މަރަން ހުކުމްކުރިތާ 20 އަހަރު ފަހުން ސަލާމަތްވެއްޖެ

ކަރާޗީ (އެޕްރީލް 17) - އާއިލީ މެންބަރުންތަކެއް މަރާލުމުގެ ކުށުގައި 1998 ވަނަ އަހަރު މަރުގެ ހުކުމް އިއްވާފައިވާ ޕާކިސްތާނުގެ އަންހެނަކު 20 އަހަރު ފަހުން މިނިވަންވެއްޖެ އެވެ.

އަސްވާ ނަވާބުގެ މަންމަ އާއި ބައްޕަ އަދި ބޭބެއަކު 1998 ވަނަ އަހަރު މަރާލި އިރު އޭނާގެ އުމުރަކީ 16 އަހަރެވެ. ނަވާބު އާއި އޭނާގެ އޭރުގެ ލޯބިވެރިޔާ ފަރްހާން އަހުމަދު އަދި އިތުރު ދެ މީހަކު ވަނީ މަރުގެ ތުހުމަތުގައި ހައްޔަރުކޮށްފަ އެވެ. އާއިލާގެ މެންބަރުންތަކެއް މަރާލި ކަމަށް އޭރު ބެލެވިފައި ވަނީ ނަވާބުގެ ކައިވެންޏަށް އާއިލާ އިން ދެކޮޅު ހަދަމުން ދިއުމުންނެވެ.

އެ މައްސަލައިގެ އިސްތިއުނާފް ދިގު ދެމިގެން ދިޔަ މިންވަރުން ސުޕްރީމް ކޯޓާ ހަމައަށް އެ މައްސަލަ ގެންދެވޭވަރުވީ 2015 ވަނަ އަހަރު އެވެ. ސުޕްރީމް ކޯޓުން ވޭތުވެދިޔަ ތިން އަހަރު އެ މައްސަލަ ބެލުމަށް ފަހު ނިންމާފައި ވަނީ ނަވާބު އާއި ދެން ހައްޔަރުކުރި މީހުން ދޫކޮށްލުމަށެވެ.

ނަވާބުގެ ވަކީލަކަށް 1998 ވަނަ އަހަރުން ފެށިގެން މަސައްކަތް ކުރަމުން އައި ޖާވަދު ޗަތާރީ ބުނީ ނަވާބުގެ މައްޗަށް މަރުގެ ހުކުމް އިއްވޭވަރުގެ ހެއްކެއް ނެތް ކަމަށް ސުޕްރީމް ކޯޓުން ކަނޑައަޅާފައިވާ ކަމަށެވެ.