ދަނޑުން ކުނި ހޮވައި ޖަޕާނާއި ސެނެގާލް ސަޕޯޓަރުން ނަމޫނާ ދައްކައިފި

މޯޑޯވާ (ޖޫން 20) - ވޯލްޑް ކަޕްގައި އިއްޔެ ކުޅުނު މެޗްތަކަށް ފަހު ޖަޕާނާއި ސެނެގާލް ގެ ސަޕޯޓަރުން އާދަޔާ ޚިލާފު ނަމޫނާއެއް ދައްކައިފި އެވެ.

މޯޑޯވިއާ އެރީނާގައި ކޮލަމްބިއާގެ މައްޗަށް 2-1 އިން ކުރި ހޯދި މެޗަށް ފަހު ޖަޕާނު ސަޕޯޓަރުން ވަނީ އެކީއެކައްޗަކަށް ގޮނޑުވެފައި އޮތް ސްޓޭޑިއަމްގައި އެމީހުން ތިބި ހިސާބު ކުޑަ ހިނދުކޮޅެއްގެ ތެރޭ ސާފުކޮށްލައިފަ އެވެ.

ދެ ގޮނޑިބަރި ދޭތެރޭގައި ސަފު ހަދައިލައިގެން ތިބެ، މެޗު ކުރިއަށް ދިޔައިރު ސަޕޯޓުކުރިހައި ފޯރީގައި، ކުނިއަޅާ ބޮޑެތި ކޮތަޅުތައް ހިފައިގެން ސަޕޯޓަރުން ހަރަކާތްތެރިވި މަންޒަރު ސޯޝަލް މީޑިއާގައި އާންމުވުމާއެކު ގިނަ ބައެއްގެ ތާރީފު އެކަމަށް ދަނީ އޮހެމުންނެވެ.

އެކަމާ ގުޅޭ ގޮތުން ވާހަކަ ދައްކަމުން ޖަޕާނު ޓީމުގެ ޚަބަރުތައް ކަވަރުކުރުމަށް ރަޝިއާ ގައި ހަރަކާތްތެރިވާ ނޫސްވެރިއަކު ބީބީސީއަށް ކިޔައިދިން ގޮތުގައި އިއްޔެ ފެނިގެން ދިޔައީ ހަމައެކަނި ފުޓުބޯޅަ އާއި ގުޅިފައިވާ އާދައެއް ނޫނެވެ. އެއީ ޒަމާނުއްސުރެ ޖަޕާނުގެ އާދަކާދައިގެ ތެރޭގައި ހިމެނޭކަމެއްކަމަށް އޭނާ ބުންޏެވެ.

ރޭ ފޯރިގަދަ ކުޅުމަކަށް ފަހު ޕޮލެންޑު 2-1 އިން ބަލިކުރި ސެނެގާލު ޓީމުގެ ސަޕޯޓަރުން ވެސް ވަނީ މެޗަށް ފަހު ސްޓޭޑިއަމް ސާފުކުރުމުގައި އެހީވެދީފަ އެވެ. ގިނަބަޔަކު ދަނޑުން ނުކުމެފައި ވަނީ ސަޕޯޓުކުރަން ވެއްދި ދިދަތަކާއި ފޮތިތަކާއި ކާބޯތަކެތި އަޅައިފައިވާ ދަޅާއި ފުޅި ފަދަ ހުރިހާ އެއްޗެއް ނަގައި އެމީހުނަށް ހާއްސަކޮށްފައި އޮތް ސަރަހައްދު އެކުގައި ސާފުކޮށް، ހަމައަކަށް އަޅުވައިލައިފަ އެވެ.

އެ މަންޒަރުތައް ސޯޝަލް މީޑިއާގައި ހިއްސާކޮށް ތައުރީފްކުރަމުންދާ ފަރާތްތަކުން ދަނީ އެހެން ޓީމުތަކުން ވެސް އެފަދަ ރީތި އާދަތައް ނަމޫނާއަކަށް ބަލަން ހިއްވަރު ދެމުންނެވެ.

މިދިޔަ މަހުގެ ސޯޅައިގައި ފެށުނު ދުނިޔޭގެ ފުޓުބޯޅައިގެ އެންމެ ބޮޑު އީދުގެ މަޖާ އެކި ކަންކޮޅުތަކުގައި ނަގަމުން ދާއިރު، ޖަޕާނާއި ސެނެގާލު ގެ ސަޕޯޓަރުން މި ވަނީ ފުޓުބޯޅައިގެ ހިތްގައިމުކަން ދަނޑުމަތިންނާއި ދަނޑުބޭރުން ވެސް ދައްކައިދީފަ އެވެ.