500 އަށްވުރެ ގިނަ ދަރިވަރުންނަށް މަތީ ތައުލީމުގެ ލޯނު ދީފި

މަތީ ތައުލީމް ހާސިލްކުރަން އެޑިއުކޭޝަން މިނިސްޓްރީން ދޫކުރާ ލޯނު 566 އަށް ވުރެ ގިނަ ދަރިވަރުންނަށް މިރޭ ހަވާލުކޮށްފި އެވެ.

އިސްކަންދަރު ސްކޫލުގައި ބޭއްވި ހަފުލާއެއްގައި އެ ދަރިވަރުންނަށް ލޯނު ލިބުނުކަމުގެ ލިޔުން ހަވާލުކޮށްދެއްވީ އެޑިއުކޭޝަން މިނިސްޓަރު ޑރ. އާއިޝަތު ޝިހާމެވެ.

މިއީ ރާއްޖެ އާއި ރާއްޖޭން ބޭރުގައި ތިބެގެން މަތީ ތައުލީމް ހާސިލްކުރަން ލޯނު ދޫކުރި 10 ވަނަ ބުރެވެ. މި ފަހަރު ލޯނު ދޫކޮށްފައިވަނީ ރާއްޖޭގައި ތިބެގެން ޑިޕްލޮމާ އިން ފެށިގެން މާސްޓާޒްއާ ހަމައަށް އަދި ރާއްޖޭން ބޭރުގައި ޑިޕްލޮމާއިން ފެށިގެން މާސްޓާޒްއާ ހަމައަށް ކިޔެވުމަށެވެ.

އެޑިއުކޭޝަން މިނިސްޓްރީން ބުނީ މިދިޔަ އޮގަސްޓް މަހު ހުޅުވާލި މި ލޯނު ސްކީމުގައި 1000 ލޯނު ދޫކުރަން ހަމަޖެއްސި ކަމަށެވެ. ނަމަވެސް އެ ލޯނަށް އެދި ހުށަހަޅާފައިވަނީ 612 ދަރިވަރުން ކަމަށާއި އޭގެ ތެރެއިން ލޯނު ދީފައިވަނީ ޝަރުތު ހަމަވާ 566 ދަރިވަރުންނަށް ކަމަށް އެޑިއުކޭޝަނުން ބުންޏެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ ފާއިތުވި ހަތަރު އަހަރުގެ ތެރޭގައި މަތީ ތައުލީމް ހާސިލްކުރަން 5200 އަށް ވުރެ ގިނަ ލޯނުގެ ފުރުސަތު ފަހިކޮށްދީފައިވާ ކަމަށެވެ. އަދި މިއަހަރު އެ ފުރުސަތަށް އެދުނު ގިނަ ދަރިވަރުންނަށް ލޯނު ދީފައިވާ ކަން ފާހަގަކުރެއްވި އެވެ.

މިނިސްޓަރު ވިދާޅުވީ މަތީ ތައުލީމު ދޭ ތަންތަނުގެ ފެންވަރުކޮށް ހިދުމަތް ރަނގަޅުކުރަން ގިނަ މަސައްކަތްތަކެއް ކުރަމުން އަންނަ ކަމަށެވެ. އޭގެ ތެރެއިން ފަސް އަހަރު ދުވަހަށް އަމާޒުކޮށް ހަޔަ އެޑިއުކޭޝަންގެ މާސްޓަ ޕްލޭނެއް ލޯންޗުކޮށް ގިނަ ކަންތައްތަކެއް ކުރަމުން އަންނަ ކަމަށް ވެސް ވިދާޅުވި އެވެ.

މިރޭ ލޯނު ލިބުނު ހުރިހާ ދަރިވަރުންނަށް މިނިސްޓަރު ވަނީ ކިޔެވުން ފުރިހަމަކޮށް، ގައުމަށް ހިދުމަތް ކުރުމަށް އެދިވަޑައިގެންފަ އެވެ.

ދުނިޔޭގެ ގައުމުތަކުގައި 2030ގެ ތައުލީމީ އެޖެންޑާއާ އެކު މިހާރު މަސައްކަތް ކުރަމުން އަންނަނީ އިންސާނީ ވަސީލަތް ތަރައްގީ ކުރުމަށް ކަމަށާއި މި ސަރުކާރުން ވެސް އެންމެ މުހިއްމު ކަމެއް ދެނީ މީހުން ބިނާކޮށް ހިދުމަތްތައް ރަނގަޅު ކުރުމަށް ކަން ފާހަގަކުރެއްވި އެވެ.

މިފަހުން ރައީސް އަބްދުﷲ ޔާމީން އިއުލާންކުރެއްވި 2050 ސްކޮލަޝިޕަށް ކުރިމަތިލުމަށް އަންނަ މަހުގެ ކުރީކޮޅު ހުޅުވާލާނެ ކަމަށް މިނިސްޓަރު ވިދާޅުވި އެވެ. އަދި އަންނަ އަހަރުގެ މާޗު މަހުގެ އެއް ވަނަ ލޯނުގެ ސްކީމުގެ އާ ބުރަކަށް އިއުލާނު ކުރެވޭނެ ކަމަށް ވިދާޅުވި އެވެ.