ލަންކާ ދަތުރަކީ މިޝަނެއް، ނަތީޖާ ފެންނާނެ: ނިހާން

ޕީޕީއެމްގެ ލީޑަޝިޕުގެ އިސް ބޭފުޅުންތަކެއް މި ހަފުތާގައި ސްރީ ލަންކާ އަށް ވަޑައިގެންނެވީ މިޝަނެއްގައި ކަމަށާއި ނަތީޖާ ވަރަށް އަވަހަށް ފެންނާނެ ކަމަށް ޕީޕީއެމްގެ ޕާލަމެންޓްރީ ގްރޫޕުގެ ލީޑަރު އަހްމަދު ނިހާން މިއަދު ވިދާޅުވެއްޖެ އެވެ.

ލަންކާ އަށް ވަޑައިގަތީ ނިހާނާއި ޕީޕީއެމްގެ ނައިބު ރައީސް، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާއި އިނގުރައިދޫ ދާއިރާގެ މެމްބަރު އިބްރާހިމް ފަލާހުގެ އިތުރުން ނައިފަރު ދާއިރާގެ މެމްބަރު އަހްމަދު ޝިޔާމެވެ. މި ބޭފުޅުން ލަންކާ އަށް ވަޑައިގަތީ މަޖިލީހުގެ ރައީސްގެ އަބްދުﷲ މަސީހު ވަކިކުރަން ސޮއި ކުރެއްވި ޕީޕީއެމްގެ މެމްބަރުންނާ "ނުގުޅިގެން" ކަމަށް ވަނީ އަޑު ފެތުރިފަ އެވެ.

މަސީހާ ދެކޮޅަށް ޕީޕީއެމްގެ 10 މެމްބަރަކު ސޮއި ކުރެއްވިއިރު އޭގެ ތެރެއިން ބައެއް ބޭފުޅުން ތިއްބެވީ ލަންކާގަ އެވެ.

މި ތުހުމަތުތައް ދޮގުކުރައްވަމުން ނިހާން ވިދާޅުވީ ދަތުރުގެ ހުރިހާ ތަފްސީލެއް މި ވަގުތު އާއްމުކުރައްވަން ބޭނުން ނުވާ ކަމަށެވެ. އެކަމަކު އެއީ މިޝަނެއް ކަމަށާއި ނަތީޖާ ވެސް ފެންނާނެ ކަމުގެ ޔަގީންކަން އޭނާ ދެއްވި އެވެ.

"އެ ދަތުރުގައި އެމްބަސީތަކާ އަޅުގަނޑުމެން ބައްދަލުކުރިން، ޔޫރަޕިއަން ޔޫނިއަންގެ ޑެލިގޭޝަނާ ވެސް ބައްދަލުކުރިން. ދަތުރުގައި، 2018 ގެ ކެމްޕޭނާ ގުޅޭ ކަންކަން ވެސް ކުރިއަށް ދިޔަ. ޖުމްލަކޮށް ދަންނަވާނަމަ، ވަރަށް މުހިއްމު މަސައްކަތްތަކެއް މި ދަތުރުގައި ކުރެވުނު،" ނިހާން ވިދާޅުވި އެވެ.

މަސީހު ވަކިކުރަން އިދިކޮޅު ފަރާތްތަކުން ހުށަހަޅާފައިވީ ނަމަވެސް އެ މައްސަލަ ފެއިލްކޮށްލާނެ ކަމަށް ސަރުކާރު ކޯލިޝަންގެ އިސް ބޭފުޅުން ގެންދަވަނީ ވިދާޅުވަމުންނެވެ. މަސީހު ވަކިކުރަން 45 މެމްބަރަކު ވަނީ ސޮއި ކުރައްވައިފަ އެވެ.