މެމްބަރުންގެ ދިފާއުގައި އައިޕީޔޫގެ ވަފުދެއް ރާއްޖެ އަންނަނީ

ރައްޔިތުން މަޖިލީހުގެ އިދިކޮޅު މެމްބަރުންގެ ހައްގުތައް ނަގާލާފައިވާ ކަމަށް ބުނެ އިންޓަޕާލަމެންޓްރީ ޔޫނިއަން ( އައިޕީޔޫ)ގެ ވަފުދެއް ރާއްޖެ އައުމަށް ނިންމައިފި އެވެ.

މެމްބަރުންގެ އިންސާނީ ހައްގުތައް ނަގާލާފައިވާތީ އައިޕީޔޫ އިން ކަންބޮޑުވުން ފާޅުކޮށްފައިވާ ގައުމުތަކުގެ ތެރޭގައި ހިމެނެނީ ރާއްޖެ އާއި ތުރުކީ، ކެމްބޯޑިއާ އަދި ވެނެޒިއުލާ އެވެ.

އައިޕީޔޫ ކޮމިޓީ އޮން ހިއުމަން ރައިޓްސް އޮފް ޕާލަމެންޓޭރިއަންސް އިން ނިންމާފައިވަނީ ރާއްޖެ ހިމެނޭގޮތަށް އެ ގައުމުތަކުގެ މެމްބަރުންގެ ހައްގުތައް ހޯދައިދިނުމަށް ބާރު އެޅުމަށްޓަކައި ހާއްސަ ޓީމެއް ކައިރި މުސްތަގުބަލުގައި ގައުމުތަކަށް ފޮނުވުމަށެވެ.

އިދިކޮޅު ފަރާތްތަކަށް މަޖިލީހުގެ މެޖޯރިޓީ ލިބުމާ އެކު މަޖިލީހުގައި ހިނގަމުންދާ ކަންތައްތަކާ ގުޅިގެން އައިޕީޔޫއިން މީގެ ކުރިން ވެސް ވަނީ ކަން ބޮޑުވުން ފާޅުކޮށްފަ އެވެ.

އައިޕީޔޫއިން އެގޮތަށް ނިންމާފައިވާއިރު ރައްޔިތުންގެ މަޖިލީހުގެ ރައީސް އަދި ޕީޕީއެމްގެ ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު، ހިމެނިވަޑައިގަންނަވާ ގޮތަށް މަޖިލީހުގެ ވަފުދެއް ވަނީ އައިޕީޔޫގެ 137 ވަނަ ބައްދަލުވުމުގައި ބައިވެރިވުމަށް ރަޝިއާ އަށް ވަޑައިގެންފަ އެވެ.