އިނގިރޭސިވިލާތް އީޔޫ އިން ވަކިވުމުން ލަންކާގެ އިގްތިސާދަށް ގެއްލުން

ކޮލަމްބޯ (ޖުލައި 1) - ޔޫރަޕިއަން ޔޫނިއަން އިން އިނގިރޭސިވިލާތް ވަކިވުމުން ސްރީ ލަންކާގެ ވިޔަފާރި އަށް އަސަރު ކުރާނެ ކަމަށް އެ ގައުމުން ބުނެފި އެވެ.

ލަންކާ އިން އެއް ބިލިއަން ޑޮލަރުގެ މުދާ އިނގިރޭސި ވިލާތަށް އަހަރަކު އެކްްސްޕޯޓް ކުރެ އެވެ. އީޔޫ އިން އެ ގައުމު ވަކިވުމުން އިނގިރޭސި ވިލާތުގެ މާކެޓް މިހާރު ނޭނގުމެއްގެ ތެރޭގައިވާ ކަމަށް ޚާރިޖީ ވަޒީރުގެ ނައިބް ހަރުޝާ ޑި ސިލްވާ ވިދާޅުވި އެވެ. ލަންކާ އިން ދަނީ އެ ގައުމުގެ އެކްސްޕޯޓަށް ލުއި ޓެރިފެއް ހޯދައިދިނުމަށް އެދި އީޔޫއާ އެކު ވެސް މަޝްވަރާ ކުރަމުންނެވެ. އިނގިރޭސި ވިލާތަކީ އީޔޫގެ ތެރޭން ލަންކާގެ އެންމެ ބޮޑު އެކްސްޕޯޓް މާކެޓް އޮތް ގައުމެވެ. އަދި އެމެރިކާ ފިޔަވައި ލަންކާގެ ދެ ވަނަ އަށް އެންމެ ބޮޑު އެކްސްޕޯޓް މާކެޓަކީ ވެސް އިނގިރޭސިވިލާތެވެ.

ހަރުޝާ ވިދާޅުވީ އިނގިރޭސި ވިލާތް ވަކިވުމުން ޕައުންޑުގެ އަގު ދަށަށް ދިއުމަކީ ވެސް ލަންކާގެ އިގްތިސާދަށް ކުރާނެ ނޭދެވޭ އަސަރެއް ކަމަށެވެ.

ހަރުޝާ އާއި ލަންކާ ސަރުކާރުގެ އިސް ވަފުދެއް މިދިޔަ ހަފުތާގައި ލަންޑަނަށް ވަޑައިގެން ވޯޓުގައި ބައިވެރިވެވޭ ލަންކާ ނަސްލުމުގެ މީހުން އިނގިރޭސި ވިލާތް އީޔޫ އިން ވަކި ނުވުމަށް ވޯޓު ދިނުމަށް ބާރު އެޅުމަށް ވަނީ ކެމްޕޭން ކޮށްފަ އެވެ.

ހަރުޝާ ވިދާޅުވީ އިނގިރޭސި ވިލާތުގެ މާކެޓުން ލިބުނު އުނިކަން ފޫބެއްދުމަށް އިންޑިއާ އާއި ޗައިނާ އެކު މިނިވަން ވިޔަފާރީގެ އެއްބަސްވުންތަކެއް ވަރަށް އަވަހަށް ގާއިމް ކުރާނެ ކަމަށެވެ. އަދި ސިންގަޕޫރާއި ޖަޕާން އަދި ދެކުނު ކޮރެއާ އެކު ވެސް ވިޔަފާރީގެ އެއްބަސްވުންތަކެއް ގާއިމް ކުރުމަށް މަސައްކަތް ކުރަމުންދާ ކަމަށް ވިދާޅުވި އެވެ.