އައިފޯން 10ގެ ސްކްރީނަށް ރޮނގެއް އަރަނީ

އެޕަލްގެ އެންމެ ފަހުގެ އަދި އެންމެ އަގުބޮޑު ފޯނު ކަމަށްވާ އައިފޯން 10 ގެ ސްކްރީނަށް ފެހިކުލައިގެ ރޮނގެއް އަރާ މައްސަލައެއް ދިމާވެ ބައެއް މީހުން އެކަމުގެ ޝަކުވާކުރަން ފަށައިފި އެވެ.

އެންޑްރޮއިޑުގެ ބައެއް ފޯނުތަކުގައި ފިޔާތޮށި ކުލައިގެ ރޮނގެއް ސްކްރީނަށް އަރާ ގޮތަށް އައިފޯނުގައި ވެސް ރޮނގު އިންނަނީ ސްކްރީނުގެ ދިގަށްވާ ގޮތަށެވެ. މި މައްސަލަ ދިމާވި ބައެއް މީހުން ސޯޝަލް މީޑިއާގައި ބުނެފައިވާ ގޮތުގައި މި މައްސަލަ ދިމާވަނީ ގިނައިރު ފޯނު ބޭނުންކުރުމުންނެވެ.

މި ލައިން އިންނަނީ ވަރަށް ހިމަކޮށް ކަމަށް ވިޔަސް ޑިސްޕްލޭއިން ވަރަށް ބޮޑަށް އެ ރޮނގު ފާހަގަވެ އެވެ. މިކަމާ ބެހޭ ގޮތުން އެޕަލް އިން ރަސްމީގޮތެއްގައި ވާހަކަ ނުދެއްކި ނަމަވެސް މި މައްސަލަ ތަޖުރިބާކުރަން ޖެހުނު މީހަކު ސޯޝަލް މީޑިއާގައި ބުނެފައިވާ ގޮތުގައި އެޕަލް އިން ވަނީ އެއްވެސް އަގަކާ ނުލައި ފޯނު ބަދަލުކޮށްދީފަ އެވެ.

އައިފޯން 10 އަށް މާބޮޑަށް ފިނިވުމުން ޓަޗް ސްކްރީން ރަނގަޅަށް މަސައްކަތް ނުކުރާ ކަމުގެ ޝަކުވާތަކެއް ވެސް ބައެއް މީހުން ކޮށްފައިވެ އެވެ. އައިފޯނު ގެންގުޅެން ޖެހެނީ 0-35 ޑިގްރީސެލްސިއަސްގައި ކަމަށް ވާއިރު މި ޓެމްޕަރޭޗާ ތެރޭގައި ވެސް ފޯނުގެ މަސައްކަތަށް ހުރަސްއެޅޭ ކަމަށްވެ އެވެ. އެޕަލް އިން ވަނީ މި މައްސަލަ އުޅޭކަން އެނގިފައިވާ ކަމަށް ބުނެ އެކަން ހައްލުކުރާނެ ކަމަށް ބުނެފަ އެވެ. ޓަޗް ސްކްރީނަށް އެ މައްސަލަ ދިމާވަނީ ފިނިވުމުން، ކުޑަ ވަގުތުކޮޅަކަށް ކަމަށާއި އިރުކޮޅަކުން ރަނގަޅުވާ ކަމަށް ވެސް އެޕަލް އިން ބުނެފައިވެ އެވެ.

މިގޮތަށް ސްކްރީނަށް ރޮނގެއް އެރުމުގެ މައްސަލަ ގޫގުލް ޕިކްސެލް އާއި ސެމްސަންގުގެ ބައެއް ފޯނުތަކަށް ވެސް ދިމާވެ އެވެ.