"ޑޮން 3" އާ ބެހޭ ވާހަކަތައް ފަރްހާން ދޮގުކޮށްފި

ޝާހްރުކް ހާން ނެގަޓިވް ރޯލެއް ކުޅޭ "ޑޮން" ފްރެންޗައިޒްގެ ތިން ވަނަ ބައި ބަލައިލާ ހިތުން ތިބި މީހުން ބައިވަރެވެ. އެ މީހުންނަށް އެންމެ ބޮޑު ހިތްހަމަޖެހުމެއް ލިބުނީ ބޮލީވުޑްގެ ޓްރޭޑް އެނަލިސްޓެއް ކަމަށްވާ ރަމޭޝް ބާލާ މި މަހުގެ ކުރީކޮޅު ކުރި ޓްވީޓަކުންނެވެ.

އޭނާ ބުނި ގޮތުގައި ފިލްމްގެ ސްކްރިޕްޓް މިހާރު ނިންމައި، އަންނަ އަހަރުގެ ތެރޭގައި ޝޫޓިން ފަށަން ވަނީ ނިންމައިފަ އެވެ. އަދި ފިލްމްގެ ބޮޑު ބައެއް ޝޫޓް ކުރާނީ ދުބާއީ އާއި އަބޫދާބީގައި ކަމަށް ބުނެފައިވެ އެވެ. އަދި ތިން ވަނަ ބައިން ޝާހްރުކާ އެކު ބަތަލާއެއްގެ ގޮތުގައި ފެންނާނީ، ޕްރިޔަންކާ ޗޯޕްޅާ ނޫން ކަމަށް ވެސް ރަމޭޝް ބުނެފައިވެ އެވެ.

މި ވާހަކަތަކާ އެކު މި ހަފުތާގައި "ޑޮން 3" އާ ބެހޭ ގޮތުން ތިލަވި ވާހަކަތަކުގެ ތެރޭގައި ފިލްމްގައި ފުލުހެއްގެ ރޯލުން ޑައިރެކްޓަރު ފަރްހާން އަހްތަރު ވެސް ފެންނާނެ ކަމަށާއި ފިލްމް 2020 ގައި ސިނަމާތަކަށް އަންނާނެ ކަމަށް ބުނެފައިވެ އެވެ.

އެ ވާހަކަތަކާ އެކު ފޭނުން ވަރަށް އުފަލުން ތިއްބައި، ފަރްހާން ކުރި ޓްވީޓެއްގައި ވަނީ "ޑޮން 3" އާ ބެހޭ ގޮތުން ދެކެވޭ ވާހަކަތައް ދޮގުކޮށްފަ އެވެ. އަދި ފިލްމާ ބެހޭ ގޮތުން ތެދު ނޫން މައުލޫމާތުތައް ނުފެތުރުމަށް އޭނާ އެދިފައިވެ އެވެ.

ފަރްހާންގެ އެ ޓްވީޓްގެ ބަސްމަގަށް ބަލާ އިރު، ކައިރި މުސްތަގުބަލެއްގައި "ޑޮން 3" ފެނުމުގެ ފުރުސަތެއް ނެތޭ ބުނެވި ދާނެ. އެކަމަކު އޭނާ ވަނީ ތިން ވަނަ ބައި ގެނެސް ދޭނެކަން ކުރިން ކަށަވަރުކޮށް ދީފަ އެވެ. "ޑޮން 2" އަށް ފަހު، ފަރްހާން މިހާތަނަށް އެއްވެސް ފިލްމެއް ޑައިރެކްޓެއް ނުކުރެ އެވެ. އޭގެ ފަހުން އޭނާ މުޅިން ވެސް ފެންނަނީ އެކްޓަރެއްގެ ގޮތުގައި ކެމެރާގެ ކުރިމަތިންނެވެ.

އަމީތާބް ބައްޗަން އާއި ޒީނަތު އަމަން 1978 ގައި ކުޅުނު ފިލްމް "ޑޮން" ގެ ރިމެކިންއެއްގެ ގޮތުގައި ޝާހްރުކާއި ޕްރިޔަންކާ ހިމަނައިގެން "ޑޮން" ގެނެސް ދިނީ 2006 ގަ އެވެ. އޭގެ ފަހުން ދެވަނަ ބައި ހަމަ އެ ދެ ތަރިންނާ އެކު ގެނެސް ދިނީ 2011 ގަ އެވެ.

ޝާހްރުކް ދެން އެންމެ އަވަހަށް ފެނިގެން ދާނީ މި އަހަރުގެ ޑިސެމްބަރު 21 ގައި ރިލީޒް ކުރާ "ޒީރޯ" އިންނެވެ.