"ދިރާގު ޕޭ"ގެ ނަމުގައި ޑިޖިޓަލް ވޮލެޓެއް ތައާރަފްކޮށްފި

ޖީބުގައި ފައިސާ ނުގެންގުޅެ، ވިޔަފާރީގެ އެކި މުއާމަލާތްތައް ހިންގުމަށް މަގުފަހިކޮށްދިނުމުގެ ގޮތުން ދިރާގުން، ދިރާގުން "ދިރާގު ޕޭ"ގެ ނަމުގައި ޑިޖިޓަލް ވޮލެޓްގެ ޚިދުމަތް މިއަދު ތައާރަފް ކޮށްފި އެވެ.

ހޮޓެލް ޖެންގައި މިއަދު ބޭއްވި ހާއްސަ ރަސްމިއްޔާތެއްގައި އެ ހިދުމަތް ތައާރަފް ކޮށްދެއްވީ ފިނޭންސް މިނިސްޓަރު އަހުމަދު މުނައްވަރެވެ. މުނައްވަރު ވިދާޅުވީ ގުދުރަތީ ގޮތުން ރާއްޖެ އުފެދިފައިވާ ގޮތަށް ބަލާއިރު މިއީ ވަރަށް މުހިންމު ހިދުމަތެއް ކަމަށެވެ.

"ކޮންމެ ރަށެއްގައި ބެންކެއް، ނުވަތަ ބްރާންޗެއް ނުހުޅުވޭނެ. ރާއްޖެ އުފެދިފައިވާ ގޮތަށް ބަލާއިރު މިއީ ކުރެވޭނެ ކަމެއް ނޫން. އޭޓީއެމްތައް ވެސް ކަވަރު މި ކުރަނީ ގާތްގަނޑަކަށް 40 ޕަސެންޓް. މޯބައިލް ޕޭގެ ހިދުމަތާ އެކު، އާންމުންނަށް ކޮންމެ ރަށެއްގައި ތިއްބަސް ފައިސާގެ ކަންކަމާ ދަތިވާކަށް ނުޖެހޭނެ،" މުނައްވަރު ވިދާޅުވި އެވެ.

މުނައްވަރު ވިދާޅުވީ މޯބައިލް މަނީ ތައާރަފް ވަމުން އަންނަ އިރު، ފައިސާގެ މުއާމަލާތްތަކަށް ނަގަމުން އަންނަ ފީތައް މިހާރަށް ވުރެ ކުޑަ ކުރަން ޖެހޭ ކަމަށެވެ. އަދި އިތުރު ހިދުމަތްތަކަށް ބޭނުން ކުރެވޭ ގޮތަށް މޯބައިލް މަނީގެ ހިދުމަތް ފުޅާ ކުރަން ޖެހޭ ކަމަށް ވެސް މިނިސްޓަރު ވިދާޅުވި އެވެ.

"ދުނިޔޭގައި މޯބައިލް މަނީ ބޭނުން ކުރާ ވަރު މި އަންނަނީ އިތުރުވަމުން. މިސާލަކަށް ސަބް ސަހަރާގެ އެފްރިކާ ގައުމުތަކަށް ބަލާލާއިރު ވެސް މި ހިދުމަތްތައް ވަރަށް ބޮޑަށް ފުޅާވަމުން މި އަންނަނީ،" މުނައްވަރު ވިދާޅުވި އެވެ.

"ސްވިޑަންގަ ވެސް މިކަން މި އަންނަނީ އިތުރުވަމުން. އެފްރިކާ ގައުމުތަކުން އެބަ ދައްކާ މިއީ ކޮންމެހެން ތަރައްގީ ވެފައިވާ ގައުމުތަކުން އެކަނި ކުރެވޭނެ ކަމެއް ނޫންކަން."

މިނިސްޓަރު ވިދާޅުވީ ރާއްޖޭގައި މިފަދަ ހިދުމަތްތައް ފުޅާ ކުރުމަށް، ބޭންކްތަކާއި މޯބައިލް އޮޕަރޭޓަރު ގުޅިގެން މަސައްކަތް ކުރަން ޖެހޭ ކަމަށެވެ. އެގޮތުން އެފަދަ ޕޯޓަލްއެއް ތައްޔާރު ކުރުމުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ.

ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއީލް ރަޝީދު ވިދާޅުވީ ދިރާގު ޕޭ އަކީ އެންމެ ފުރިހަމަ މޯބައިލް މަނީ އެޕްލިކޭޝަން ކަމަށެވެ. އަދި ސްމާޓްފޯން ބޭނުން ނުކުރާ ފަރާތްތަކަށް ވެސް މި ހިދުމަތް ބޭނުން ކުރެވޭނެ ކަމަށެވެ.

