އެންމެ 11 ޖަލްސާ، މަޖިލިސް އަނެއްކާ ވެސް ޗުއްޓީއަކަށް

ރައްޔިތުންގެ މަޖިލީހުގެ ދެވަނަ ދައުރުގައި 39 ޖަލްސާ ބާއްވަން ކަނޑައަޅާފައިވީ ނަމަވެސް ތިން މަސް ދުވަހުގެ އެ ދައުރުގައި އެންމެ 11 ޖަލްސާ ބޭއްވުމަށް ފަހު މެމްބަރުން ބޮޑު ޗުއްޓީއަކަށް މިއަދު ވަޑައިގެންފި އެވެ.

މަޖިލިހުގެ ދެވަނަ ދައުރަށް ފަހު، ގަވައިދުގައިވާ ގޮތުން މެމްބަރުން ޗުއްޓީ އަށް ވަޑައިގަންނަވަން ޖެހެނީ އާންމު އުސޫލުން ބަލާއިރު އަންނަ މަހުގެ އެއްވަނަ ދުވަހުން ފެށިގެންނެވެ. އެކަމަކު އިދިކޮޅު މެމްބަރުންގެ ހަޅޭކާއި ސިފައިންގެ ހިމާޔަތުގައި އިންނަވައިގެން ބޭއްވި ޖަލްސާގައި މަޖިލީހުގެ ރައީސް އަބްދުﷲ މަސީހް އިއުލާން ކުރެއްވި ގޮތުގައި މިއަދު ބޭއްވީ ދެވަނަ ދައުރުގެ އެންމެ ފަހު ޖަލްސާ އެވެ.

ގަވައިދުގައި ބުނާ އެއް މަސް ދުވަހުގެ ޗުއްޓީ ފެށުމުގެ އެއް ހަފުތާ ކުރިން މެމްބަރުން ޗުއްޓީ އަށް ވަޑައިގެންނެވިއިރު، ދެވަނަ ދައުރުގައި މާ ބޮޑު މަސައްކަތްތަކެއް މަޖިލީހުން ކޮށްފައެއް ނެތެވެ. އެގޮތުން ދެވަނަ ދައުރުގައި ބޭއްވި ޖަލްސާތަކަށް ފަސް ގަޑިއިރެއް ހާއިރު، ވެސް ހޭދައެއް ނުވެ އެވެ. ދައުރުގެ ގިނަ ޖަލްސާތައް ނިންމާލީ ވިއްސަކަށް މިނިޓް ވެސް ނުވަނީސް، އެޖެންޑާގައި އިތުރު ކަމެއް ނެތުމުންނެވެ.

ދެވަނަ ދައުރުގައި ނިންމި ބައެއް ކަންތައްތަކުގެ ތެރޭގައި ވަޒީރުން ހާޒިރުކޮށް ސުވާލު ކުރުމާއި މިނިވަން މުއައްސަސާތަކަށާއި ބޭރު ގައުމުތަކަށް ސަފީރުން އައްޔަން ކުރުމާއި އިމްޕޯޓް އެކްސްޕޯޓް ގާނޫނަށް އިސްލާހު ގެނައުމާއި ކޯޓުތަކާ ބެހޭ ގާނޫނަށް އިސްލާހު ގެނައުން ހިމެނެ އެވެ.

ދެވަނަ ދައުރު ފެށުނު ފަހުން ޖަލްސާތައް ބަރާބަރަށް ނުބާއްވާއިރު، މަޖިލީހުގެ ރައީސް މަސީހް މަގާމުން ވަކިކުރުމުގެ މައްސަލަ މަޖިލީހުން ބޭރުކޮށްލުމާ އެކު، ސަރުކާރާއި އިދިކޮޅު ފަރާތްތަކުގެ ކޯޅުމާ ގުޅިގެން މަޖިލިސް އޮތީ ހުއްޓިފަ އެވެ.

