ނަރުހުންގެ އާ ޔުނީފޯމަށް ފާޑުކިއުން!

އައިޖީއެމްއެޗްގެ ނަރުހުންގެ އާ ޔުނީފޯމާ އެކު ސޯޝަލް މީޑިއާގައި ވަރަށް ބޮޑު ފާޑުކިއުމެއް އަމާޒުވެއްޖެ އެވެ.

އެއް ބައެއްގެ ސުވާލަކަށް ވީ "މިއީ ނަރުހުންގެ ޔުނީފޯމް އަސްލު ވެސް ހުންނަ ގޮތް ހެއްޔެވެ؟"

ނަރުހުންގެ ދުވަހާ ގުޅުވައިގެން އިއްޔެ ބޭނުން ކުރަން ފެށި އާ ޔުނީފޯމުގައި ހިމެނެނީ ގަދަ ފެހި ކުލައަކާއި ވިލު ނޫކުލަ އަދި ހުދުކުލަ އެވެ. ޔުނީފޯމުގެ ކުރިމައްޗާއި ފަހަތުގައި މާތަކެއް ޖަހާފައިވެ އެވެ.

ޔުނީފޯމް ރީތިވެގެން އެ ވާހަކަ ނުދައްކާއިރު ސޯޝަލް މީޑިއާގައި ފާޑުކީ ގިނަ މީހުން ބުނެފައިވަނީ ހޮސްޕިޓަލްގެ ނަރުހުން ލާ ޔުނީފޯމަކަށް ވުރެ ވައްތަރީ ސްޕާއެއްގެ މުވައްޒަފުންގެ ޔުނީފޯމަކާ ކަމަށެވެ. ގިނަ މީހުންނަށް ކަމުނުދަނީ ޔުނީފޯމްގައި ހިމެނޭ މާތަކެވެ. ބައެއް ނަރުހުން ވެސް އެކަމަށް އެއްބަސްވެ އެވެ.

މަޝްހޫރު ލަވަ ކިޔުންތެރިޔާ މުހައްމަދު މާޖިދު (މެޒޯ މޯޑް) އެ ޔުނީފޯމާ ގުޅިގެން ކޮށްފައިވާ ޓްވީޓުގައި ބުނެފައިވަނީ "އައިޖީއެމްއެޗް ދަ ސަނީ ސައިޑް އޮފް ސްޕާ" ތޯ ސުވާލުކޮށްފަ އެވެ.

ފަޒީ ނަމުގައި ކޮށްފައިވާ ޓްވީޓެއްގައި ބުނެފައިވާ ގޮތުގައި އެ ޔުނީފޯމުގެ ޑިޒައިން ވަރަށް ހަޑި އެވެ. ބުރުގާ އަޅާ ނަރުހުން، ޔުނީފޯމުގެ ބޭރުން ވަކިން އަތް ނިވާކުރާ ގޮތަށް އެތެރެއިން އެއްޗެއް ލާން ޖެހުމުން ޔުނީފޯމުގެ ރީތިކަން ގެއްލޭ ކަމަށް ވެސް އޭނާ ހިޔާލު ފާޅުކޮށްފައިވެ އެވެ.

ފެޝަން ޑިޒައިނަރެއް ކަމަށްވާ ނޫރާ ރަޝީދު ބުނީ ނަރުހުންގެ ޔުނީފޯމަކާ އާ ޔުނީފޯމް ވައްތަރު ނޫން ކަމަށެވެ. ބަލިމީހުންނަށް ފަރުވާދޭ ބަޔަކު ބޭނުންކުރާ ޔުނީފޯމް ހުންނަންވާނީ ބަލައިލަން ފަސޭހަ "ކްލިއާ" ގޮތަކަށް ކަމަށް ވެސް އޭނާ ބުންޏެވެ.

"މާތަކެއް ޖަހާފައި ހުރީމަ އެ ވައްތަރު ވަނީ ރިސޯޓަކަށް ޗުއްޓީއަކަށް ދާން ލާ ކަހަލަ ހެދުމަކާ. ހޮސްޕިޓަލެއްގައި ބޭނުންކުރާ ޔުނީފޯމަކާ އެ ޔުނީފޯމް ވައްތަރެއް ނޫން،" ނޫރާ ބުންޏެވެ.

ބެލެވޭ ގޮތުގައި އައިޖީއެމްއެޗުގެ އާ ޔުނީފޯމްގެ ޑިޒައިން ހަދާފައި ވަނީ އަލަށް އިމާރާތްކޮށް، ހުޅުވަން ތައްޔާރުވަމުން އަންނަ ދަރުމަވަންތަ ހޮސްޕިޓަލްގައި ބޭނުންކުރާ ބައެއް ޑިޒައިންތަކާ އެއްގޮތަށެވެ.

އާ ޔުނީފޯމުގެ ޑިޒައިންނާ ގުޅޭ ގޮތުން އައިޖީއެމްއެޗުން އެއްވެސް ވާހަކައެއް ނުދައްކަ އެވެ.

ދުނިޔޭގެ އެހެން ތަންތަނުގައި ވެސް ނަރުހުންގެ ޔުނީފޯމް ހުންނަނީ ޑިޒައިންތަކެއް ނެތި ވަރަށް ސާދާ ގޮތަކަށެވެ. އެކަމަކު ތަފާތު ކުލަތައް ބޭނުންކުރެ އެވެ.

އައިޖީއެމްއެޗުން ބުނި ގޮތުގައި އާ ޔުނީފޯމް ލައިގެން ނަރުހުން ހޮސްޕިޓަލުން ބޭރުގައި ނޫޅެވޭނެ އެވެ. އެހެންކަމުން ހުރިހާ ނަރުހުން ވެސް ޔުނީފޯމް ލާނީ ހޮސްޕިޓަލަށް ގޮސް އެތަނުގަ އެވެ.

އައިޖީއެމްއެޗްގެ މީޑިއާ އޮފިޝަލަކު ވިދާޅުވީ ހޮސްޕިޓަލަށް ގޮސް ޔުނީފޯމް ލުމާއި އަދި ޑިއުޓީ ނިންމާފައި ދާއިރު ބާލަން ޖެހޭ ގޮތަށް ބަދަލު ގެނައީ ސާފުތާހިރުކަން ރަނގަޅު ކުރުމަށް ކަމަށެވެ.

"ޔުނީފޯމާ އެކު ބޭރުގައި އުޅެފައި އައިސް ބަލިމީހުންނާ އެކު އުޅެންވީމަ އެހާ ކްލީން ނުވެދާނެ. އެހެންވެ ބަދަލު ގެނައީ،" އޭނާ ވިދާޅުވި އެވެ.

ރާއްޖޭގައި ނަރުހުން ކުރިންސުރެ ލަމުން އައީ ހުދު ކުލައިގެ ޔުނީފޯމެވެ އެކަމަކު ފަހުން މަޑު އެކި ކުލަތަކަށް ބަދަލުކުރަމުން އައިސްފައިވެ އެވެ. އެގޮތުން އައިޖީއެމްއެޗުން އިއްޔެއާ ހަމައަށް ބޭނުންކުރީ މަޑު ނޫކުލައިގެ ޔުނީފޯމެކެވެ.