މަޖިލީހުގެ މި އަހަރުގެ ދެވަނަ ދައުރު އެއް ހަފުތާއަށް ދަންމާލައިފި

ރައްޔިތުންގެ މަޖިލީހުގެ މި އަހަރުގެ ދެވަނަ ދައުރު އިތުރު އެއް ހަފުތާއަށް ދަންމާލަން މިއަދު ފާސްކޮށްފި އެވެ.

މަޖިލީހުގެ ގަވައިދުގައި އޮންނަ ގޮތުން އަހަރުގެ ދެވަނަ ދައުރު އޯގަސްޓް 15 އަށް ހަމަވާނެ އެވެ. ނަމަވެސް، މަޖިލީހުން މިއަދު ފާސްކުރީ، މި މަހުގެ 21 ވަނަ ދުވަހާ ހަމައަށް ދައުރު ދަންމާލާށެވެ.

އެގޮތަށް ފެންނަ ކަމަށް 59 މެންބަރުން ވޯޓު ދެއްވިއިރު، ނުފެންނަ ކަމަށް 10 މެންބަރަކު ވޯޓު ދެއްވި އެވެ.

މަޖިލީހުގެ ދައުރު ދަންމާލުމާ ގުޅޭ ގޮތުން ވާހަކަ ދައްކަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ދައުރު ދަންމާލަނީ މުހިންމު މަސައްކަތްތަކެއް ނިންމަން ކަމަށާއި އެއީ ރައްޔިތުންނާ ގުޅުންހުރި ކަންތައްތަކެއް ކަމަށެވެ.

ދައުރު ދަންމާލަނީ އަވަސް އަރުވާލައިގެން ބިލްތަކެއް ފާސްކުރަން ނޫން ކަމަށާއި ނަމަވެސް، ރައްޔިތުންނަށް ލިބޭ ހިދުމަތްތައް އަވަސް ކުރުމުގެ މަގުސަދުގައި ކަމަށް ވެސް އަބްދުއްރަހީމް ވިދާޅުވި އެވެ.

އޭނާ ވިދާޅުވި ގޮތުގައި ރައްޔިތުންގެ މަޖިލީހަކީ ރައްޔިތުންނާ ގުޅޭ ތަނަކަށް ވާތީ، މެންބަރުން ޗުއްޓީއަށް ވަޑައިގަންނަވަން ޖެހޭނީ ރައްޔިތުންނާ ގުޅުންހުރި މަސައްކަތްތައް ނިންމުމަށް ފަހު އެވެ.