"އެންއެފްސީ [ޓެކްނޮލޮޖީ]އާ އެކު މި ހިދުމަތް ބޭނުން ކުރެވޭނެ. ކޮންމެހެން ސްމާޓްފޯނަކަށް ވާކަށް ނުޖެހޭ،" އިސްމާއިލް ރަޝީދު ވިދާޅުވި އެވެ.

އޭނާ ވިދާޅުވީ މި ހިދުމަތް ތައާރަފް ކުރި އިރު، މިހާރު ވެސް ދިރާގު ޕޭގެ 100 އަށް ވުރެ ގިނަ އެޖެންޓުން ރާއްޖޭގެ އެކު ކަންކޮޅުތަކުގައި ހަރަކާތްތެރިވާނެ ކަމަށެވެ. އަދި އެޖެންޓުންގެ އަދަދު ކޮންމެ ދުވަހަކު ވެސް އިތުރުކުރަަމުން ގެންދާނެ ކަމަށް އޭނާ ވިދާޅުވި އެވެ.

ދިރާގުގެ ބިޒްނަސް ޑިވެލޮޕްމަންޓް ޑިރެކްޓަރު އަހްމަދު މައުމޫނު (މާނު) ވިދާޅުވީ، ސްމާޓްފޯން ބޭނުން ނުކުރާ ފަރާތްތަކަށް އެންއެފްސީ ސްޓިކާއެއް ފޯނުގައި ތަތްކޮށްލައިގެން ދިރާގު ޕޭގެ ހިދުމަތް ބޭނުން ކުރެވޭނެ ކަމަށެވެ.

"ތަރައްގީވަމުން އަންނައިރު މިހާރު މި ދަނީ ފައިސާ މަރުވުމާ ދިމާލަށް. އަޅުގަނޑުމެން ރާއްޖެ ވެސް ކޭޝް ލެސް ކުރެވިދާނެ. އަޅުގަނޑު ގަބޫލު ކުރަނީ ކުރިއަށް އޮތް ތަނުގައި ރާއްޖޭގައި ވެސް ކޭޝް ބޭނުން ނުކުރާނެ ކަމަށް،" މާނު ވިދާޅުވި އެވެ.

މާނު ވިދާޅުވީ ދެ ގޮތަކަށް ދިރާގު ޕޭ ހިދުމަތަށް ރެޖިސްޓްރީ ކުރެވޭނެ ކަމަށެވެ. އެގޮތުން ފޯން ނަންބަރާއި، އައިޑީކާޑު ނަންބަރު ޖަހާލައިގެން ކުއިކް ރެޖިސްޓްރީ ކުރެވޭއިރު، އެ އެކައުންޓްތަކުގައި އެއް ފަހަރާ އެންމެ ގިނަވެގެން ބެހެއްޓޭނީ 5،000ރ. ކަމަށެވެ. ދިރާގަށް ގޮސްގެން ރެޖިސްޓްރީ ކުރާނަމަ އެފަދަ އެކައުންޓްތަކުގައި ގިނަވެގެން 20،000ރ. ބެހެއްޓޭނެ އެވެ.

އިސްލާމިކް ބެންކްގެ ސީއީއޯ އަދި މެނޭޖިން ޑިރެކްޓަރު ހާރިސް ހާރޫން ވިދާޅުވީ، ބްރާންޗްތައް ހުޅުވައިގެން ބޭންކް ހިންގި ޒަމާން ނިމިފައިވާ ކަމަށެވެ. އެގޮތުން މިހާރު އާންމުވަމުން އަންނަނީ މޯބައިލް މަނީ ފަދަ ފަސޭހަ ގޮތްތައް ކަމަށް ވެސް ވިދާޅުވި އެވެ.

"އަޅުގަނޑުމެންގެ ހިދުމަތްތައް ވެސް ދިރާގު ޕޭ އާއި އެކު ފުޅާވެގެން ދާނެ. އަޅުގަނޑު ޔަގީންކަން ދެން ކަސްޓޯޑިއަލް ބޭންކުގެ ގޮތުގައި އަޅުގަނޑުމެން ތިބެގެން، ހުރިހާ ބޭފުޅުންގެ ފައިސާ ވެސް ރައްކާތެރިކަމާ އެކު ބަލަހައްޓާނެ ކަމަށް،" ހާރޫން ވިދާޅުވި އެވެ.