އިމްތިހާނުގެ ރަން މެޑަލް ލިބުނީ 47 އަހަރު ފަހުން

ނިއު ދިއްލީ (ޖޫން 24) - މީގެ ގާތްގަނޑަކަށް 50 އަހަރު ކުރިން އިންޑިއާ މީހަކު ހެދި ގާނޫނީ އިމްތިހާނަކުން އޭނާ އަށް ލިބެން ޖެހޭ ރަން މެޑަލް އެންމެ ފަހުން އިއްޔެ ލިބިއްޖެ އެވެ.

ރަން މެޑަލް ލިބުނު އިރު އަޖީތު ސިންގުގެ އުމުރަކީ 81 އަހަރެވެ. ރާޖަސްތާން ޔުނިވާސިޓީ އިމްތިހާނުގައި އޭނާ އިށީއިނީ 1969 ވަނަ އަހަރު އެވެ. އަދި އެ އިމްތިހާނުން އޭނާ އަށް ލިބުނީ ދެ ވަނަ ކަމަށް ނިންމި ނަމަވެސް އަޖީތު ބުނީ އޭނާ އަށް ހައްގު ވަނަ އަކީ އެއް ވަނަ ކަމަށެވެ. އަދި އޭނާ ވަނީ އެ މައްސަލަ ޖައްސައިފަ އެވެ. ގާނޫނީ އެތައް މަރުހަލާއަކާއި ޔުނިވާސިޓީގެ ލަސްކުރުންތަކާ އެކު އޭނާ އަށް އެންމެ ފަހުން ރަން މެޑަލް ލިބުނީ ބުރާސްފަތި ދުވަހު އެވެ.

ސިވިލް ސާވިސް އިން މިހާރު ރިޓަޔާކޮށްފައިވާ އަޖީތު ބުނީ ކިތަންމެ ލަހުން ނަމަވެސް މެޑަލް ލިބުމުން އުފާކުރާ ކަމަށެވެ. އެކަމަކު މި މެޑަލް ކުރިން ލިބުނު ނަމަ އޭނާގެ ސިވިލް ސާވިސް ކެރިއަރުގައި ފައިދާތަކެއް ކުރީސް ކަމަށް ވެސް ބުންޏެވެ.

ޔުނިވާސިޓީން އެއް ވަނަ ހޮވި އުސޫލާ މެދު ހިތްހަމަނުޖެހިގެން އަޖީތު ކޯޓަށް ދިޔައީ 1969 ވަނަ އަހަރު އެވެ. ދަށު ކޯޓުން އަޖީތާ އެއްކޮޅަށް މައްސަލަ ނިންމީ 1975 ވަނަ އަހަރު އެވެ. އަދި ޔުނިވާސިޓީން ވެސް ވަނީ އަޖީތަށް ރަން މެޑަލް ދޭން އެއްބަސްވެފަ އެވެ. އެކަމަކު އިމްތިހާނުގެ އެއް ވަނަ ކަމަށް ފުރަތަމަ ނިންމި ސަވާއި ސިންގު ހައި ކޯޓުގައި އެ މައްސަލަ ޖެއްސުމުން ގާނޫނީ ގޮތުން މި މައްސަލަ ދިގު ލައިގެން ދިޔަ އެވެ. ގަނޫނީ ގޮތުން 34 އަހަރަށް ދިގު ދެމިގެން ދިޔަ މައްސަލަ އަޖީތާ އެއްކޮޅަށް ހައި ކޯޓުން ނިންމީ 2003 ވަނަ އަހަރު އެވެ. އަަދި ސިންގް ވަނީ އެ މައްސަލަ ދެން އިތުރަށް އިސްތިއުނާފް ނުކުރަން ނިންމައިފަ އެވެ. އެކަމަކު ޔުނިވާސިޓީގެ "އިޖުރާއަތްތައް ފުރިހަމަ ކުރުމަށް" އަޖީތު ވަނީ މެޑަލްގެ އިންތިޒާރުގައި އިތުރު 13 އަހަރު މަޑުކުރަން ޖެހިފަ އެވެ.

އަޖީތުގެ ރަހުމަތްތެރިން ބުނީ ހައްގުވާ އެއްޗެއް ހޯދުމަށް އަޖީތަކީ އެހެން މީހުންނަށް ނަމޫނާއެއް ކަމަށެވެ.