އައިޖީއެމްއެޗް ނަރުހުންގެ ޔުނީފޯމް ބަދަލުކޮށްފި

އައިޖީއެމްއެޗްގެ ނަރުހުންގެ ޔުނީފޯމް މިއަދު ފެށިގެން ބަދަލުކޮށްފި އެވެ.

މިއަދު ފާހަގަކުރާ ބައިނަލްއަގުވާމީ ނަރުހުންގެ ދުވަހާ ގުޅުވައިގެން އަލަށް ބޭނުން ކުރަން ފަށާފައިވަނީ ވިލު ނޫކުލައަކަށްދާ ޔުނީފޯމެކެވެ. އެ ޔުނީފޯމުގައި ހުދު ކުލަ އާއި ވިލު ނޫކުލައިގެ މާތަކެއް ޖަހާފައިވެ އެވެ.

އައިޖީއެމްއެޗްގެ މީޑިއާ އޮފިޝަލް ވިދާޅުވީ އެ ޔުނީފޯމް ބޭނުންކުރާނީ އެހޮސްޕިޓަލް ތެރޭގައި އެކަނި ކަމަށެވެ. ކުރިއެކޭ އެއްގޮތަށް ދެން ޔުނީފޯމް ލައިގެން ނަރުހުން ބޭރަށް ނުދާނެ ކަމަށް އޭނާ ވިދާޅުވި އެވެ.

"އާދައިގެ ހެދުމުގައި ހޮސްޕިޓަލަށް އައިސް ނަރުހުންގެ ޔުނީފޯމަށް ބަދަލުކުރާނީ. އެޔުނީފޯމުގައި އުޅޭނީ ހޮސްޕިޓަލްގެ ތެރޭގައި،" މީޑިއާ އޮފިޝަލް ވިދާޅުވި އެވެ.

އޭނާ ވިދާޅުވީ އެބަދަލު ގެނައީ ނަރުހުންނަކީ ބަލި މީހުންނާ އެންމެ ގާތުން ހިދުމަތްދޭ މީހުން ކަމަށްވާއިރު ސާފު ތާހިރުކަން ރަނގަޅު ކުރުމަށް ކަމަށެވެ.

"ޔުނީފޯމާއެކު ބޭރުގައި އުޅެފައި އައިސް ބަލި މީހުންނާއެކު އުޅެންވީމަ އެހާ ކްލީން ނުވެދާނެ. އެހެންވެ ބަދަލު ގެނައީ،"

އެންމެ ކުރިން ނަރުހުން ހުދު ކުލައިގެ ޔުނީފޯމެއް ލަމުން އައިސް ފަހުން އައިޖީއެމްއެޗްއިން ވަނީ މަޑު ނޫކުލައިގެ ޔުނީފޯމަކަށް ބަދަލުކޮށްފައި އެވެ. މިއީ މިފަހުން ޔުނީފޯމް ބަދަލު ކުރި ދެވަނަ ފަހަރެވެ.