ޖޭއެސްސީ ސިފަކުރެވެނީ ބޮޑު ޖޯކެއްގެ ގޮތުގައި: ސުއޫދު

ޖުޑީޝަލް ސާވިސް ކޮމިޝަން (ޖޭއެސްސީ) އިން އަމަލުކުރަމުންދާ ގޮތުން އެ ކޮމިޝަން ސިފަކުރެވެނީ ބޮޑު ޖޯކުތަނެއްގެ ގޮތުގައި ކަމަށް ވިދާޅުވެ ގާނޫނީ ވަކީލު ހުސްނުއްސުއޫދު މިރޭ ވަރަށް ބޮޑަށް ފާޑުވިދާޅުވެއްޖެ އެވެ.

ރާއްޖޭގެ ޝަރުއީ ނިޒާމުގައި ހުރި ކަންބޮޑުވުންތަކާއި ގާނޫނުތަކާ އެއްގޮތަށް މިހާރު ރާއްޖޭގެ ކަންކަން ކުރިއަށް ނުދާތީ އެކަމާ ގުޅޭ ގޮތުން ގާނުނީ ވަކީލުންތަކެއް އިސް ނަންގަވައިގެން ސިލްސިލާކޮށް ބާއްވާ "ދުސްތޫރީ ފަސާނާ" ގެ ފުރަތަމަ ޕެނެލް ޑިސްކަޝަންގައި ކުރީގެ ބަންޑާރަ ނައިބު ސުއޫދު ވިދާޅުވީ، ގާނޫނުއަސާސީ ބައްޓަން ކޮށްފައިވާ ގޮތުން އަދުލު އިންސާފުގެ ގާއިމު ކުރުމުގެ ކަންކަން ހިމާޔަތްކޮށް، ރައްޔިތުންގެ އިތުބާރު ލިބޭ ފަދަ ގޮތަކަށް ކަންކަން ކުރެވޭނެ ނިޒާމު އޮތީ ޖުޑިޝަލް ސާވިސް ކޮމިޝަން (ޖޭއެސްސީ) ގައި ކަމަށެވެ. ނަމަވެސް އެ އިތުބާރު އެ ކޮމިޝަނަށް ހޯދައި ނުދެވޭކަން ސުއޫދު ފާހަގަކުރެއްވި އެވެ.

"ޖޭއެސްސީ މެދުވެރިކޮށް ފަނޑިޔާރުންގެ އިތުބާރު، ހުރުމަތް ރައްކާތެރި ކުރުން އެބައޮވޭ. ފަނޑިޔާރުންނަށް ރައްޔިތުން ކުރާ އިހުތިރާމާއި ގަދަރު ލިބޭނެ ގޮތްތައް ގާއިމު ކުރާނެ ގޮތްތައް ހޯދުމަކީ ޖޭއެސްސީގެ މަސްއޫލިއްޔަތެއް. އެހެން ނަމަވެސް އަޅުގަނޑުމެންނަށް މިއަދު ފެނިގެން މި ދަނީ ޖޭއެސްސީގެ ފަރާތުން އެ މަސްއޫލިއްޔަތު އަދާ ކުރުމުގައި ފަހަތަށް ޖެހޭ ތަން. ނަތީޖާއެއްގެ ގޮތުން އަދުލު އިންސާފު ގާއިމުކުރާ ފަރާތުގެ އިތުބާރު ރައްޔިތުންގެ މެދުގައި އެއްވެސް ވަރަކަށް ނެތް،" ސޯލްޓް ކެފޭގައި ބޭއްވި ފޯރަމްގައި ސުއޫދު ވިދާޅުވި އެވެ.

އޭނާ ވިދާޅުވީ މި ސަބަބާ ހުރެ ޖޭއެސްސީ ހަރުދަނާ ކުރުމަކީ ކޮންމެހެން ވެސް ކުރަން ޖެހޭ ކަމެއް ކަމަށާއި އެ ކޮމިޝަނަށް ލިބިދީފައި ނުވާ ބާރުތަކެއް ބޭނުން ކުރުމަކީ ވެސް ވަރަށް ބޮޑު މައްސަލައެއް ކަމަށެވެ. އެގޮތުން ކޯޓުތަކަށް ދާއިމަށް އައްޔަންކޮށްފައިވާ ފަނޑިޔާރުން އެއް ކޯޓުން އަނެއް ކޯޓަށް ޖޭއެސްސީން ބަދަލު ކުރަނީ ގާނޫތަކާއި އުސޫލުތަކާ ޚިލާފަށް ކަމަށް ސުއޫދު ވިދާޅުވި އެވެ.

