ޑިސްޓްރިބިއުޝަން ފޮއްޓެއްގައި ރޯކޮށްލި މައްސަލާގައި ދެ މީހަކު ހައްޔަރުކޮށްފި

މާލޭގައި ބަހައްޓާފައި ހުރި ޑިސްޓްރިބިއުޝަން ފޮއްޓެއްގައި ރޭ ފަތިހު ރޯކޮށްލި މައްސަލާގައި ދެ މީހަކު ހައްޔަރު ކޮށްފައިވާ ކަމަށް ފުލުހުން މިއަދު ބުނެފި އެވެ.

ފުލުހުންގެ މީޑިއާ އޮފިޝަލް ވިދާޅުވީ، އެ މައްސަލައިގެ ތުހުމަތަށް ދެ މީހަކު ހައްޔަރުކޮށް، އެކަން ތަހުގީގު ކުރަމުން އަންނަ ކަމަށެވެ. އެކަމާ ގުޅޭ އިތުރު ތަފްސީލެއް ނުދެއްވަ އެވެ.

ބާ އިންޖީނުގެ ކައިރީގައި ހުންނަ މި ޑިސްޓްރިބިއުޝަން ފޮށީގައި ރޭ ފަތިހު 4:30 ހާއިރު ރޯކޮށްލުމުން ހަތް އިމާރާތަކުން ކަރަންޓު ކެނޑިފައިވާ ކަމަށް ސްޓެލްކޯ އިން ބުނެ އެވެ. އަދި އެ ގެ ތަކަށް އަލުން ކަރަންޓު ދިނުމަށް ހަތަރު ގަޑިއެއްހާއިރު ނަގާނެ ކަމަށް އެ ކުންފުނިން ބުންޏެވެ.

"...މި ސަބްސްޓޭޝަން މަރާމާތު ކުރުމުގެ މަސައްކަތް ކުރަމުންދާ ވަގުތު ސްވިޗިން ކުރުމަށް ހަމަޖެހިފައި ވާތީ، އެކި ސަރަހައްދުތަކުން ކުޑަ ވަގުތު ކޮޅަކަށް ކަރަންޓުގެ ޚިދުމަތް މެދުކެނޑޭނެ ވާހަކަ ކަސްޓަމަރުންގެ މައުލޫމާތަށްޓަކައި ދެންނެވީމެވެ،" ސްޓެލްކޯގެ ދަންނަވާލުމުގައި ވެ އެވެ.

އެމްއެންޑީއެފުން ބުނީ، ފާށަނާކިލެގެފާނު މަގުގައި ހުންނަ ސްޓެލްކޯގެ އިލެކްޓްރިކް ސަބް ސްޓޭޝަންގެ ޑިސްޓްރިބިއުޝަން ފޮށީގައި ބަޔަކު ގަސްދުގައި ރޯކޮށްލާފައިކަން މިހާތަނަށް ބެލިބެލުމުން އެނގޭ ކަމަށެވެ.

ޑިސްޓްރިބިއުޝަން ބޮކްސްގައި ރޯވި އަލިފާންގަނޑު ފަތިހު 4:40 ހާއިރު އެމްއެންޑީއެފް ފަޔާ ސާވިސް އިން ނިއްވާލާފައިވާއިރު، އެ ބޮކްސް ވަނީ ބޭނުން ނުކުރެވޭވަރަށް އަނދާފައި ކަމަށް އެމްއެންޑީއެފުން ބުނެ އެވެ.

"މި ހާދިސާގައި އަނދާފައި ވަނީ މާލޭގެ ހަތް ޒޯނަކަށް ކަރަންޓް ދޭ ޑިސްޓްރިބިއުޝަން ފޮއްޓެއް ކަމަށް ސްޓެލްކޯ އިން މައުލޫމާތު ދީފައި ވެ އެވެ،" އެމްއެންޑީއެފުން ބުންޏެވެ.