އެމްޓީޑީސީއަށް މިދިޔަ އަހަރު ލިބުނު ސާފު ފައިދާ 25 ޕަސެންޓް ދަށްވެއްޖެ

މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އަށް މިދިޔަ އަހަރު ސާފު ފައިދާގެ ގޮތުގައި ލިބުނު މިންވަރު 25 ޕަސެންޓް ދަށްވެއްޖެ އެވެ.

އެމްޓީޑީސީން ގިނަ ދުވަސްތަކަކަށްފަހު އިއްޔެ އާއްމުކުރި މިދިޔަ އަހަރުގެ އަހަރީ ރިޕޯޓުގައި ބުނެފައި ވަނީ އެ ކުންފުންޏަށް މިދިޔަ އަހަރު ސާފު ފައިދާގެ ގޮތުގައި ލިބިފައިވަނީ 4.5 މިލިއަން ޑޮލަރު (69.3 މިލިއަން ރުފިޔާ) ކަމަށެވެ. އެ ކުންފުންޏަށް 2015 ވަނަ އަހަރު ސާފު ފައިދާގެ ގޮތުގައި ލިބިފައި ވަނީ ހަ މިލިއަން ޑޮލަރު (92.5 މިލިއަން ރުފިޔާ) އެވެ.

ޓޫރިޒަމްގެ ވިޔަފާރިކުރުމަށް އުފައްދާފައިވާ ކުންފުނިން އާއްމުކުރި މިދިޔަ އަހަރުގެ މާލީ ހިސާބުތައް ދައްކާ ގޮތުން ސަބްލީސްކޮށްފައިވާ ރަށްތަކުގެ ކުލީގެ ގޮތުގައި މިދިޔަ އަހަރު ހަ މިލިއަން ޑޮލަރު ލިބުނެވެ. އަދި އެ ކުންފުންޏަށް ހިންގުމުގެ ފައިދާގެ ގޮތުގައި 5.6 މިލިއަން ޑޮލަރު ލިބިފައިވެ އެވެ. އެ ކުންފުނީގެ ހިއްސާއަކަށް ފައިދާގެ ގޮތުގައި މިދިޔަ އަހަރު ޖެހިފައި ވަނީ 0.13 ސެންޓެވެ.

އެމްޓީޑީސީގެ މިދިޔަ އަހަރުގެ އަހަރީ އާއްމު ޖަލްސާ ބާއްވަން ނިންމާފައި ވަނީ މިމަހުގެ 28 ވަނަ ދުވަހުގެ ރޭ އިސްލާމީ މަރުކަޒުގެ ޖަލްސާކުރާ ހޯލުގަ އެވެ.

އެމްޓީޑީސީގެ އަހަރީ ރިޕޯޓުގައި އެ ކުންފުނީގެ މެނޭޖިން ޑިރެކްޓަރު އަބްދުﷲ ޝުޖާއު ވިދާޅުވީ ރިސޯޓް ތަރައްގީކުރުމަށް އެ ކުންފުންޏަށް ދިން ނ. އެކުޅިވަރުގެ އެގްރިމަންޓް ސަރުކާރުން ބާތިލުކޮށް، އެ ކުންފުންޏާއެކު ޖޭވީ ހެދި އީއެންއޭ ޕްރައިވެޓް ލިމިޓެޑުން ލިބެން ޖެހޭ ފައިސާ ހޯދުމަށް އެކި ފަހަރުމަތިން މަޝްވަރާކޮށް، ޖޭވީ އެގްރިމަންޓް ނިމުމަކަށް ގެނައުމަށް މަސައްކަތްކުރި ކަމަށެވެ. އަދި އެކުޅިވަރުގެ ކުއްޔާއި ހެޑްލީސްގެ ގޮތުގައި އެމްޓީޑީސީއަށް ލިބެން ޖެހޭ ފައިސާ ހޯދުމަށް ކޯޓު މަރުހަލާއަށް ދިއުމަށް ނިންމައި އެކަމުގެ ތައްޔާރީތައް ކުރެވިފައިވާ ކަމަށް ވެސް އޭނާ ވިދާޅުވެފައިވެ އެވެ.

އެ ރިޕޯޓުގައި، ދައުލަތަށް ދައްކަން ޖެހޭ ދަރަންޏާއި ހެޑްލީސްގެ ގޮތުގައި ދުވަހުން ދުވަހަށް އިތުރުވަމުންދާ ޖޫރިމަނާއަށް ހައްލެއް ނުހޯދިއްޖެ ނަމަ ކުންފުނި ސަލާމަތްނުކުރެވޭނެ ފަދަ ހާލަތަކަށް ހިނގައިދާނެ ކަމަށް ބެލެވި، ކުންފުނީގެ ބައެއް ރަށްތަކުގެ ހެޑްލީސް ވިއްކާލައިގެން ދަރަނިތައް އަދާކޮށް، އިތުރު އިންވެސްޓްމަންޓްތަކެއް ކުރެވިދާނެ ގޮތްތަކެއް ހޯދުން މުހިންމު ކަމަށް ކުންފުންޏަށް ފެނުނު ކަމަށް ބުނެފައިވެ އެވެ. އެގޮތުން ނިޔާމަ މޯލްޑިވްސް ހިންގާ އެނބޫދޫ އަދި އޮޅުވެލީގެ ހެޑްލީސް 23.3 މިލިއަން ޑޮލަރަށް އޭޕްލަސް އީ ހޮލްޑިންއަށް ވިއްކާލިކަން ވެސް މެނޭޖިން ޑިރެކްޓަރުގެ ބަޔާނުގައި ހިމަނާފައިވެ އެވެ.

އެ ބަޔާނުގައި މެނޭޖިން ޑިރެކްޓަރު ވިދާޅުވެފައި ވަނީ ކުރިން އެގްރިމަންޓް ބާތިލުކޮށްފައިވާ ރަށްތަކާ ގުޅިގެން އެ ކުންފުންޏަށް ދިމާވަމުންދާ މާލީ ގޮންޖެހުންތަކަށް ހައްލެއް ހޯދުމަށް ކަމާ ބެހޭ ހުރިހާ ފަރާތްތަކާ އެކު ގިނަގުނަ މަޝްވަރާތަކެއްކޮށް ރަނގަޅު ހައްލުތަކެއް ހޯދާފައިވާ ކަމަށެވެ.