މިހާ ހިތްދަތިކަމުގައި ވެސް މި ދެމަފިރިންގެ ޝަކުވާއެއް ނެތް

ކައިވެނި ކުރަނީ މުޅި އުމުރަށް އެކީގައި އުޅުމަށެވެ. ކިތަންމެ ބޮޑު ހިތާމައެއް ލިބުނަސް އަދި ކިތަންމެ ބޮޑު ބައްޔެއް ވިޔަސް އެކަކު އަނެކަކާ ވަކިނުވާން ވައުދުވަމުންނެވެ. އެކަމަކު މި އިގުރާރުގައި ދެމިތިބެވޭ މީހުން ގިނައެއް ނޫނެވެ. އެކަމަކު މިއީ ނަމޫނާ މިސާލެކެވެ.

"ބާސްކެޓް ކަޕްލް" ގެ ގޮތުގައި މަޝްހޫރުވެފައިވާ ކާއޯ ޝޫކާއީ އާއި އަންހެނުން ޒޫ ހައުބީ އަކީ ޗައިނާގެ ޗޮންކިންގެ ޔޮންގަން އަވަށުގައި ދިރިއުޅޭ ދަނޑުވެރި ދެމަފިރިންނެވެ. މިއީ ހުރިހާ ގޮތަކުން ހާއްސަ ޖޯޑެކެވެ. ފިރިހެންމީހާ އަށް ލޮލަކަށް ނުފެނެ އެވެ. އަންހެން މީހާއަކަށް ނުހިނގި އެވެ.

ކާއޯގެ ލޮލުގެ ފެނުން ގެއްލުނީ 1988ގައި ކަމަށް ރިޕޯޓުތައް ބުނެ އެވެ. އޭނާގެ އަންހެނުންނަށް ޖެހުނު ބައްޔެއްގެ ސަބަބުން ނުހިނގޭތާ 30 އަހަރުވެއްޖެ އެވެ. އެކަމަކު މިއީ ދެމަފިރިންގެ ގުޅުން ކެނޑި ގޭގައި ތިބެން ޖެހުނު ކަމަކަށް ނުވި އެވެ. ކާއޯ ތަންތަނަށް ދަނީ އޭނާގެ އަންހެނުން ބާސްކެޓަކަށް ލައިގެން އެ ބާސްކެޓް ކޮނޑުގައި އަޅުވައިގެންނެވެ. ކާއޯ އަށް ލޮލަށް ނުފެންނާތީ އޭނާގެ ލޮލަކީ އަނބިމީހާ އެވެ. ތަންތަން ކިޔައިދީ ހިނގާނެ މަގު ބުނެދީ ހުރިހާ ކަމެއް ކުރަނީ ވަށިގަނޑު ތެރޭގައި އިންނަ އަނބިމީހާ އެވެ.

މި ދެމަފިރިން އުޅެން ޖެހިފައިވަނީ ދަތުރުކުރަން އުނދަގޫ ހިސާބުގަނޑެއްގައި ނަމަވެސް އެއްވެސް އެކްސިޑެންޓެއް ދިމާނުވެ މި ހުރިހާ ދުވަހަކު ތަންތަނަށް ގޮސް ދަނޑު ހައްދައިގެން އުޅެވެނީ ދެމަފިރިން ގުޅިގެން ކުރާ މަސައްކަތުންނެވެ.

މި ދެމަފިރިން އެކުގައި ދަނޑަށް ދާ މަންޒަރާއި ދަނޑުގައި މަސައްކަތް ކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވައިރަލްވުމުން އެތައް މިލިއަން ފަހަރަކު މި ވީޑިއޯ ބަލާފައިވެ އެވެ. އަދި މި ދެމަފިރިންނަށް ތައުރީފުކޮށް އެތައް ހާސް ބަޔަކު ކޮމެންޓް ކޮށްފައިވެ އެވެ.

އެކަކު އަނެކަކުގެ ކިބައިން ހިތްވަރު ހޯދައިގެން މަސައްކަތް ކޮށްގެން އާމްދަނީ ހޯދަން މި ދެމަފިރިން ކުރާ މަސައްކަތަކީ ތައުރީފު ހައްގު އަދި ގިނަ ބަޔަކަށް އެކަމުން ފިލާވަޅެއް ލިބިދޭނެ ކަމެއް ކަމަށް ކޮމެންޓްކުރި މީހުން ބުނެފައިވެ އެވެ.

ސެލީ ޝާޕް ކިޔާ މީހަކު ކުރި ކޮމެންޓެއްގައި ބުނެފައިވަނީ ލޮލާއި އަތާއި ފައި ސަލާމަތުން ހުންނަ އެތައް ބަޔަކު އެމީހުންގެ ދިރިއުޅުމުގައި ހުރި އުނދަގޫތަކުގެ ވާހަކަތައް ދައްކާ ޝަކުވާ ކުރާއިރު އެމީހުންނަށް ވުރެ މާ ހާލުގައި ދިރިއުޅޭ މީހުން ވެސް ދުނިޔޭގައި އުޅޭކަން ވިސްނާ ނުލައިކަމަށް ބުނެފައިވެ އެވެ.