ކްރިކެޓް ގައުމީ ޓީމު ފުރަތަމަ ފަހަރަށް ދުނިޔޭގެ މައިދާނަށް

ރާއްޖޭގެ ކްރިކެޓުގެ ތާރީހުގައި މިހާތަނަށް ވާދަކުރާ އެންމެ މަތީ ފެންވަރުގެ މުބާރާތް ކަމަށްވާ ޓްވެންޓީ20 ކްރިކެޓް ވޯލްޑް ކަޕުގެ ޕްރިލިމިނަރީ ކޮލިފައިންގައި ކުޅެން ގައުމީ ކްރިކެޓް ޓީމު ތައްޔާރުވެއްޖެ އެވެ.

ވިހި އޯވަރުގެ ކްރިކެޓުގެ ދުނިޔޭގެ އެންމެ ބޮޑު މުބާރާތުގެ ޕްރީ ކޮލިފައިންގެ ވެސްޓް ޒޯން ކުވޭތުގައި އޮންނައިރު ވާދަކުރާނީ އެ ގައުމާއި ރާއްޖޭގެ އިތުރުން ބަހުރޭނާއި ގަތަރާއި ޔޫއޭއީ އަދި ސައޫދީ އަރަބިއާ އެވެ. ހަ ޓީމުގެ މެދުގައި ކުޅެ ފައިނަލަށް ހޮވޭ ދެ ޓީމަށް ކޮލިފައިންގެ އަނެއް ބުރުން ފުރުސަތު ލިބޭނެ އެވެ.

މިއީ އިންޓަނޭޝަނަލް ކްރިކެޓް ކައުންސިލް (އައިސީސީ) ގެ މުބާރާތެއްގައި ރާއްޖޭން ވާދަކުރާ ފުރަތަމަ ފަހަރެވެ. ރާއްޖޭން ވަނީ މީގެ ކުރިން އޭޝިއަން ކްރިކެޓް ކައުންސިލް (އޭސީސީ) ގެ މުބާރާތްތަކުގައި ވާދަކޮށް 2005، 2006 އަދި 2010 ވަނަ އަހަރު އިމާޖިން ނޭޝަންސް ކްރިކެޓް މުބާރާތް ކާމިޔާބުކޮށް ސަރަހައްދީ ލެވެލްގައި ރަނގަޅު ހިސާބަކަށް ގޮސްފަ އެވެ.

"އައިސީސީގެ މުބާރާތްތަކުން ފުރުސަތު ލިބުމަކީ ވަރަށް ބޮޑު ކުރިއެރުމެއް. މިއީ އަޅުގަނޑުމެން ކްރިކެޓް ބޯޑާ ހަވާލުވެ މި ދޮޅު އަހަރުގެ ތެރޭގައި ކުރެވުނު މަސައްކަތުގެ ނަތީޖާ. އެގޮތުން އޭސީސީ އާއި އައިސީސީގެ އޭޖީއެމްތަކާއި ކޮންފަރެންސްތަކުގައި މި ފުރުސަތު ހޯދަން ވަރަށް ބޮޑަށް މަސައްކަތްކުރިން،" ކްރިކެޓް ބޯޑުގެ ރައީސް އަދި ކުރީގެ ކުޅުންތެރިޔާ މުހައްމަދު އަފްލާހް (އަފޫ) ވިދާޅުވި އެވެ.

ކޮލިފައިންގައި ވާދަކުރުމަށްޓަކައި ގައުމީ ޓީމުން އަންނަނީ ކުރީގެ ކުޅުންތެރިޔާ ނީޝާމް ނާސިރުގެ ބެލުމުގެ ދަށުން ހަތަރު މަހެއްހާ ދުވަސް ކުރިން ފެށިގެން ފަރިތަކުރަމުންނެވެ. އަދި މުބާރާތަށް ދިއުމުގެ ކުރިން ކޮޅުނބުގައި މަޑުކޮށް އިތުރު ތަމްރީން ހަދާނެ އެވެ. ޓީމުގައި މި ފަހަރު ސްރީ ލަންކާގެ ކުރީގެ ކުޅުންތެރިޔާ އަދި ރާއްޖޭގެ ޑިވެލޮޕްމަންޓް ކޯޗު ނިލަންތަ ކޫރޭ ހިމެނޭނެ އެވެ. ބައިނަލްއަގްވާމީ ކްރިކެޓުގެ ގަވާއިދު ބުނާ ގޮތުގައި ބިދޭސީ ކުޅުންތެރިން ވަކި އުސޫލެއްގެ ތެރެއިން ޓީމެއްގައި ހިމެނިދާނެ އެވެ. ރާއްޖޭން މީގެ ކުރިން ވެސް އެ ފުރުސަތުގެ ބޭނުން ހިފި އެވެ.

