ހުޅުމާލޭގެ އިމާރާތެއްގެ 12 ވަނަ ބުރިން ވެއްޓި ދެ ބިދޭސީއަކު ޒަޚަމްވެއްޖެ

ހުޅުމާލޭގައި ހަދަމުން އަންނަ އިމާރާތެއްގެ 12 ވަނަ ބުރިން ދެ ބިދޭސީއަކު ވެއްޓި އޭގެ ތެރެއިން އެކަކަށް ވަރަށް ބޮޑަށް އަނިޔާވެއްޖެ އެވެ.

ހުޅުމާލޭ ހޮސްޕިޓަލް ހިންގާ އާސަންދަ ކުންފުނިން ބުނީ ހުޅުމާލޭގައި އަމީން ކޮންސްޓްރަކްޝަނުން ހަދާ އިމާރާތުގެ 12 ވަނަ ބުރިން ވެއްޓުނު ދެ މީހުންގެ ތެރެއިން އެކަކަށް "ވަރަށް ބޮޑުވަރު ވެފައި"ވާ ކަމަށެވެ.

އިންޑިއާ އާއި ބަންގްލަދޭޝްގެ އެ ދެ މީހުންގެ ތެރެއިން، އެންމެ ސީރިއަސް އަނިޔާވީ އިންޑިއާ މީހާ އަށެވެ. އޭނާގެ ބޯ ވަނީ ވަރަށް ބޮޑަށް ފަޅައިގެން ގޮސްފަ އެވެ. ބަންގްލަދޭޝް މީހާ އަށް ބޭރުފުށުން ބޮޑު އަނިޔާއެއް ނުވާ ކަމަށް މަންޒަރު ދުށް މީހަކު ބުންޏެވެ.

އާސަންދަ އިން ބުނީ ބޮޑަށް އަނިޔާވި މީހާ އިތުރު ފަރުވާ އަށް މިހާރު މާލެ ގެނެސްފައިވާ ކަަށެވެ.

ބޮޑަށް އަނިޔާވި މީހާ އިމާރާތުގެ 12 ވަނަ ބުރިން ވެއްޓި ޖެހުނު ކަމަށް ވަނީ ހަތަރުވަނަ ބުރީގެ ވައިގޮޅީގަ އެވެ.

އަމީން ކޮންސްޓްރަކްޝަންގައި މަސައްކަތް ކުރާ މި ދެ މީހުން، އިމާރާތުން ވެއްޓުނުއިރު ތިބީ ސަލާމަތީ ގޮތުން އަޅަންޖެހޭ ހެލްމެޓް ފަދަ ތަކެތި ނާޅާ ކަމަށް ވެ އެވެ.