މަސީހް މަގާމުން ވަކިކުރުމަށް 45 މެމްބަރުންގެ ސޮޔާއެކު މަޖިލީހަށް ވެއްދި މައްސަލަ ބޭރުކޮށްލީ، އޭގައި ސޮއިކުރެއްވި ހަ މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅުމާ ގުޅިގެން ކަމަށް މަޖިލީހުގެ އިދާރާ އިން ވަނީ ބުނެފަ އެވެ. އެކަމަކު އިދިކޮޅު ފަރާތްތަކުން ކެނޑިނޭޅި ބުނަމުން އައީ މަޖިލީހަށް ފުރަތަމަ ވެސް އެޖެންޑާ ކުރަން ޖެހޭނީ މަސީހްގެ އިތުބާރު ނެތްކަމުގެ މައްސަލަ ކަމަށާއި އެ ނޫން ގޮތަކަށް ޖަލްސާ ކުރިއަށް ގެންދަން ޖާގަ ނުދޭނެ ކަމަށެވެ. އޭގެ ނަތީޖާ އަކީ އޭގެ ފަހުން ބާއްވަން އުޅުނު ހަތަރު ޖަލްސާ ވެސް އިދިކޮޅު މެމްބަރުންގެ ހަޅޭކާއި ޒުވާބާއި ހަމަނުޖެހުމުގެ ތެރޭގައި މަސީހަށް ބާއްވަން ޖެހުމެވެ. އަދި އެ ހަތަރު ޖަލްސާ ވެސް އެމަނިކުފާނު ބޭއްވީ ސިފައިންގެ "ފައުޖެއް" ކުރިމަތީގަ އާއި ވަށައިގެން އަތުރާލައިގެން އިންނަވައިގެންނެވެ.

ދެވަނަ ދައުރުގެ އެންމެ ފަހު ތިން ޖަލްސާ ވެސް މަސީހް ކުރިއަށް ގެންދެވީ ސަރުކާރުން ބޭނުންވެގެން ކަންކަން މަޖިލީހުން ފާސްކުރުމަށްޓަކަ އެވެ. އެއީ ސްރީ ލަންކާގައި ހުންނަވާ ދިވެހި ސަފީރަކަށް ހަމަޖެއްސެވުމަށް ރައީސް އަބްދުﷲ ޔާމީން ފޮނުއްވި މުހައްމަދު ހުސެއިން ޝަރީފް (މުންދު) އަށާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރަކަށް އައްޔަން ކުރެއްވުމަށް ރައީސް ޔާމީން ނިންމެވި އަހުމަދު ނަސީރަށް ރުހުން ދިނުމާ މެދު ގޮތެއް ނިންމުމެވެ.

މަޖިލިސް މިއަދު ޗުއްޓީ އަށް ދިޔައީ އެ ދެ ބޭފުޅުންނަށް ވެސް ރުހުން ދީފަ އެވެ. އޭގެ ތެރެއިން، އިއްޔެގެ ޖަލްސާގައި މުންދަށް ލިބިވަޑައިގަތީ 28 ވޯޓެވެ. މިއަދުގެ ޖަލްސާގައި ނަސީރުގެ ނަން ފާސްވީ 33 ވޯޓުންނެވެ. އެއްވެސް ވޯޓެއްގައި އިދިކޮޅު މެމްބަރަކު ބައިވެރިވެވަޑައެއް ނުގަންނަވަ އެވެ.

އިއްޔެ އާއި މިއަދުގެ ޖަލްސާ ކުރިއަށް ގެންދިއުމުގެ ތެރޭގައި ސަރުކާރާއި އިދިކޮޅު މެމްބަރުންގެ މެދުގައި ބޮޑެތި ހަމަނުޖެހުންތަކެއް ހިންގައި، ދެ ފަރާތުގެ މެމްބަރުންނަށް ވެސް ވަނީ އަނިޔާވެފަ އެވެ. އަދި މިއަދުގެ ޖަލްސާ ފެށުމުގެ ކުރިން، ރިޔާސަތުގައި މަސީހް އިންނަވާ ގޮނޑި އަށް ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ބިސް ޖެހި ކަމަށް ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވިދާޅުވެފައިވެ އެވެ. ޖަލްސާ އަށް ފަހު އިދިކޮޅު މެމްބަރުންގެ ގަޔަށް މަޖިލީހުގެ ނައިބު ރައީސް ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު ބިސް ޖެހި ކަމަށް އިދިކޮޅު މެމްބަރުން ވިދާޅުވެ އެވެ.

މިއަދުގެ ޖަލްސާގައި، ދެވަނަ ދައުރު ނިންމާލެއްވިކަން އިއުލާން ކުރައްވަމުން މަސީހް ވިދާޅުވީ ކުރިމަތިވާ ބިރުދެއްކުމަކަށް، ނުފޫޒަކަށް، ނުވަތަ ދައްޗަކަށް ބެލުމެއް ނެތި އިސްލާމްދީނާއި ދިވެހި ގައުމުގެ ހައްގުގައި ފަސްޖެހުމެއް ނެތި، ސާބިތުކަމާ އެކު ކުރިއަށް ދާނެ ކަމުގެ ޔަގީންކަން ހުރިހާ މެމްބަރުންނަށް ދެއްވާ ކަމަށެވެ