ގެދޮރު ހޯދުމަށް ފައިސާ ދޭން އެޗްޑީއެފްސީން 150 މިލިއަން ރުފިޔާގެ ސުކުކް ވިއްކަނީ

ގެދޮރު ގަތުމަށާއި އިމާރާތް ކުރަން ބޭނުންވާ ފަރާތްތަކަށް އިސްލާމީ ޝަރީއަތާ އެއްގޮތަށް މާލީ އެހީތެރިކަން ދިނުމަށް ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން 150 މިލިއަން ރުފިޔާގެ ސުކުކް ވިއްކަން ނިންމައިފި އެވެ.

ގެދޮރު ހޯދަން ބޭނުންވާ ފަރާތްތަކަށް މާލީ އެހީތެރިކަން ދޭން އުފައްދާފައިވާ ކުންފުނީގެ އިސް އޮފިޝަލަކު މިއަދު ވިދާޅުވީ 150 މިލިއަން ރުފިޔާގެ ސުކުކް ވިއްކަން ނިންމާފައި ވަނީ އިސްލާމީ ޝަރީއަތާ އެއްގޮތަށް ގެދޮރު ގަތުމަށާއި އިމާރާތް ކުރަން ބޭނުންވާ ފަރާތްތަކަށް ފައިނޭންސް ކޮށްދޭ އެޗްޑީއެފްސީ އަމްނާ އަށް ހޯދަން ކަމަށެވެ.

އެ ކުންފުނިން ސުކުކް ވިއްކަން ނިންމާފައި ވަނީ 1،000ރ. އަށް އެއް ސުކުކްގެ މަގުންނެވެ. އެގޮތުން 10 އަހަރަށް ގަންނަ ސުކުކްގެ ފައިދާ އަހަރަކު ދެ ފަހަރު ދިނުމަށް ނިންމާފައިވާ ކަމަށް އެޗްޑީއެފްސީން ބުންޏެވެ.

އެ ކުންފުނިން ދެވަނަ ފަހަރަށް ސުކުކް ވިއްކުން ރަސްމީކޮށް އިފްތިތާހު ކުރުން އޮތީ މިއަދު ފެށި ފައިނޭންޝަލް އެކްސްޕޯގަ އެވެ. އަދި އަންނަ މަހުގެ ހަވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ހަތްވަނަ ދުވަހާ ހަމަޔަށް ސުކުކް ގަތުމުގެ ފުރުސަތު ހުޅުވިފައިވާ ކަމަށް ވެސް އެޗްޑީއެފްސީން ބުންޏެވެ.

"އެ އެކްސްޕޯގައި ޕްރޮސްޕެކްޓަސް ދޫކުރަން މިއަދު ވަނީ ފަށާފައި. އެގޮތުން އެއް މަސް ދުވަސް ލިބޭނެ ސުކުކް ގަންނަން ބޭނުންވާ ފަރާތްތަކަށް،" އޮފިޝަލް ވިދާޅުވި އެވެ.

އޭނާ ވިދާޅުވީ ބޭނުންވާ އަދަދަކަށް ސުކޫކް ގަނެވޭނެ ކަމަށެވެ. އަދި ފައިދާ ބަހާނީ އެ މީހަކު އިންވެސްޓް ކުރާ ނިސްބަތުން ކަމަށް ވެސް ވިދާޅުވި އެވެ.

"އިންވެސްޓްކުރާ ނިސްބަތުން ފައިދާ 65 ޕަސެންޓް ހަމަޔަށް ލިބޭނެ. ގިނައިން އިންވެސްޓްކުރާ ފަރާތްތަކަށް ލިބޭ ފައިދާ އިތުރުވާނެ،" އޮފިޝަލް ވިދާޅުވި އެވެ.

އޭނާ ވިދާޅުވީ ސުކުކް ވިއްކަން ނިންމީ އިސްލާމިކް ފައިނޭންސްގެ ތެރެއިން ގެދޮރު ހޯދަން ބޭނުންވާ ފަރާތްތަކަށް އެ ފުރުސަތު ހޯދައިދިނުމަށް ކަމަށެވެ.

އެ ކުންފުނިން ވަނީ މިދިޔަ އަހަރު ވެސް 500ރ. އަށް ސުކުކެއްގެ މަގުން 22.566،000 ރުފިޔާގެ ސުކުކް ވިއްކައިފަ އެވެ.