ވާދީ ޓްރޭޑާސް އިން ވިނަމިލްކް ވިއްކަން ފަށައިފި

ވިއެޓްނާމްގައި ކިރު އުފައްދާ އެންމެ ވަރުގަދަ ކުންފުނިތަކުގެ ތެރޭގައި ހިމެނޭ ވިނަމިލްކުގެ އުފެއްދުންތައް، ވާދީ ޓްރޭޑާސް އިން ރާއްޖޭގައި ވިއްކަން ފަށައިފި އެވެ.

އެ ފިހާރަ އިން ރާއްޖޭގައި ވިއްކަން ފެށީ ވިނަމިލްކުގެ 110 އެމްއެލް އާއި 180 އެމްއެލްގެ ސްޓްރޯބެރީ އަދި ޗޮކްލެޓް ފްލޭވާގެ ޕެކެޓެވެ. އަދި ވިނަމިލްކް ފްރެޝް އެއް ލީޓަރުގެ ޕެކެޓު ވެސް ވިއްކަ އެވެ. ވިނަ މިލްކުގެ އިތުރުން އެ ބްރޭންޑްގެ ޔޯގަޓް ވެސް ވާދީން އަންނަނީ ވިއްކަމުންނެވެ.

ރާއްޖެ އަށް ވިނަ މިލްކު ތައާރަފް ކުރުމަށް ވާދީ ޓްރޭޑާސް އިން ވަނީ ހޮޓެލް ޖެން ގައި، މިދިޔަ މަހުގެ 27 ވަނަ ދުވަހު ބޮޑު ރަސްމިއްޔާތެއް ވެސް ބާއްވާފަ އެވެ. އެ ރަސްމިއްޔާތުގައި ވިނަމިލްކުގެ އޮފިޝަލު ވިދާޅުވީ، ކުރިއަށް އޮތް ތަނުގައި އެ ކުންފުނީގެ އިތުރު އުފެއްދުންތައް ވެސް ރާއްޖެ އަށް ތައާރަފް ކުރަން ހަމަޖެހިފައިވާ ކަމަށެވެ.

ގިނަ ބާވަތްތަކުގެ މުދާ، ފުޅާ ދާއިރާއެއްގައި ވިއްކަމުން އަންނަ ވާދީ ޓްރޭޑަސްގެ ޖެނެރަލް މޭނެޖަރު ހުސެއިން ސޯލިހް ވިދާޅުވީ، ވިނަމިލްކު ތައާރަފުކުރަން ނިންމީ މިއީ ކޮލެޓީ ރަނގަޅު އަދި ހެޔޮ އަގުގައި ވިއްކޭނެ ޕްރޮޑަކްޓަކަށް ވުމުން ކަމަށެވެ. ނިއުޓްރިޝަންގެ ގޮތުން ބަލާއިރު މިއީ ސިއްހަތަށް ރަނގަޅު ބުއިމެއް ކަމަށް ވެސް އޭނާ ވިދާޅުވި އެވެ.