ސިޔާސީ މަސްރަހުން އަލުން ފެނިދާނެ: ޑރ. ޝަހީމް

ކުރިއަށް އޮތް ތަނުގައި ސިޔާސީ މަސްރަހުން އަލުން ފެނިދާނެ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ޗާންސެލަރު ޑރ. ޝަހީމް ކުރެއްވި ޓްވީޓެއްގައި ވިދާޅުވީ ސިޔާސީ މަސްރަހުން އަލުން ފެނިގެން ހިނގައިދާނެ ކަމަށެވެ. ނަމަވެސް އެކަމާ ގުޅޭ އިތުރު ތަފުސީލެއް ނުދެއްވަ އެވެ.

ކުރިން އަދާލަތު ޕާޓީގެ އިލްމުވެރިންގެ މަޖިލިސް މެމްބަރުކަން ކުރެއްވި ޝަހީމް އެ ޕާޓީން ވަކިވެވަޑައިގެންނެވީ ސިޔާސީ މަސްރަހުން ދުރުވެ، ދީނަށް ހިދުމަތް ކުރެއްވުމަށް ކަމަށް ކުރިން ވިދާޅުވެފައިވެ އެވެ.

މިދިޔަ އަހަރު އަދާލަތުން ވަކިވެވަޑައިގެންނެވީ ދެތިން އަހަރެއްހާ ދުވަހު ޚިޔާލު ތަފާތުވުމެއްގެ ތެރޭގައި އުޅުއްވުމަށް ފަހުގަ އެވެ. އެ ޕާޓީން ވަކިވެވަޑައިގެން ރަސްމީކޮށް އެއްވެސް ޕާޓީއަކަށް ގުޅިވަޑައި ނުގަތް ކަމުގައި ވިއަސް މި ސަރުކާރުގެ ބައެއް ހަފުލާތަކުގައި ބައިވެރިވެވަޑައިގަންނަވަ އެވެ.

ކުރީގެ ރައީސް މުހައްމަދު ވަހީދުގެ ސަރުކާރާއި މި ސަރުކާރުގައި ވެސް އިސްލާމިކް މިނިސްޓަރުކަން ކުރެއްވުމަށް ފަހު ޝަހީމް އެ މަގާމުން އިސްތިއުފާ ދެއްވީ 2015 ވަނަ އަހަރުގަ އެވެ. އޭގެ ފަހުން އިސްލާމިކް ޔުނިވަސިޓީގެ ވައިސް ޗާންސެލަރުގެ މަގާމަށް ރައީސް އަބްދުﷲ ޔާމީން، ޝަހީމް އައްޔަން ކުރެއްވި އެވެ. އިސްލާމިކް ޔުނިވަސިޓީގެ ޗާންސެލަރުގެ މަގާމަށް އޭނާ ބަދަލު ކުރެއްވީ 2016 ވަނަ އަހަރު އެވެ.