އޮޅުވާލުމަށް ފަތުރާ ދޮގު މައުލޫމާތުން ޑިމޮކްރަސީއަށް ބޮޑެތި ގޮންޖެހުންތައް ކުރިމަތިވޭ: އަބްދުއްރަހީމް

ދޮގު މައުލޫމާތާއި ގަސްދުގައި އޮޅުވާލުމަށް ފަތުރާ މައުލޫމާތުގެ ސަބަބުން ޑިމޮކްރަސީ އަށް ބޮޑެތި ގޮންޖެހުންތަކާ ކުރިމަތިލާންޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

"ސުލްހަވެރި އަމާން އަދި ދެމެހެއްޓެނިވި މުސްތަގުބަލެއް ބިނާކުރުމަށް ސައިންސާއި ޓެކްނޮލޮޖީ އަދި އީޖާދުގެ ބޭނުންހިފުން" ގެ މައުލޫއަށް ސްވިޒަލެންޑުގެ ޖެނީވާގައި ކުރިއަށް ގެންދާ އިންޓަ-ޕާލަމަންޓް ޔޫނިއަން (އައިޕީޔޫ) ބައްދަލުގައި މަޖިލިހުގެ ރައީސް އަބްދުއްރަހީމް ވިދާޅުވީ އާޓިފިޝަލް އިންޓެލިޖެންސް ކުރިއަރަމުން އަންނައިރު، މަޖިލީހުން ވެސް ގަވައިދުތަކާ އެއްވަރަށް ބަދަލުވާން ޖެހޭނެ ކަމަށެވެ.

މަޖިލީހުގެ މެމްބަރުންނަކީ ޑިމޮކްރަސީ ހިމާޔަތް ކުރުމުގައި އިސް ދައުރެއް އަދާކުރަންޖެހޭ ބައެއް ކަމަށް އެ މަނިކުފާނު ވިދާޅުވި އެވެ.

"އަޅުގަނޑުމެން އެންމެންނަށް ވެސް އެނގޭނެ ފަދައިން ދޮގު މައުލޫމާތު ދިނުމާއި ދޮގު މައުލޫމާތު ފެތުރުމަކީ ޑިމޮކްރަސީ އަށް ނުރައްކާކުރުން. އާޓިފިޝަލް އިންޓެލިޖެންސްގެ ކުރިއެރުންތަކާ ބެހޭގޮތުން މައުލޫމާތު ދޭން ޖެހޭނެ އަދި މާހިރުންނާއި މުޖުތަމައާ ގުޅިގެން މަސައްކަތްކޮށް އޭއައިގެ ސަބަބުން އިންސާނިއްޔަތަށް ކުރާ ފައިދާ ކަށަވަރު ކުރެވޭނެ،" އަބްދުއްރަހީމް ވިދާޅުވި އެވެ.

ކުދި ޖަޒީރާ ގައުމުތަކަށް ދެމެހެއްޓެނިވި ގޮތެއްގައި ތަރައްގީ އާއި ތަހުޒީބު ގެނައުމަށް އަދި ދިވެހިންގެ ނާޒުކު ތިމާވެށި ހިމާޔަތްކުރުމަށް ސައިންސާއި ޓެކްނޮލޮޖީ ބޭނުންހިފުމަކީ މުހިއްމު ކަމެއް ކަމަށް ވެސް އަބްދުއްރަހީމް ވިދާޅުވި އެވެ.

މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމެއްގެ ގޮތުން ރާއްޖެއަށް ބޮޑެތި ގޮންޖެހުންތަކެއް ކުރިމަތިލާންޖެހޭ ކަމަށް ފާހަގަކުރައްވައި އެ މަނިކުފާނު ވަނީ ރައީސް. ޑރ. މުހައްމަދު މުއިއްޒު ކޮޕް 28 ގައި އިއުލާން ކުރެއްވި ގޮތަށް ފަސް އަހަރު ތެރޭގައި އިއާދަކުރަނިވި ހަކަތައިން ގައުމުގެ ކަރަންޓުގެ 33 ޕަސެންޓު ހަމަޖެއްސުމާއި ފަސް މިލިއަން ގަސް އިންދުމުގެ ގައުމީ ކެމްޕޭން ކުރިއަށް ގެންދާ ކަމަށް ވިދާޅުވެފަ އެވެ.

ޓެކްނޮލޮޖީ ކުރިއަރުވަން ގާނޫނު ހަދާ މަޖިލިސްތަކުން މުހިއްމު ދައުރު އަދާކުރާކަން ފާހަގަކުރައްވައި މަޖިލިހުގެ ރައީސް ވިދާޅުވީ ކޮވިޑުގެ ދުވަސްވަރު ރައްޔިތުންގެ މަޖިލީހުގެ ޖަލްސާތައް ކުރިއަށް ގެންދިޔައީ އޮންލައިންކޮށް ކަމަށެވެ. މިއީ، އޮންލައިންކޮށް ދުނިޔޭގައި ގެންދިޔަ ގާނޫނު ހަދާ މަޖިލީހުގެ ފުރަތަމަ މަޖިލިސް ކަމަށް ވިދާޅުވި އެވެ.

ޓެކްނޮލޮޖީއާ މެދު މަޖިލީހުގެ ދައުރު އިތުރުކުރަން މަޖިލީހުގައި އައިސީޓީއާ ގުޅޭ ދާއިމީ ކޮމިޓީއެއް ވެސް ވަނީ އުފައްދައިފަ އެވެ.

އެ މަނިކުފާނުގެ ވާހަކަފުޅު ނިންމަވާލެއްވީ އިޒްރޭލުން ފަލަސްތީނަށް ދެމުންދާ ހަމަލާތައް ވަގުތުން ހުއްޓާލައި ރައްޔިތުންނަށް ކުރިމަތިވެފައިވާ ބިރުވެރި ހާލަތުން ސަލާމަތް ކުރުމަށް އިސްކަންދީ، ސުލްހަ ދެމެހެއްޓުމަށް އިލްތިމާސް ކުރައްވަމުންނެވެ. ލުބުނާނުގައި ހިނގަމުންދާ ހަމަނުޖެހުންތައް ނިމުމަކަށް ގެނައުމާއި އާއްމުން ތަހައްމަލްކުރާ ތަކުލީފުތައް ނިމުމަކަށް ގެނައުމަށްޓަކައި ވަގުތުން ހަނގުރާމަ ހުއްޓާލުމަށް ވެސް ގޮވާލެއްވި އެވެ.