ކޮންމެ ފަހަރަކު ބޯހިޔާވަހިކަމަށް ބަޔަކު ހޮވުމުގެ ބަދަލުގައި، ބޭނުންވާ މީހުންގެ ވެއިޓިން ލިސްޓެއް ހަދަނީ

ބޯހިޔާވަހިކަމުގެ ވަކިވަކި މަޝްރޫއުތަކަށް އިއުލާނުކޮށްގެން ކޮންމެ ފަހަރަކު މީހުން ހޮވުމުގެ ބަދަލުގައި، ގެދޮރަށް އެންމެ ބޮޑަށް ބޭނުން ޖެހިފައިވާ މީހުންގެ "ވެއިޓިން ލިސްޓް" އެއް ހަދަން ސަރުކާރުން ނިންމައިފި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ދޫކޮށްފައިވާ ފްލެޓުތަކުގެ މައްސަލައިގައި ރައްޔިތުންގެ މަޖިލީހުގެ ޕެޓިޝަން ކޮމިޓީ އަށް ހުށަހަޅާފައިވާ ޕެޓިޝަނާ ގުޅިގެން އެ ކޮމިޓީގައި ވާހަކަ ދައްކަވަމުން ހައުސިން މިނިސްޓަރު ޑރ. އަލީ ހައިދަރު ވިދާޅުވީ، އަމާޒަކީ ގާނޫނަށް ބަދަލު ގެނެސްގެން ނަމަވެސް އެފަދަ ލިސްޓެއް އެކުލަވައިލުން ކަމަށެވެ.

އެ ލިސްޓު އެކުލަވައިލުމަށް ފަހު، އެ ބައެއްގެ ދިރިއުޅުމުގެ ހާލަތު ބަދަލުވަމުންދާ ގޮތަށް ބަލައި، ބަދަލުކުރަމުން ގެންދާނެ ކަމަށާއި ބޯހިޔާވަހިކަމަށް އިސްކަން ދިނުމުގައި ބަލާނީ "ވެއިޓިން ލިސްޓް" އަށް ކަމަށް ހައިދަރު ވިދާޅުވި އެވެ.

އޭރުން ކޮންމެ ފަހަރަކު މަޝްރޫއަށް އިއުލާނުކޮށްފައި، ޕޯޓަލެއް ހަދައިގެން ޕޮއިންޓު ދިނުމަށް ވުރެ އެ މަސައްކަތް ފަސޭހަވާނެ ކަމަށް އޭނާ ވިދާޅުވި އެވެ.

"[އޭރުން ދަނެގަނެވޭނެ] ކޮބައިކަން ރައްޔިތުންގެ ތެރެއިން އެންމެ ބޮޑަށް ބޯހިޔާވަހިކަން ހޯދައިދޭންވީ ބަޔަކީ. [އެ ބަޔަކު] އައިޑެންޓިފައި ކޮށްގެން ލިބޭނެ ގޮތަކަށް ހަމަޖައްސަން،" ލިސްޓާ ގުޅޭ ގޮތުން މިނިސްޓަރު ވިދާޅުވި އެވެ.

މި މަސައްކަތް ކުރިއަށް ގެންދާ ވަރަކުން އިތުރު ތަފުސީލުތައް ހާމަކުރައްވާނެ ކަން އޭނާ ވިދާޅުވި އެވެ.

ހައިދަރު މިއަދު ވެސް ވިދާޅުވީ، ކުރީގެ ސަރުކާރުން ދޫކޮށްފައިވާ ފްލެޓުތަކާ މެދު އަމަލުކުރާނީ އޭސީސީން ދޭ ލަފައެއްގެ މަތިން ކަމަށެވެ. އެ ލިސްޓު ރީއިވެލުއޭޓު ކުރަން ޖެހޭތޯ ނުވަތަ ނޫންތޯ ވެސް ނިންމާނީ އެ އަށް ފަހު ކަމަށް އޭނާ ވިދާޅުވި އެވެ.