މަސީހް، މަގާމުން ވަކިކުރުމުގެ ޖަލްސާ މިރޭ ބާއްވަނީ

ރައްޔިތުންގެ މަޖިލީހުގެ ރައީސްގެ މަގާމުން އަބްދުﷲ މަސީހް މުހައްމަދު ވަކިކުރުމަށްޓަކައި މަޖިލިހުގެ ޖަލްސާއެއް މިރޭ ބާއްވާ ގޮތަށް ނިންމައި އެ މައްސަލަ އެޖެންޑާ ކޮށްފި އެވެ.

މަޖިލީހުގެ ވެބްސައިޓްގައި އާންމުކޮށްފައިވާ އެޖެންޑާގައިވާ ގޮތުން، މަޖިލީހުގެ ތިން ވަނަ ދައުރުގެ ދެ ޖަލްސާއެއް މިރޭ ބާއްވާނެ އެވެ. ދެ ޖަލްސާ ވެސް ކުރިއަށް ދާނީ ވަކިވަކިންނެވެ. މަސީހްގެ އިތުބާރު ނެތްކަމުގެ މައްސަލައާ މެދު ގޮތެއް ނިންމުމުގެ ޖަލްސާ އޮންނާނީ މިރޭ 9:15 ގަ އެވެ.

މަޖިލީހުގެ ރައީސްގެ މައްޗަށް އިތުބާރު ނެތް ކަމަށް ފާސްވާނީ، އެ ދުވަހެއްގެ ޖަލްސާގައި ވޯޓުގައި ބައިވެރިވާ މެމްބަރުންގެ އަޣުލަބިއްޔަތުންނެވެ. ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސް މަގާމުން ވަކިކުރުމަށް މަޖިލީހުން ފާސްކުރުމާ އެކު އެމީހަކު އެ މަގާމުން ވަކިވާނެ އެވެ.

ރައީސް އަބްދުﷲ ޔާމީންގެ ވެރިކަން ދަމަހައްޓަވަން ރައްޔިތުންގެ މަޖިލިހުގެ ގިނަ ބާރުތަކެއް ކަނޑުވާލިކަމުގެ ތުހުމަތު އެޅިފައިވާ މަސީހްގެ އިތުބާރު ނެތް ކަމުގެ މައްސަލަ މިރެއަށް ތާވަލކުރީ މިދިޔަ އަހަރުގެ ޖުލައި މަހު 45 މެމްބަރުން ސޮއިކޮށް، އެމަނިކުފާނާ ދެކޮޅަށް ހުށަހެޅުއްވި މައްސަލަ ތާވަލް ކުރަން އާންމު ކޮމިޓީން އިއްޔެ ފާސްކުރުމުންނެވެ. އެފަހަރު މަސީހު ވަކިކުރަން އެޖެންޑާ ނުކުރީ، އޭގައި ސޮއިކުރެއްވި މެމްބަރުންގެ ތެރެއިން ހަތަރު މެމްބަރެއްގެ ގޮނޑި ގެއްލިފައިވާ ކަމަށް، އިލެކްޝަންސް ކޮމިޝަނުން ނިންމުމުން، އެމަނިކުފާނާ ދެކޮޅަށް މައްސަލަ ހުށައަޅަން މަދުވެގެން ބޭނުންވާ 42 ސޮއި ހަމަނުވާކަމަށް ބުނެ އެވެ.

އެކަމަކު އެ ހަތަރު މެމްބަރުންގެ އިތުރުން، ގޮނޑި ގެއްލުނު ކަމަށް އީސީން ކަނޑައެޅި އަނެއް އަށް މެމްބަރުންގެ ގޮނޑި ވެސް ނުގެއްލޭ ކަމަށް ސުޕްރީމް ކޯޓުން ނިންމުމުން، ކުރީގެ މައްސަލަ މަސީހާ ދެކޮޅަށް ތާވަލްކުރެވޭނެ ކަމަށް އާންމު ކޮމިޓީގެ ގިނަ މެމްބަރުންނަށް ގަބޫލު ކުރެއްވުނީ އެވެ.

މަސީހުގެ އިތުބާރު ނެތް ކަމުގެ މައްސަލަ އެޖެންޑާ ކުރީ އެމަނިކުފާނު ވަކިކުރަން 51 މެމްބަރުންގެ ސޮޔާ އެކު މި މަހުގެ 24 ވަނަ ދުވަހު ހުށައެޅި އެ މައްސަލަ މި މަހު 8 ގައި އޮންނާނެ ކަމުގެ ނޯޓިސް ދީފައި ވަނިކޮށެވެ.

މިރޭ މަސީހްގެ މައްޗަށް އިތުބާރު ނެތް ކަމަށް ފާސްވެއްޖެ ނަމަ، ފަހުން ހުށަހެޅި މައްސަލަ މަޖިލީހުގެ ރިޔާސަތުން ބާތިލްކުރާނެ ކަމަށް ބެލެވެ އެވެ.

އާންމު ކޮމިޓީން އިއްޔެ ފާސްކުރީ ޖުލައި މަހު ހުށައެޅި މައްސަލަ ތާވަލްކުރުމަށާއި ޖަލްސާގައި ޖަވާބުދާރީވުމަށް މަސީހަށް 30 މިނިޓާއި މެމްބަރުންނަށް ދޮޅު ގަޑިއިރު ދޭށެވެ. އެ ކޮމިޓީން ފާސްކޮށްފައި ވަނީ ބަހުސް ފެށުމާ އެކު މަސީހަށް 10 މިނިޓާއި މެދުތެރެއިން 10 މިނިޓު އަދި ފަހު ބަސް ވިދާޅުވުމަށް 10 މިނިޓުގެ ފުރުސަތެއް ދިނުމަށެވެ.

މިރޭ އަށެއް ޖަހާއިރު އޮންނަ ޖަލްސާގައި އޮތީ އެންޓި ޑިފެކްޝަން ގާނޫނު އުވައިލުމަށް ވިލުފުށީ ދާއިރާގެ މެމްބަރު، ޕީޕީއެމް ޕާލަމެންޓްރީ ގްރޫޕްގެ ޑެޕިއުޓީ ލީޑަރު ރިޔާޒް ރަޝީދު ހުށަހެޅުއްވި ބިލު ދިރާސާ ކުރި ހަތް މެމްބަރުންގެ ވަގުތީ ކޮމިޓީގެ ރިޕޯޓު ހުށަހެޅުން އެކަންޏެވެ.