ރަށްވެހިވެފައިވާ ރަށުގައި ނޫޅުނަސް "ގެދޮރުވެރިޔާ ލޯނު" އަށް ހުށަހެޅޭ ގޮތަށް ބަދަލު ގެނެސްފި

ރަށްވެހިވެފައިވާ ރަށުގައި އުޅޭތާ މަދުވެގެން ތިން އަހަރު ވެފައިވާ މީހުންނަށް ގެދޮރުވެރިޔާ ލޯން ސްކީމުގެ ދަށުން ލޯނު ދޫކުރަން ކުރިން އޮތް ކަނޑައަޅާފައި އޮތް ނަމަވެސް އެ ޝަރުތު ބާތިލުކޮށް، ރަށުގައި ނޫޅޭ މީހުންނަށް ވެސް ލޯނަށް އެދެވޭ ގޮތަށް ބަދަލު ގެނެސްފި އެވެ.

ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އިން މިދިޔަ އަހަރުގެ ޖޫން 14 ގައި "ގެދޮރުވެރިޔާ ލޯނު" އަށް އެދެން ހުޅުވައިލިއިރު ލޯނުގެ ޝަރުތެއްގެ ގޮތުގައި ރަށްވެހި ވެފައިވާ ރަށުގައި ދިރިއުޅޭތާ މަދުވެގެން ތިން އަހަރު ވެފައިވާ މީހަކަށް ވުން ހިމެނެ އެވެ.

އެހެންވެ، މިދިޔަ ޑިސެމްބަރު މަހުގެ 27 ގައި ހައުސިން މިނިސްޓްރީން އެ ޝަރުތު އުނިކުރަން ނިންމާފައިވާތީ، އެކަން އާންމުކޮށް އެޗްޑީއެފްސީން ބުނީ، އެ ޝަރުތު ފުރިހަމަ ނުވެގެން ކުރިން ލޯނު ދޫނުކުރާ ގޮތަށް ނިންމި މީހުން ވެސް އަލުން ލޯނު ބޭނުން ނަމަ، ފޯމު ހުށަހެޅުމުން އެ އިންތިޒާމު ހަމަޖެހޭނެ ކަމަށެވެ.

އެކަމާ ގުޅިގެން ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "މިހާރު" އަށް ވިދާޅުވީ މާލޭގައި އުޅޭތާ އެތައް އަހަރެއް ވެފައިވާ ގިނަ އަދަދެއްގެ ރަށްރަށުގެ މީހުން އެ މީހުންގެ އަމިއްލަ ރަށަށް ބަދަލުވާން ބޭނުންވާ ކަމަށެވެ. އެކަމަކު، ކުރިން އުސޫލު އޮތް ގޮތުން އެ މީހުންނަށް ގެދޮރުވެރިޔާ ލޯނު ނަގައިގެން ގެ ހެދުމުގެ ފުރުސަތު ނެތުމުން، އުސޫލަށް ބަދަލު ގެނައުމަށް ސަރުކާރުން ނިންމީ ކަމަށް އޭނާ ވިދާޅުވި އެވެ.

މި ސަރުކާރުގެ ގެދޮރުވެރިކަމުގެ ސިޔާސަތުގެ ދަށުން ރަށްރަށުގެ މީހުންނަށް ގެދޮރު އެޅުމަށް، ހަ ޕަސެންޓުގެ އިންޓަރެސްޓް ރޭޓުގައި 700،000ރ.އާ ހަމަ އަށް ލޯނު ދޫކުރަމުން އަންނައިރު ގެދޮރުވެރިޔާ ލޯނު ސްކީމް މިހާރު އޮތް ގޮތުން ލޯނު އަނބުރާ ދައްކަން އެންމެ ގިނަވެގެން ވެސް 20 އަހަރު ލިބެ އެވެ.

އެންމެ ގިނަވެގެން އެއް ފަހަރާ ލޯނުގެ ގޮތުގައި ލިބޭނީ 700،000ރ. އެވެ. ލޯނަށް އެދުމުގައި މަދުވެގެން ދެ ފަރާތް ހިމަނަން ޖެހޭއިރު ލޯނުގެ ގޮތުގައި ދޫކުރާނީ ޕްރޮޖެކްޓުގެ 80 ޕަސެންޓެވެ. ބާކީ 20 ޕަސެންޓް ދައްކަން ޖެހޭނީ ލޯނު ނަގާ މީހެކެވެ.

އެ ސްކީމުގެ ދަށުން ލޯނު ދޫކުރާނީ އަމިއްލަ ގޯތީގައި އަލަށް ގެ އެޅުމަށް ނުވަތަ މަރާމާތު ކުރުމަށް ނުވަތަ ހަދަން ފަށާފައި ހުރި ތަނެއް ނިންމުމަށެވެ.