އެމްޓީޑީސީން ހިއްސާ އަކަށް 60 ލާރީގެ މަގުން 20 މިލިއަން ރުފިޔާ ބަހަނީ

އެމްޓީޑީސީ އަށް މިދިޔަ އަހަރު ލިބުނު ފައިދާ އިން ހިއްސާދާރުންނަށް ހިއްސާއަކަށް 60 ލާރި ބަހަން ނިންމައިފި އެވެ.

މެންހަޓަން ބިޒްނަސް ހޮޓެލްގައި މިރޭ ބޭއްވި އެމްޓީޑީސީގެ އަހަރީ އާންމު ޖަލްސާގައި އެ ގޮތަށް ފާސްކުރީ އެ ކުންފުނީގެ ހިއްސާދާރުންގެ 99 ޕަސެންޓު ވޯޓުންނެވެ.

ހިއްސާދާރުންނަށް 60 ލާރީގެ މަގުން 20.4 މިލިއަން ރުފިޔާ ބަހާނެ އެވެ. އެ ކުންފުނިން މިދިޔަ ދެ އަހަރު ވެސް ހިއްސާއަކަށް ބަހާފައި ވަނީ 60 ލާރި އެވެ.

އެމްޓީޑީސީގެ މިދިޔަ އަހަރުގެ އާމްދަނީ ވަނީ 6.7 މިލިއަން ޑޮލަރު (103 މިލިއަން ރުފިޔާ) ދަށްވެފަ އެވެ. އޭގެ ކުރީ އަހަރު ފައިދާގެ ގޮތުގައި ލިބުނު 7.3 މިލިއަން ޑޮލަރާއި (113 މިލުއަން ރުފިޔާ) އަޅާބަލާއިރު މިއީ 9 ޕަސެންޓު ދަށް އަދަދެކެވެ. އެ ކުންފުނީގެ ސާފު ފައިދާގެ ގޮތުގައި މި ދިޔަ އަހަރު ލިބުނީ 1.4 މިލިއަން ޑޮލަރު (21 މިލިއަން ރުފިޔާ) އެވެ. މިއީ އޭގެ ކުރީ އަހަރު ލިބުނު 2.5 މިލިއަން ޑޮލަރާއި(38 މިލިއަން ރުފިޔާ)އާ އަޅާބަލާއިރު 41 ޕަސެންޓުގެ ދަށްވުމެކެވެ.

ކުންފުނީގެ އާމްދަނީ ދަށްވީ ހދ. ނާގޮށީގެ ސަބްލީސް އުވާލުމާއި ގުޅިގެންނެވެ. އަދި ސާފު ފައިދާ ދަށްވީ ޑިފާޑް ޓެކްސް ދަރަނި އިތުރުވެފައި ވާތީ އެވެ.

އެމްޑީޓީސީ އަށް 11 އަހަރަށް ފަހު ފައިދާވާން ފެށީ 2021 ވަނަ އަހަރު އެވެ. އެއީ ކުންފުނިން ލީޒްކޮށްފައިވާ ރަށްތަކުގެ އެގްރީމެންޓްތައް މިހާރަށް ވުރެ ފައިދާވާ ގޮތަށް ބަދަލުކުރުމުންނެވެ. އެމްޓީޑީސީ އަށް އާމްދަނީ ލިބެނީ ޓޫރިޒަމްގެ ބޭނުންތަކަށް އެ ކުންފުންޏަށް ދޫކޮށްފައިވާ ރަށްތައް ކުއްޔަށް ދީގެންނެވެ.