"ނިލަންތަ ވަނީ ސްރީ ލަންކާގެ އެންމެ މަތީ ފެންވަރުގައި ކުޅެފައި. އޭނާގެ ތަޖުރިބާ އެބަހުރި އަނެއްކާ އޭނާ އަންނަނީ ޑިވެލޮޕްމަންޓް ކޯޗެއްގެ ގޮތުގައި ރާއްޖޭގައި މަސައްކަތްކުރަމުން. އެހެންވެ ބިދޭސީ ކުޅުންތެރިޔަކަށް މިވަގުތު ނެގެން އޮތީ އޭނާ ކަމަށްވުމުން ކޮމިޓީން ނިންމީ އޭނާ ހިމަނަން،" އަފޫ ވިދާޅުވި އެވެ.

ކޮލިފައިންގައި ރާއްޖެ ކުޅޭ ފުރަތަމަ މެޗުގައި މި މަހުގެ 20 ވަނަ ދުވަހު ކުވޭތާ ދެކޮޅަށް ކުޅުމަށް ފަހު ދެ ވަނަ މެޗުގައި 21 ވަނަ ދުވަހު ވާދަކުރާނީ ބަހުރޭނާ އެވެ. ތިން ވަނަ މެޗުގައި ބައްދަލުކުރާނީ ގަތަރާ އެވެ. އެ މެޗު އޮންނާނީ 23 ގަ އެވެ. ޖެހިގެން އަންނަ ދުވަހު އޮންނާނީ ޔޫއޭއީއާ ދެކޮޅަށް ކުޅޭ މެޗެވެ. އަދި ފަހު މެޗުގައި މި މަހު 26 ގައި ނުކުންނާނީ ސައުދީއާ ދެކޮޅަށެވެ.

"އަޅުގަނޑުމެން މީގެ ކުރިން ވާނީ ގަތަރާއި ސައުދީ ބަލިކޮށްފައި. އަދި ބަހުރޭނާއި ޔޫއޭއީއާ ދެކޮޅަށް ވެސް ކުޅެފައިވަނީ. ރާއްޖޭގެ ފެންވަރާއި ޕްރެކްޓިހުގައި ކުޅުންތެރިންގެ މޯޓިވޭޝަން ހުރި ލެވެލަށް ބަލާއިރު އަޅުގަނޑުމެންނަށް ރަނގަޅު ހިސާބަކަށް ދެވޭނެ،" އަފޫ ވިދާޅުވި އެވެ.

ޓީމުގައި މި ފަހަރު ވަރަށް ގިނަ ޒުވާން ކުޅުންތެރިން ހިމެނެ އެވެ. އެގޮތުން ކެޕްޓަނަކީ ވެސް ރާއްޖޭގައި މިވަގުތު ހުރި އެންމެ ހުނަރުވެރި އެއް ޒުވާން ކުޅުންތެރިޔާ ހަސަން އިބްރާހީމެވެ. އޭނާ ވަނީ މިދިޔަ ޑިސެމްބަރުން ފެށިގެން ދާދި ފަހަކާ ޖެހެންދެއް ދުނިޔޭގެ އެންމެ ބޮޑު އެއް ކްރިކެޓް ލީގު ކަމަށްވާ އޮސްޓްރޭލިއާގެ ބިގް ބޭޝްގައި ވާދަކުރާ މެލްބަން ރެނެގޭޑްސްއާ އެކު ތަމްރީން ހަދައިފަ އެވެ. އަދި އޮސްޓްރޭލިއާގެ ވިކްޓޯރިއާ ޕްރިމިއާ ލީގުގައި ކާލްޓަން ކްރިކެޓް ކްލަބަށް ވެސް ކުޅުނެވެ.