މިފަދަ ކަންކަން މިހެން ހުރުމާ އެކު ޖޭއެސްސީ މިހާރު ސިފަ ކުރެވެނީ ބޮޑު ޖޯކެއްގެ ގޮތުގައި ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންނަށް އެ ކޮމިޝަންގެ ފަރާތުން ފެންނަނީ ފަނޑިޔާރުން ނިންމަވާ ނިންމެވުންތަކުގެ ސަބަބުން ފާޅުކުރައްވާ ރައުޔެއްގެ ސަބަބުން ފިޔަވަޅު އެޅިގެން ދާތަން،" ސުއޫދު ވިދާޅުވި އެވެ.

"...މީގެ ނަތީޖާއަކީ ފަނޑިޔާރުންގެ މިނިވަން ކަމަށް ހުރަސް އެޅުން. އިތުބާރު ގެއްލުން. ޖޭއެސްސީ އަކީ ބޮޑު ޖޯކަކަށް ވުން. އަދި އެފަދަ ކަންކަން ކުރަނީ ކޮން އުސޫލަކުންކަން ރައްޔިތުންނަށް ސާފުކޮށް ނުދެވޭތީ އިތުބާރު ވަނީ ގެއްލިފައި."

ނަމަވެސް ކަންކަން ކުރަން ވާނީ ދެފުށް ފެންނަ ގޮތަށް، ހަމަތަކާއި އުސޫލުތަކުގެ މަތިން ކަމަށާއި އަޅާ ފިޔަވަޅުތަކަކީ ކީއްވެގެން، ކޮން ގޮތަކަށް އަޅާ ފިޔަވަޅުތަކެއްކަން ރައްޔިތުންނަށް ސާފުކޮށް ދޭން ޖެހޭނެ ކަމަށް ސުއޫދު ވިދާޅުވި އެވެ. އަދި ޖޭއެސްސީ ފަދައިން އެހެން ކޮމިޝަންތަކުން ވެސް ކަންކަން ކުރަން ޖެހޭނީ އެގޮތަށް ކަމަށް ވިދާޅުވި އެވެ.

"މިފަދަ ކަންކަމާ ހުރެ ފަނޑިޔާރުންނަށް ނުފޫޒުތަކެއްގެ ތެރެއަށް ދާން ޖެހޭކަން އެބަ ގަބޫލުކުރެވޭ. އޭގެ އެންމެ ބޮޑު ސަބަބަކީ ޖޭއެސްސީގައި ތިއްބެވި މެމްބަރުންގެ ތެރެއިން ގިނަ އަދަދެއްގެ މެމްބަރުންނަކީ ސިޔާސީ ފަރާތްތަކަކަށް ވާތީ،" ސުއޫދު ވިދާޅުވި އެވެ.

އޭނާ ވިދާޅުވި ގޮތުގައި ރާއްޖޭގެ އަދުލުގެ ނިޒާމުގެ ތެރޭގައި ހުރި މިފަދަ މައްސަލަތަކުގެ ވާހަކަތައް ދައްކަން ޖެހެނީ، ކަންކަން ހަމަ މަގަށް އަޅުވައި، ކަންކަން އިސްލާހު ކުރުމަށެވެ. އަދި މިފަދަ ވާހަކަތައް ދައްކަނީ އެއްވެސް ބަޔަކާ ދެކޮޅަށް އަދި އެއްވެސް ބަޔަކާ އެއްކޮޅަށް ނޫން ކަމަށް ވެސް ވިދާޅުވި އެވެ.

"އެހެންވީމާ ގާނޫނުއަސާސީ އަށް އެންމެ ފުރިހަމަ ގޮތުގައި އަމަލު ކުރެވޭނީ ޓްރާންސްޕޭރެންޓް ނިޒާމެއް އޮވެގެން. ރައްޔިތުން ބޭނުންވާ ކަންކަން ރައްޔިތުންނަށް ސާފުވެގެން،" ސުއޫދު ވިދާޅުވި އެވެ.

"ވަލުދޮރޯށިން ދައުލަތުގެ މުވައްޒަފުންނާ އެކު ހިންގާ މުއާމަލާތްތަކާއި މޭޒުދަށުން ދިއްކޮށްލާ ހަދިޔާތަކާއި ސައި މޭޒުދޮށުން ނިންމާ ކަންކަން ނިންމުމަށްޓަކައި ހަރުކަށި ގާނޫނުތައް ހަދައި އެ ތަންފީޒް ކުރެވޭނެ އުސޫލުތަކެއް ގާއިމު ކުރެވެން ޖެހޭ."

ސުއޫދު ފާހަގަކުރެއްވި ގޮތުގައި ދައުލަތަށް އެންމެ ބޮޑު މަސްލަހަތަކަށް ވާނީ ގާނޫނުއަސާސީއާ އެއްގޮތަށް އަމަލު ކުރުމެވެ. އަދި އެ ނޫން މަސްލަހަތެއް އޮވެގެން ނުވާނެ ކަމަށް އޭނާ ވިދާޅުވި އެވެ.

