ފިރިހެން ޗެމްޕިއަންކަން ޓީރެކްސް އަށް، އަންހެން ތަށި ޓައިޓަންސް ހޯދައިފި

އެމްބީއޭ ޗެމްޕިއަންޝިޕް ބާސްކެޓްބޯޅަ މުބާރާތުގެ ފިރިހެން ޑިވިޝަނުގެ ޗެމްޕިއަންކަން ޓީރެކްސް ބީސީ އަދި އަންހެން ޑިވިޝަނުގެ ޗެމްޕިއަންކަން ޓައިޓަންސް ސްޕޯޓްސް ކްލަބް ހޯދައިފި އެވެ.

ޒުވާނުންގެ މަރުކަޒުގެ އިންޑޯ ކޯޓުގައި ރޭ ކުޅުނު ފިރިހެން ޑިވިޝަނުގެ ފައިނަލް މެޗު ޓީރެކްސް ކާމިޔާބުކުރީ ކިންގްސް ބީސީއާ ވާދަކޮށް އެންމެ ޕޮއިންޓެއްގެ ތަފާތުން 74-75 ޕޮއިންޓުންނެވެ.

މެޗުގެ ފުރަތަމަ ކުއާޓަރު ނިމުނުއިރު 23-19 ޕޮއިންޓުން ކުރީގައި އޮތީ ކިންގްސް އެވެ. އެކަމަކު ދެ ވަނަ ކުއާޓަރު ނިމުނުއިރު ޓީރެކްސް ވަނީ 45-42 ޕޮއިންޓުން ކުރިއަށް ޖެހިލައިފަ އެވެ. ތިން ވަނަ ކުއާޓަރު ނިމުނުއިރު ދެ ޓީމު ވެސް އޮތީ 57-57 ޕޮއިންޓުން ހަމަހަމަކޮށެވެ. ފަހު ކުއާޓަރު ވަރަށް ވާދަވެރިކޮށް ދިޔައިރު ޓީރެކްސް ވަނީ އެންމެ ޕޮއިންޓެއްގެ ތަފާތުން މޮޅުވެ ޗެމްޕިއަންކަން ހޯދައިފަ އެވެ.

މި މެޗުގައި ކިންގްސް އަށް އެންމެ ގިނަ ޕޮއިންޓް އެއްކޮށްދިނީ 16 ޕޮއިންޓާ އެކު ރިޝްފާން ރަޝީދެވެ. މީގެ އިތުރުން މުހައްމަދު ޒިލާލް ވަނީ 15 ޕޮއިންޓް އެއްކޮށްދީފަ އެވެ. ޓީރެކްސް އަށް އެންމެ ގިނަ ޕޮއިންޓް އެއްކޮށްދިނީ 23 ޕޮއިންޓް އެއްކޮށްދިން ހުސެއިން ހަލީމެވެ. ދެން އެންމެ ގިނައިން ޕޮއިންޓް އެއްކޮށްދިނީ 18 ޕޮއިންޓާ އެކު ޒަކަރިއްޔާ އަބްދުއްލަތީފް (ޒަކިއްޓެ) އެވެ.

ފައިނަލް މެޗުގެ މޮޅު ކުޅުންތެރިއާގެ މަގާމަށް ހޮވުނީ ޓީރެކްސްގެ އިބްރާހިމް ރަޝްވާން (ޗިކު) އެވެ. މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ޓީރެކްސްގެ އަހުމަދު ހުޝާމެވެ.

އެންމެ މޮޅު ފަސް ކުޅުންތެރިންނަށް ހޮވުނީ ކިންގްސްގެ ޒިލާލާއި ރިޝްފާނާއި ޓީރެކްސްގެ އަހުމަދު ޒަބީރާއި ޗިކު އަދި ދަ ބައުސްގެ އަބްދުﷲ އަމްޒަރެވެ.

އަންހެން ޑިވިޝަނުގެ ޗެމްޕިއަންކަން ޓައިޓަންސް އިން ހޯދީ އިއްޔެ ހަވީރު ކުޅުނު ފައިނަލް މެޗުގައި ސައިކްލޯން ބީސީއާ ވާދަކޮށް 41-37 ޕޮއިންޓުން މޮޅުވެގެންނެވެ. ފުރަތަމަ ކުއާޓަރުގައި 7-5 އިން ސައިކްލޯން ކުރީގައި އޮތްއިރު ދެ ވަނަ ކުއާޓާރުގައި ވެސް އެ ޓީމު ވަނީ 16-13 އިން ކުރި ހޯދައިފަ އެވެ. އެކަމަކު ތިން ވަނަ ކުއާޓަރުގައި 28-25 އިން ޓައިޓަންސް ކުރި ހޯދި ގޮތަށް އެ ޓީމުން މެޗު ނިންމާލީ 41-37 ޕޮއިންޓުން ކުރީގައި އޮވެގެންނެވެ.

މުބާރާތުގެ އަދި ފައިނަލް މެޗުގެ މޮޅު ކުޅުންތެރިއާގެ މަގާމަށް ހޮވުނީ ޓައިޓަންސްގެ އައިމިނަތު ޝިއުރާ އެވެ. އޭނާ މި މެޗުގައި 19 ޕޮއިންޓް އެއްކުރިއިރު އޭނާ އަކީ އެ ޓީމަށް އެންމެ ގިނަ ޕޮއިންޓް ހޯދައިދިން ކުޅުންތެރިއާ ވެސް މެ އެވެ. ސައިކްލޯން އަށް އެންމެ ގިނަ ޕޮއިންޓް ހޯދައިދިނީ 13 ޕޮއިންޓާ އެކު ފާތިމަތު ރިޝްމާ އެވެ.

މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ ސައިކްލޯންގެ ނަޝްފާ އާމިރާ (ނައްފަ) އާއި ރިޝްމާ އާއި ޓައިޓަންސްގެ ޝިޒްނާ ރަޝީދާއި އައިމިނަތު ނާޒިމާ އަދި ހުސްނާ މުހައްމަދު (ހުސީ) އެވެ.