ފްލެޓް ލިސްޓް ފުރިހަމަކުރަން ވަގުތު ބޭނުންވާތީ ނެރުން ފަސްކޮށްފި

ގެދޮރުވެރިޔާ ސްކީމްގެ ދަށުން ގިނަ ބަޔަކު ކުރިމަތިލައި މައްސަލަ ބޮޑުވެފައިވާ ފްލެޓް ލިސްޓް ފުރިހަމައަށް ނިންމައި އަންނަ މަހުގެ ދެ ވަނަ ހަފުތާގައި ނެރެން މަސައްކަތް ކުރަމުން އަންނަ ކަމަށް ހައުސިން މިނިސްޓްރީން މިއަދު ބުނެފި އެވެ.

ހައުސިން މިނިސްޓަރު ޑރ. އަލީ ހައިދަރު ކުރިން ވިދާޅުވެފައިވާ ގޮތުގައި، ލިސްޓް މުރާޖައާކޮށް، ފައިނަލް ލިސްޓް މި މަސް ނިމުމުގެ ކުރިން ނެރޭނެ އެވެ. އެކަމަކު މިނިސްޓްރީން މިއަދު ނެރުނު ނޫސް ބަޔާނުގައި ބުނީ އެންޓި ކޮރަޕްޝަން ކޮމިޝަނުން ވެސް ބޮޑެތި މައްސަލަތަކެއް ފާހަގަކޮށްފައިވާ ލިސްޓް ފުރިހަމައަށް އެކުލަވާލަން އިތުރު ވަގުތު ބޭނުންވާ ކަމަށެވެ.

ކުރީގެ ސަރުކާރުގެ ފްލެޓް ކޮމިޓީން ލިސްޓު އެކުލަވާލާފައި އޮތީ ރަނގަޅަށް ނޫން ކަން އޭސީސީންގެ ތަހުގީގުން ފެންނަން އޮތް ކަމަށް މިނިސްޓްރީން ބުންޏެވެ.

ކުރީގެ ސަރުކާރުން ލިސްޓް އެކުލަވާލުމުގައި ކޮރަޕްޝަނަށް މަގުފަހިވާ ކަންކަން ހުރި ކަމަށް ތުހުމަތުކޮށް ހުށަހެޅި މައްސަލައާ ގުޅިގެން، ރައީސް ޑރ. މުހައްމަދު މުއިއްޒުގެ ލަފައާ އެކު "ހައުސިން އެޑްވައިޒަރީ ކޮމިޓީ" އާއި މާލޭ ސިޓީ ކައުންސިލުން ވަނީ "ހައުސިން ކޮންސަލްޓެޓިވް" ކޮމިޓީ އެކުލަވާލައިފަ އެވެ.

ލިސްޓް ރިވިއު ކުރަމުން އަންނަނީ އެ ކޮމިޓީންނެވެ.

"މި ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ އިވެލުއޭޓް ކުރުމުގެ މަސައްކަތް މި މިނިސްޓްރީން ވަނީ ފަށައިފަ އެވެ،" މިނިސްޓްރީގެ ބަޔާނުގައިވެ އެވެ.

"މި މަސައްކަތް ފުރިހަމައަށް ނިންމާލަން އިތުރު ވަގުތު ބޭނުންވާތީ މި އަހަރުގެ ނޮވެމްބަރު މަހުގެ ދެ ވަނަ ހަފުތާގެ ނިޔަލަށް ވަގުތީ ލިސްޓް އާއްމުކުރުމުގެ މަސައްކަތްތައް މިނިސްޓްރީން ކުރަމުންދާނެ ވާހަކަ މައުލޫމާތަށްޓަކައި ދެންނެވީމެވެ."

ގެދޮރުވެރިޔާ ފްލެޓްތައް ލިބޭ މީހުންގެ ދާއިމީ ލިސްޓް ނެރުނީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރު ނިމެން ދެ ދުވަހަށް ވެފައި އޮއްވަ އެވެ.

ވަގުތީ އެއްބަސްވުން ހަދައި ފްލެޓްތައް ހަވާލުކުރަން ފެށުމުން އޭސީސީން އެކަން ހުއްޓުވީ އެވެ.

ފްލެޓް ލިސްޓާ ގުޅޭ ގޮތުން އެ ކޮމިޝަނަށް ހުށަހެޅި ގިނަ އަދަދެއްގެ ޝަކުވާތައް ވެސް ބަލައި، ހިންގި ތަހުގީގަކަށް ފަހު، އެ ކޮމިޝަނުން ބުނެފައި ވަނީ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ. އާ ކޮމިޓީއެއް ހަދައި، މި ސަރުކާރުން ލިސްޓު މުރާޖައާ ކުރަން ފެށީ ބޮޑެތި މައްސަލަތަކެއް ފެންމަތިވުމުންނެވެ.

ގެދޮރުވެރިޔާ ސްކީމްގެ ދަށުން ހުޅުމާލެ 2 ގައި އަންނަނީ 17-18 ބުރީގެ 32 ޓަވަރު އިމާރާތްކުރަމުންނެވެ. ކޮންމެ ފްލޯއެއްގައި އަށް އެޕާޓްމެންޓް ހުންނާނެ އެވެ. އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނެ އެވެ.

އެ ހުރިހާ ޓަވަރެއްގެ މަސައްކަތް އަންނަ އަހަރުގެ މެދުތެރެއަށް ނިމޭނެ ކަމަށް، އެ ފްލެޓުތައް ހަދަމުން އަންނަ ފަހި ދިރިއުޅުން ކޯޕަރޭޝަން (އެފްޑީސީ) އިން ބުނާއިރު، އޭގެ ތެރެއިން 700 ފްލެޓު ނިންމުމަށް ފަހު މިހާރު ސަރުކާރާ ވަނީ ހަވާލުކޮށްފަ އެވެ.