ފަހު ކުއާޓަރުގައި އެމްޓީޑީސީއަށް ބޮޑު ފައިދާއެއް!

މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އަށް މިދިޔަ އަހަރުގެ ފަހު ކުއާޓަރުގައި ބޮޑު ފައިދާއެއް ލިބިއްޖެ އެވެ.

ގިނަ ދުވަސްތަކަކަށް ފަހު އެމްޓީޑީސީން ނެރުނު މިދިޔަ އަހަރުގެ ފަހު ކުއާޓަރުގެ ރިޕޯޓުގައިވާ ގޮތުން ސާފު ފައިދާގެ ގޮތުގައި 5.8 މިލިއަން ޑޮލަރު (89.4 ރުފިޔާ) ލިބިފައިވެ އެވެ. އެ ކުންފުންޏަށް އޭގެ ކުރީ ކުއާޓަރުގައި ލިބިފައި ވަނީ 2.8 މިލިއަން ޑޮލަރެވެ.

ޓޫރިޒަމްގެ ވިޔަފާރިކުރުމަށް ސަރުކާރުން އުފެއްދި ކުންފުނީގެ ހިސާބުތައް ދައްކާ ގޮތުން އާމްދަނީގެ ގޮތުގައި ހަތަރު މިލިއަން ޑޮލަރު ލިބުނެވެ. އަދި ޖުމްލަ ފައިދާގެ ގޮތުގައި ލިބުނީ ތިން މިލިއަން ޑޮލަރެވެ.

އެ ރިޕޯޓުގައިވާ ގޮތުން އެ ކުންފުންޏަށް 3.9 މިލިއަން ޑޮލަރު ބަދަލެއްގެ ގޮތުގައި ލިބިފައިވެ އެވެ. ނަމަވެސް އެއީ ކޮން ކަމަކާ ގުޅިގެން ލިބުނު ފައިސާއެއް ކަމެއް އެ ރިޕޯޓުގައި އެނގޭކަށް ނެތެވެ.

އެމްޓީޑީސީގެ މިދިޔަ އަހަރުގެ ތިން ވަނަ ކުއާޓަރުގެ ރިޕޯޓްގައިވާ ގޮތުން އާމްދަނީގެ ގޮތުގައި އެއް މިލިއަން ޑޮލަރު ލިބުނު އިރު ނިޔާމަ ރިސޯޓް ވިއްކާލުމުން ފައިދާގެ ގޮތުގައި 4.6 މިލިއަން ޑޮލަރު ލިބިފައިވެ އެވެ.

ނިޔާމަ މޯލްޑިވްސްގެ ނަމުގައި ދ. އެނބޫދޫފުއްޓާއި އޮޅުވެލީގައި ހިންގާ ރިސޯޓު، އެ ރަށް ހިންގާ އޯ ޕްލަސް އީ ހޮލްޑިން އަށް 23.3 މިލިއަން ޑޮލަރު (359.2 މިލިއަން ރުފިޔާ) އަށް ވިއްކާލަން އެމްޓީޑީސީން ނިންމީ މިދިޔަ އޯގަސްޓް 16 ގަ އެވެ.