ގެދޮރު އަޅަން ފަސް ޕަސެންޓުގެ އިންޓްރެސްޓުގައި ދޭ ލޯނަށް އަންނަ މަހު ހުޅުވާލަނީ

ކުޑަ އިންޓްރެސްޓް ރޭޓެއްގައި ބޯހިޔާވަހިކަމަށް ދޫކުރާ "ހިޔާވެހި" ލޯނު ސްކީމުގެ ދަށުން ލޯނަށް އެދުމުގެ ފުރުސަތު އަންނަ މަހުގެ ފުރަތަމަ ހަފުތާގައި ހުޅުވާލާނެ ކަމަށް ހައުސިން މިނިސްޓްރީން މިއަދު ބުނެފި އެވެ.

އަލަށް ގެއެއް އިމާރާތްކުރަން ބޭނުންވާ އަދި ގެއެއް އިމާރާތްކުރަން ފަށައި މަސައްކަތް ނުނިމި ތިބި މީހުންނަށް ކުޑަ އިންޓްރެސްޓް ރޭޓެއްގައި ލޯނު ދޫކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

ރައީސްގެ އެ ވައުދާ އެއްގޮތަަށް، ގެދޮރު އިމާރާތްކުރުމަށް ލޯނު ދޫކުރާ ޕްރޮގްރާމް "ހިޔާވެހި ފައިނޭންސިން ސްކީމް" ފެށުމަށް ކުރާ މަސައްކަތުގެ ތެރެއިން ފައިނޭންސިން ޕާޓްނަރެއްގެ ގޮތުގައި ބީއެމްއެލްއާ އެކު، ހައުސިން މިނިސްޓްރީން މިއަދު ވަނީ އެމްއޯޔޫއެއްގައި ވެސް ސޮއިކޮށްފަ އެވެ. އެ އެމްއޯޔޫގައި ސޮއިކުރީ ހައުސިން މިނިސްޓްރީގައި މިއަދު ބޭއްވި ރަސްމިއްޔާތެއްގަ އެވެ.

ހައުސިން މިނިސްޓްރީގެ ފަރާތުން އެ އެމްއޯޔޫގައި ސޮއިކުރެއްވީ މިނިސްޓަރު ޑރ. އަލީ ހައިދަރު އަހުމަދެވެ. އަދި ބީއެމްއެލްގެ ފަރާތުން ސޮއިކުރެއްވީ ބޭންކުގެ ސީއީއޯ މުހައްމަދު ޝަރީފެވެ.

ހައުސިން މިނިސްޓްރީން މީގެ ކުރިން ވަނީ އެޗްޑީއެފްސީ އާއި އެމްއައިބީއާ އެކު ވެސް މި ފައިނޭންސިން ޕާޓްނާޝިޕް އެއްބަސްވުމުގައި ސޮއިކޮށްފަ އެވެ.

ހައުސިން މިނިސްޓްރީން ބުނީ ހިޔާވަހި ފައިނޭންސިން ސްކީމަކީ ގެދޮރު އިމާރާތްކުރަން ބޭނުންވެފައިވާ މީހުންނަށް މާލީ އެހީތެރިކަން ދިނުމުގެ ގޮތުން ސަރުކާރުން ދޫކުރާ ލުއި ލޯނެއް ކަމަށެވެ.

ލޯނުގެ ތަފުސީލު

• ލޯނު ދޭނީ ފަސް ޕެސެންޓުގެ އިންޓްރެސްޓް ރޭޓުގައި.

• ލޯނު އަނބުރާ ދެއްކުމަށް 25 އަހަރު ލިބޭނެ.

• ލޯނު ދޫކުރާނީ އަލަށް ގެއެއް އިމާރާތްކުރާ މީހުންނަށް.

• ގެއެއް އިމާރާތްކުރަން ފަށައި ނުނިމި ހުރި ނަމަ، އެ މަސައްކަތް ނިންމަން ވެސް ލޯނު ލިބޭނެ.

މިނިސްޓްރީން ބުނީ ސަރުކާރުން މަސައްކަތްކުރަނީ ހަފުތާއެއްގެ ތެރޭގައި އެ ފައިނޭންސް ސްކީމް ލޯންޗުކޮށް، ލޯނަށް އެދުމުގެ ފުރުސަތު ހުޅުވާލުމަށް ކަމަށެވެ.

ރައީސް މުއިއްޒު ކުރިން ވިދާޅުވެފައިވާ ގޮތުގައި، ދެމެހެއްޓެނިވި ތަރައްގީގެ ވިސްނުމުގެ ތެރެއިން ތިން ގިންތިއަކަށް މި ލޯނު ދޫކުރަން ވަނީ ހަމަޖެހިފަ އެވެ. އެއީ، މާލޭގައި ނަމަ ހަ މިލިއަން ރުފިޔާއާ ހަމައަށާއި އާބަން ސެންޓަރުތަކުގައި ތިން މިލިއަން ރުފިޔާ އަދި އެހެން ރަށްރަށުގައި އެއް މިލިއަން ރުފިޔާއާ ހަމައަށެވެ. އެއީ ރާއްޖޭގެ ކޮންމެ ސަރަހައްދެއްގައި އުޅޭ މީހަކަށް ވެސް ލޯނު ނެގޭ ގޮތަށް ހުޅުވާލާ ފުރުސަތެކެވެ.