"ދައުލަތުގެ ކަންކަން ހިންގުމުގައި އެންމެ މަތީ މަސްލަހަތެއް ގާއިމު ކުރެވޭނީ ގާނޫނުއަސާސީ އަށް އަމަލުކޮށްގެންކަން އަޅުގަނޑުމެން ގަބޫލު ކުރަން ޖެހޭ. އެ ނޫން މަގުސަދެއް، އެ ނޫން މަސްލަހަތެއް އޮވެހެން ނުވާނެ،" އޭނާ ވިދާޅުވި އެވެ.

"ސިޔާސީ ވެރިން ރައްކާތެރިކޮށް ނުވަތަ ސިޔާސީ ވެރިން ނެރޭ ގަރާރުތައް ރައްކާތެރި ކުރުން ނުވަތަ ޕޮލިސީ ރައްކާތެރި ކުރުން ފަދަ ކަންކަން ކުރަން ޖެހޭނީ ގާނޫނުއަސާސީގެ އިމުގެ ތެރެއިން."

ސުއޫދު ވިދާޅުވީ އެންމެ ބޮޑު މަސްލަހަތަކީ ރައީސުލްޖުމްހުރިއްޔާ ނެރުއްވާ ގަރާރުތަކަށް، އެ މަނިކުފާން ބޭނުންފުޅުވާ ގޮތަކަށް ދައުލަތް ހިންގުމަށްޓަކައި ކޮންމެ އަގެއް ދީގެން ވެސް އެ ދިފާއުކޮށް ދިނުން ކަމަށް ބައެއް ފަނޑިޔާރުން ވިދާޅުވެފައިވާ ކަމަށެވެ.

"...އެހެންވީމާ ރައްޔިތުން ކަނޑައަޅާފައި ނެތް ގޮތަކަށް އަމިއްލަ އަށް ނުވަތަ ތިމާ ދިފާއު ކުރަނީ ރައީސުލްޖުމްހުރިއްޔާ ނިންމަވާ ގޮތް ކަމަށް ގަބޫލު ކުރުމަކީ އަޅުގަނޑުމެންގެ މުޅި ނިޒާމު ފުނޑުފުނޑުވެ އަޅުގަނޑުމެންގެ ދައުލަތް ހިންގުމަށް އެކުލެވިފައި ނިޒާމް އެހެން ގޮތަކަށް ފުރޮޅިގެން ހިނގައިދާނެ އަދި ގާނޫނުއަސާސީގެ ބާރު ކެނޑިގެން ހިނގައި ދާނެ ކަމެއް،" އޭނާ ވިދާޅުވި އެވެ.

މިރޭގެ ޕެނެލްގައި ކުރީގެ ޑެޕިއުޓީ ޕްރޮސެކިއުޓާ ޖެނެރަލް ހުސައިން ޝަމީމް މައިގަނޑު ގޮތެއްގައި ވާހަކަ ދެއްކެވީ ޣައިރު ހާޒިރުގައި ޝަރީއަތްތައް މިހާރު ކުރަމުންދާތީ އެކަމާ ގުޅޭ ގޮތުން ހުރި ކަންބޮޑުވުންތަކުގެ މައްޗަށެވެ. އެގޮތުން ދާދި ފަހުން ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ މައްޗަށް ޢައިރު ހާޒިރުގައި ޝަރީއަތްކޮށް، އިއްވި ހުކުމުގައި ހުރި ފޫނުބެދޭ ކަންކަން ޝަމީމް ފާހަގަ ކުރެއްވި އެވެ.

ގާނޫނީ ވަކީލު އަދި އިލެކްޝަން ކޮމިޝަންގެ ކުރީގެ ލީގަލް ހެޑް ހަނީފާގެ ވާހަކަ ބިނާކުރެއްވީ އެއްކަހަލަ މައްސަލަތަކެއްގައި ތަފާތު ގޮތްގޮތަށް ހުކުމް ނެރޭ މައްސަލަ އަށެވެ. އޭނާ ވިދާޅުވީ މިފަދަ ކަންކަން ރައްޔިތުން ފާހަގަކޮށް މިހާރު އެ ވާހަކަތައް ދައްކަން ޖެހޭ ކަމަށެވެ.

އަދި ތިމާގެ މައްޗަށް ތަހުގީގެއްކޮށް، ޝަރީއަތެއް ހިންގާ ނަމަ، އެ މަރުހަލާ ކުރިއަށް ގެންދާ ގޮތް ސާފު ކުރުމަކީ ކޮންމެ މީހަކަށް ވެސް ލިބިގެންވާ ހައްގެއް ކަމަށް ވިދާޅުވި އެވެ.