ، ސްޓޭޑިއަމަށް ނުވަންނަކަމަށް ސޮއިކުރަން. އެކަމަކު އެ ދުވަހު ޕޮލިހުން ނިކުމެފައި ދެން ކުރި ކަމަކީ ކްރޭނެއް ކުއްޔަށް ހިފުން،" އަލީއާ ހަވާލާދީ މީޑިއާގައި ބުނެފައިވެ އެވެ.

ތުރުކީގެ މީޑިއާ ރިޕޯޓްތައް ބުނާ ގޮތުން މި މީހާ މެޗު ބަލަން ކްރޭނަށް ހަރަދުކުރަން ޖެހުނީ ގާތްގަނޑަށް 85 ޑޮލަރެވެ.

އަލީ ކްރޭނުގައި އިނދެ ކުޅުންތެރިންނަށް އަތުން އިޝާރާތްކޮށް ކްލަބަށް ސަޕޯޓްކުރަން ފެށުމުން ސްޓޭޑިއަމްގައި ތިބި މީހުންނަށް އެކަން މާ މަޖާ ކަމަކަށް ވެގެން އެ ދިމާލަށް ޝައުގުވެރިކަން ހުއްޓުނެވެ.

އެކަމަކު ދެރަ ކަމަކީ އެހާ މަސައްކަތުން ބެލި މެޗުން ބަލިވެ އަލީގެ ކްލަބް ރެލިގޭޓް ވުމެވެ.