ޒަކާތު ފަންޑުގެ 73 ސްކޮލަޝިޕަށް ކުރިމަތިލާން ހުޅުވާލައިފި

ޒަކާތު ފަންޑުން ދޭން ހަމަޖައްސާފައިވާ 73 ސްކޮލަޝިޕަށް ކުރިމަތިލާން މިއަދު ހުޅުވާލައިފި އެވެ.

އެ ސްކޮލަޝިޕާ ބެހޭ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވީ އިސްލާމް ދީނާއި ރާއްޖެއަށް މުހިއްމު ދާއިރާތަކުން މަތީ ތައުލީމް ހާސިލްކުރަން ޖާގަ ދީފައިވާނެ ކަމަށެވެ. އެގޮތުން ދީނާ ގުޅުން ހުރި ދާއިރާތަކަށް 40 ޕަސެންޓް އަދި ރާއްޖެއަށް މުހިއްމު ދާއިރާތަކަށް ވަނީ ޒަކާތު ފަންޑު ސްކޮލަޝިޕްގެ 60 ޕަސެންޓް ހާއްސަކޮށްފަ އެވެ.

ޒިޔާދު ވިދާޅުވީ ކޮންމެ އަހަރަކު ވެސް ޒަކާތު ފަންޑުން ސްކޮލަޝިޕް ދޭނެ ކަމަށެވެ. އެގޮތުން ރާއްޖެއަށް މުހިއްމު ދާއިރާތަކުން ތައުލީމީ އަދި ފަންނީ މީހުން ތަމްރީނުކުރެވޭނެ ކަމަށް މިނިސްޓަރު ވިދާޅުވި އެވެ.

ޒަކާތު ފަންޑު ސްކޮލަޝިޕަށް ކުރިމަތިލުމުގެ އެންމެ ފަހުގެ ތާރީހު، މިނިސްޓްރީން ފަހުން އިއުލާނުކުރާނެ އެވެ.

ސްކޮލަޝިޕްތައް ދިނުމަށް ޒަކާތު ފަންޑުން ވަނީ 10 މިލިއަން ރުފިޔާ ހަމަޖައްސައިފަ އެވެ.

އެ ބައްދަލުވުމުގައި ވާހަކަދައްކަވަމުން އިސްލާމިކް މިނިސްޓްރީގެ ޑެޕިއުޓީ މިނިސްޓަރު އިބްރާހިމް އަހުމަދު ވިދާޅުވީ ޑިޕްލޮމާ އިން ފެށިގެން ޑިގްރީ ފެންވަރަށް ޒަކާތު ފަންޑު ސްކޮލަޝިޕްގައި ރާއްޖޭގައި ކިޔެވޭނެ ކަމަށެވެ. ރާއްޖޭން ބޭރުން ކިޔެވޭނީ މާސްޓާޒް ފެންވަރަށެވެ. އޭގެ އިތުރުން މިސްރުގައި ކިޔަވާ ދަރިވަރުންގެ ހަރަދުތައް ވެސް ޒަކާތު ސްކޮލަޝިޕްގައި ދޭނެ ކަމަށް އޭނާ ވިދާޅުވި އެވެ.

ޒަކާތު ސްކޮލަޝިޕުން ކިޔެވޭނީ އޭޝިޔާ ސަރަހައްދުގެ ގައުމުތަކުގެ އިތުރުން މިސްރުގެ އަޒްހަރު ޔުނިވާސިޓީންނެވެ.

އޭނާ ވިދާޅުވީ ރާއްޖޭގައި އަލަށް ފަށަން ހަމަޖައްސާފައިވަނީ ޑޮކްޓަރުކަން ކިޔެވުމަށް ވެސް ދެ ޖާގަ ހާއްސަކޮށްފައިވާ ކަމަށެވެ. އަދި އިންޓާންޝިޕް ހަދާ ކުދިންގެ ދެ ބައިކުޅަ އެއް ބަޔަށް ވެސް ސްކޮލަޝިޕް ދޭނެ ކަމަށް ވިދާޅުވި އެވެ.

އިބްރާހިމް އަހުމަދު ވިދާޅުވީ ސްކޮލަޝިޕަށް ކަނޑައަޅާފައިވާ ފައިސާއިން، އެ ދަރިވަރުން ކިޔަވާ މުއްދަތުގައި ބަރާބަރަށް ފައިސާ ދެއްކޭނެ ކަމަށެވެ.

"ސްކޮލަޝިޕުން ކިޔަވާ 73 ކުދިންނަށް، ކިޔަވާ މުއްދަތުގައި އެ ފައިސާ ބަރާބަރަށް ލިބެމުންދާނެ. މި ސްކޮލަޝިޕް އިއުލާންކުރަނީ، ކުރިއަށް އޮތް ތަނުގައި ވެސް އަހަރުން އަހަރަށް ކުރިއަށް ގެންދިއުމުގެ ނިޔަތުގައި،" އިބްރާހިމް އަހުމަދު ވިދާޅުވި އެވެ.