އަންނަ ހަފުތާގައި 2050 ސްކޮލަޝިޕަށް ފުރުސަތު ހުޅުވާލަނީ

އަންނަ ހަފުތާގައި 2،050 ސްކޮލަޝިޕަށް ފުރުސަތު ހުޅުވާލާނެ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

އެ މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ވިދާޅުވީ ރާއްޖޭގައި ތިބެގެން މަތީ ތައުލީމު ހާސިލްކުރުމަށް ދޭ މި ފުރުސަތު މި މަހުގެ 21 ވަނަ ދުވަހު އިއުލާނުކުރާނެ ކަމަށެވެ. މިއީ ހުރިހާ ޚަރަދެއް ކޮށްދޭ ގޮތަށް ދޭ ސްކޮލަޝިޕެވެ.

މިއީ މަތީ ތައުލީމު ފޯރުކޮށްދިނުމަށް ރައީސް އަބްދުﷲ ޔާމީން ވެވަޑައިގެންފައިވާ ވައުދުގެ ދަށުން ދޭ ފުރުސަތުތަކެކެވެ. ރައީސް ވަނީ އަންނަ އަހަރުގެ ތެރޭގައި މަތީ ތައުލީމުގެ 3،050 ފުރުސަތު ދޭނެ ކަމަށް ކަމަށް ވިދާޅުވެފަ އެވެ. އެއީ 2،050 ސްކޮލަޝިޕާއި 1،000 ލޯނުގެ ފުރުސަތެވެ.

ނަޒީރު ވިދާޅުވި ގޮތުގައި "ޕްރޮމޯޓިން ސްކިލްސް ފޯ ދަ ފިއުޗާ" ގެ ނަމުގައި ހުޅުވާލާ ސްކޮލަޝިޕްތަކުގެ ދަށުން ކިޔެވޭނީ ސެޓްފިކެޓް ލެވެލް އިން ފެށިގެން ޑިޕްލޮމާއާ ހަމައަށެވެ. ރާއްޖޭގެ ކޮލެޖުތަކާއި ދެ ޔުނިވާސިޓީގައި ހިންގާ ޕްރޮގްރާމުތަކުގައި ކިޔެވުމަށް އެ ސްކޮލަޝިޕުން ފުރުސަތު ދޭނެ އެވެ.

އަންނަ މަހު ކޮލެޖްތަކާއި ޔުނިވާސިޓީތަކުގެ ކިޔެވުން ފެށެން ވާއިރަށް ސްކޮލަޝިޕްގެ ހުރިހާ ކަމެއް ނިންމާނެ ކަމަށް އޭނާ ވިދާޅުވި އެވެ.

"މި މަހުގެ ތެރޭގައި ސްކޮލަޝިޕަށް ހުޅުވާލާފައި، ފޯމު ހުށަހަޅަމުންދާ ވަރަކަށް ޕްރޮސެސް ކުރަމުން ދާނީ. އަންނަ މަހު ކޮލެޖާއި ޔުނިވާސިޓީތަކުގައި ކިޔެވުން ފެށުމުގެ ކުރިން ސްކޮލަޝިޕްގެ ކަންތައްތައް ހަމަޖައްސައި ދަރިވަރުންނަށް ކިޔެވޭ ވަރު ވާނެ،" ނަޒީރު ވިދާޅުވި އެވެ.

މަތީ ތައުލީމް ހާސިލްކުރަން 5،200 އަށް ވުރެ ގިނަ ލޯނުގެ ފުރުސަތު، މިދިޔަ ހަތަރު އަހަރު ވަނީ އެޑިއުކޭޝަނުން ފަހިކޮށްދީފަ އެވެ. އަދި އަންނަ އަހަރުގެ މާޗު މަހު ލޯނުގެ 1،000 ފުރުސަތަށް ހުޅުވާލާނެ ކަމަށް ވެސް ބުންޏެވެ.