އައިޖީއެމްއެޗުގެ ނަރުހުންނާ ގުޅުވައިގެން ދައްކާ ވާހަކަތައް ދޮގުކޮށްފި

އައިޖީއެމްއެޗުގެ ނަރުހުން އެކި ވޯޑުތަކަށް ބަދަލުކުރުވުމާ ގުޅިގެން ދައްކަމުންދާ ވާހަކަތައް އެ ހޮސްޕިޓަލުން ރޭ ދޮގުކޮށްފި އެވެ.

ސަރުކާރުގެ މައި ހޮސްޕިޓަލުގެ އީއާރުގައި މަސައްކަތްކުރާ ނަރުހުންތަކެއް ސޮއިކޮށް، ހޮސްޕިޓަލުގެ މެނޭޖުމެންޓަށް މީގެ ދުވަސްތަކެއް ކުރިން ވަނީ ސަލާމް ނުބުނެވޭ މައްސަލަަ އާއި ބަލިވެ އުޅެނިކޮށްް ވެސް މަސައްކަތަށް ނެރުމަށް މަޖުބޫރު ކުރުވުމާއި އިހުމާލުތަކެއްގެ މައްސަލަތަ ފެންމަތިކޮށް ޕެޓިޝަނެއް ހުށަހަޅައިފަ އެވެ.

އެހެންވެ، ޕެޓިޝަަނުގައި ސޮއިކުރި ނަރުހުންނަށް ދިން އަދަބެއްގެ ގޮތުން އެކި ޑިޕާޓްމަންޓްތަކަށް ބަދަލުކުރާ ކަމަށް އެ ނަރުހުންނާ ހަވާލާދީ ބައެއް މީޑިއާތަކުގައި ރިޕޯޓް ކޮށްފައި ވާތީ ހޮސްޕިޓަލުން ނެރުނު ބަޔާނެއްގައި ބުނީ ނަރުހުން އެކި ވޯޑްތަކަށް ބަދަލުކުރުމާއި ޕެޓިޝަނާ ގުޅުމެއް ނެތް ކަމަށެވެ.

"މި ދުވަސްވަރު ނަރުހުން އެކި ޑިޕާޓްމަންޓްތަކަށް ބަދަލުކުރުމަށް ނިންމާފައިވާ ނިންމުމަކީ އިމަޖެންސީ ޑިޕާޓްމަންޓުގައި މަސައްކަތްކުރާ ނަރުހުން ހުށަހަޅާފައިވާ ޕެޓިޝަނާ އެއްވެސް ގުޅުމެއް ހުރި ކަމެއް ނޫނެވެ،" ބަޔާނުގައި ވެ އެވެ.

އައިޖީއެމްއެޗުން ބުނިގޮތުގައި، ޕެޓިޝަނުގައި ސޮއިކުރި ނަރުހުންނަށް އެކި ފިޔަވަޅު އަޅައި އެކި ޑިޕާޓްމަންޓްތަކަށް ބަދަލުކުރަން ނިންމާފައިވާ ކަމަށް ބުނެ ބައެއް މީޑިއާތަކުން ފަތުރަމުންދަނީ އެއްވެސް އަސާސެއް ނެތް ދޮގު ވާހަކައެކެވެ.

އެ ޕެޓިޝަނާ ގުޅިގެން ދިވެހި ސިވިލް ސާވިސް ގަވާއިދުގައިވާ ފަދައިން އެ މައްސަލަ ތަހުގީގުކޮށް، ފުރިހަމަކުރަންޖެހޭ އިޖުރާއަތުތައް ފުރިހަމަ ކުރަމުން އަންނަ ކަމަށް ވެސް އައިޖީއެމްއެޗުން ބުނެ އެވެ.