މަފާޒަކީ ހުކުމް ތަންފީޒުކޮށް، މިނިވަން ވެފައިވާ މީހެއް: ޕޮލިސް

މާލޭގެ ކެފޭއެއްގެ ތެރޭގައި ބޮލަށް ވަޅި ހަރައި، ނަދީމް އަބްދުއްރަހީމް މަރާލި މައްސަލާގައި ހައްޔަރުކުރި މުހައްމަދު މަފާޒު، ގ. ޝާރާޒް، އަކީ މޮނިކޮން އަމުރު ތަންފީޒުކޮށް ނިމިފައިވާ މީހެއް ކަމަށް ފުލުހުން މިއަދު ބުނެފި އެވެ.

ނަދީމްގެ މަރުގެ ތުހުމަތުގައި މިދިޔަ ބުރާސްފަތި ދުވަހުގެ ރޭ ހައްޔަރުކުރި މަފާޒްއާ ގުޅޭ ގޮތުން ފުލުހުން ބުނީ، މޮނިކޮން އަމުރާ ޚިލާފު ވެގެން، ހައި ކޯޓުން ކުރި އެއް އަހަރުގެ ޖަލު ހުކުމް މަފާޒަށް ތަންފީޒުކޮށް ނިމިފައިވާ ކަމަށެވެ. އެ ހުކުމް ތަންފީޒުކޮށް ނިމި، އޭނާ މިނިވަންވީ މިދިޔަ އޭޕްރީލް މަހު ކަމަށް ފުލުހުން ބުންޏެވެ.

މޮނިކަން އަމުރާ ހިލާފުވެގެން އޭނާގެ މައްޗަށް ހައި ކޯޓުގައި ދައުވާ އުފުލީ މިދިއަ އަހަރުގެ ޖުލައި މަހު އެވެ. އެކަމަކު އޭނާގެ މައްޗަށް އެއް އަހަރުގެ ހުކުމެއް އިއްވީ މޮނިކަން އަމުރުގެ ދަށުން މިދިއަ އަހަރުގެ މާޗު މަހު ހައްޔަރުކުރި ދުވަހުން ފެށިގެންނެވެ.

މަފާޒްއާ ގުޅޭ ގޮތުން ފުލުހުން މައުލޫމާތު އާންމުކުރީ، މުޖުތަމައަށް ނުރައްކާތެރި މީހެއްގެ ގޮތުގައި މީގެ ކުރިން ލިސްޓްކޮށްފައިވާ މަފާޒް ދޫވެފައިވާ މައްސަލާގައި އާންމުންގެ ކަންބޮޑުވުންތައް ބޮޑުވެެ، ސުވާލު އުފައްދަމުން ދަނިކޮށެވެ.

މޮނިކޮން އަމުރުގެ ދަށުން މަފާޒްގެ ފައިގައި ޓެގް އެޅުވީ ހޯމް މިނިސްޓަރަކަށް އުމަރު ނަސީރު ހުންނެވި ދުވަސްވަރު އެވެ.

ނަދީމްގެ މަރުގެ ތުހުމަތުގައި ހައްޔަރުކޮށް، މަފާޒްގެ ބަންދަށް ކޯޓުން ޖަހައިދިނީ 15 ދުވަހެވެ.

ހއ. ތަކަންދޫ ޒުވާނެއް ކަމަށްވާ ނަދީމަށް ދިން ހަމަލާއަށް ފަހު މަރުވީ އޭޑީކޭ ހޮސްޕިޓަލުގެ އައިސީޔޫގައި ފަރުވާ ދެމުން އަންނަނިކޮށް މިދިޔަ މަހުގެ 29 ވަނަ ދުވަހު އެވެ.