ސުޕްރީމް ކޯޓުގެ ފަނޑިޔާރުން ރަހީނުކޮށްގެން ޖުޑީޝަރީ މިނިވަނެއް ނުވާނެ: ޝާހީން ހަމީދު

ސުޕްރީމް ކޯޓުގެ ފަނޑިޔާރުން ރަހީނުކޮށް، ކޯޓުތައް އަސްކަރީ ބާރުގެ ދަށަށް ގެންގޮސްގެން ޖުޑީޝަރީ މިނިވަން ނުވާނެ ކަމަށް ވިދާޅުވެ ޖުޑީޝަރީ އިސްލާހުކުރުމުގައި ހުރިހާ ވަކީލުން ގުޅިގެން މަސައްކަތް ކުރުމަށް، ގާނޫނީ ވަކީލް ޝާހީން ހަމީދު މިއަދު ގޮވައިލައްވައިފި އެވެ.

ޝާހީންގެ ލޯ ފާމް، ޕްރިމިއާ ޗެމްބާސްގެ ޓްވިޓާ އެކައުންޓުން، ޝާހީންގެ ނަމުގައި ކޮށްފައިވާ ޓްވީޓްގައި ބުނެފައި ވަނީ އޭނާ ހުންނެވީ ޖުޑީޝަރީ އިސްލާހުކޮށް ގާނޫނީ އިމުގެ ތެރެއަށް ރުޖޫއަކުރުމުގެ އަޒުމުގައި ކަމަށެވެ. އަދި މިކަމުގައި އެހެން ވަކީލުންގެ އެހީތެރިކަމާއި އެއްބާރުލުމަށް އެދިވަޑައިގެންފައިވެ އެވެ.

ރާއްޖޭގެ އެންމެ މަޝްހޫރު ގާނޫނީ ވަކީލުންގެ ތެރޭގައި ހިމެނިވަޑައިގަންނަވާ ޝާހީން މިހެން ވިދާޅުވެފައި މި ވަނީ، ސިޔާސީ ބޭފުޅުން ވެސް ހިމެނޭ ގޮތުން، ޖަލުގައި ތިބި ނުވަ މީހަކު މިނިވަންކުރުމަށް މި މަހުގެ 1 ވަނަ ދުވަހުގެ ރޭ ސުޕްރީމް ކޯޓުން ނެރުނު އަމުރަށް ފަހު އުއްތަމަ ފަނޑިޔާރާއި، ފަނޑިޔާރު އަލީ ހަމީދު ހައްޔަރުކޮށްފައި ވަނިކޮށެވެ. ކުއްލި ނުރައްކަލުގެ ހާލަތު އިއުލާނުކުރުމަށް ފަހު ދެ ފަނޑިޔާރުން ހައްޔަރުކޮށް، ދެން ތިއްބެވި ތިން ފަނޑިޔާރުން ވަނީ އެ ކޯޓުގެ އަމުރުން ބައެއް ބައިތައް ބާތިލްކޮށް އަދި ދެން ހުރި ބައިތަކަށް އަމަލުކުރުން ފަސްކުރުމަށް އަމުރު ނެރުއްވައިފަ އެވެ.

ޖުޑީޝަރީއާ މެދު ހުރި ކަންބޮޑުވުންތަކާ ބެހޭ ގޮތުން ގާނޫނީ ވަކީލުން މީގެ ކުރިން ޕެޓިޝަން ހަދައި އެކަމާ ގުޅޭ އެކި މަސައްކަތްތައް ކޮށްފައި ވިޔަސް އެ ކަންކަމުގައި ޝާހީންގެ ބައިވެރިވުން މީގެ ކުރިން ފެނިފައެއް ނުވެ އެވެ. ނަމަވެސް ޝާހީންގެ ކޮއްކޯފުޅު މައުމޫން ހަމީދު ގެންދަވަނީ ޖުޑީޝަރީއާ ގުޅުން ހުރި އެކި މައްސަލަތަކުގައި ވަރަށް ފާޅުކަން ބޮޑު ގޮތެއްގައި ފާޑު ވިދާޅުވަމުންނެވެ. ޝާހީނާއި މައުމޫނަކީ ވެސް ރައީސް އަބްދުﷲ ޔާމީނަށް ބޮޑުބޭބެ ވިދާޅުވާ ދެ ބޭފުޅުންނެވެ.

ކުއްލި ނުރައްކަލުގެ ހާލަތު އިއުލާނުކޮށް ހައްޔަރުކުރި މީހުންގެ ތެރޭގައި މި ބޭފުޅުންގެ ބޮޑުބޭބޭފުޅު ކުރީގެ ރައީސް މައުމޫން އަބްދުލްގައްޔޫމް ވެސް ހައްޔަރުކޮށްފައި ވާއިރު މައުމޫން ހަމީދު މަސައްކަތް ކުރައްވަނީ ރައީސް މައުމޫންގެ ވަކީލެއްގެ ގޮތުގަ އެވެ.