ފްލެޓް ލިސްޓު ނެރުން މުއްދަތެއް ނެތް ގޮތަށް ފަސްކޮށްފި

ގެދޮރުވެރިޔާ ސްކީމުގެ ދަށުން ހުޅުމާލެ 2 ގައި އިމާރާތް ކުރަމުން އަންނަ 4،000 ފްލެޓު ލިބުނު މީހުންގެ ލިސްޓު އާންމުކުރުން މުއްދަތެއް ނެތް ގޮތަށް ހައުސިން މިނިސްޓްރީން މިއަދު ފަސްކޮށްފި އެވެ.

މުއްދަތެއް ނެތް ގޮތަށް އެ ލިސްޓު ނެރުން ފަސްކުރިއިރު، މީގެ ކުރިން ފްލެޓް ލިސްޓު ނެރުމަށް އެތައް މުއްދަތެއް ދިނެވެ. އެންމެ ފަހުން މިނިސްޓްރީން ބުނި ގޮތުގައި މި ހަފުތާ ނިމުމުގެ ކުރިން އެ ލިސްޓު އާންމުކޮށް، ޝަކުވާ އަށް ހުޅުވައިލާނެ އެެވެ.

ހައުސިން މިނިސްޓްރީން މީގެ އިރުކޮޅެއް ކުރިން ނެރުނު ނޫސް ބަޔާނެއްގައި ބުނީ، ގެދޮރުވެރިޔާ ސްކީމުގެ ދަށުން ފްލެޓް ލިބޭ ކަމަށް މިދިޔަ އަހަރު އިއުލާންކުރި ދާއިމީ ލިސްޓުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަންސް ކޮމިޝަނަށް ހުށަހަޅާފައިވާ މައްސަލައާ ގުޅިގެން އެ ކޮމިޝަނުން މިނިސްޓްރީ އަށް އަންގާފައިވާ ކަންކަން ބެލުމުގެ މަސައްކަތް ކުރަމުން އަންނަ ކަމަށެވެ.

އެ ލިސްޓު މުރާޖައާ ކުރުމުގެ މަސައްކަތް ކުރަމުން އަންނަނީ ރައީސް ޑރ. މުހައްމަދު މުއިއްޒުގެ ލަފާގެ މަތިން އެކުލަވާލާފައިވާ ހައުސިން އެޑްވައިޒަރީ ކޮމިޓީ އާއި ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން ކަމަށް މިނިސްޓްރީން ބުންޏެވެ.

ހައުސިން މިނިސްޓްރީން ބުނީ އެ މަޝްރޫއުގެ ދަށުން އިމާރާތްކުރާ ފްލެޓްތަކަށް އެދި ހުށަހަޅާފައިވާ 20،697 އެޕްލިކޭޝަން ފޯމު ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމުން އެ މަސައްކަތްތައް ނިންމާލުމަށް އިތުރު މުއްދަތު ބޭނުންވާ ކަމަށެވެ.

އެކަމަށް އިތުރު ވަގުތު ހޭދަވިޔަސް ސަރުކާރުގެ މަގްސަދަކީ އެ ފްލެޓްތައް ހައްގުވެރިންނަށް ލިބޭތޯ ކަށަވަރު ކުރުން ކަމަށް އެ މިނިސްޓްރީން ބުންޏެވެ.

"މި މަސައްކަތަށް އިތުރު މުއްދަތު ދިޔަ ކަމުގައި ވިޔަސް ސަރުކާރުގެ މަގްސަދަކީ މި ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުމާ އެކު މި ސްކީމުގެ ދަށުން ތަރައްގީކުރާ ފްލެޓްތައް ދޫކުރެވޭނީ ހައްގުވެރިންނަށްކަން ކަށަވަރު ކުރުމެވެ،" ހައުސިން މިނިސްޓްރީގެ ބަޔާނުގައިވެ އެވެ.

އެ މިނިސްޓްރީން ވަނީ ސްކީމުގެ ވަގުތީ ލިސްޓު ރި-އިވެލުއޭޝަނާ ގުޅިގެން ކުރިއަށް ގެންދިޔަ މަސައްކަތްތަކުގެ ތަފްސީލުތައް ވެސް އެ މަސައްކަތްތައް ނިމުމުން ހިއްސާ ކުރާނެ ކަމަށް ބުނެފަ އެވެ.

ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ.

އެކަމަކު، ފްލެޓުތަކާ ގުޅިގެން އޭސީސީ އަށް ހުށަހެޅި ޝަކުވާތަކާ ހެދި ކުރި ދެ މަސް ދުވަހުގެ ތަހުގީގުން އެނގޭ ގޮތުގައި ފްލެޓް ލިބޭ ކަމަށް އާންމުކުރި ދާއިމީ ލިސްޓުގައިވާ 4،000 މީހުންގެ ތެރޭގައި ހިމެނޭ 60 ޕަސެންޓް މީހުންނަކީ މަކަރާއި އޮޅުވައިލުމުގެ ތެރެއިން ފްލެޓް ކަށަވަރުކުރި މީހުންނެވެ. އެއީ ހައްގުވެރިންނެއް ނޫން ކަމަށް އޭސީސީން ބުނެފައި ވެ އެވެ.

އެހެންވެ، އޭރު އޭސީސީން ހައުސިން މިނިސްޓްރީ އަށް އެންގީ ފްލެޓް ލިސްޓު އަލުން މުރާޖައާ ކުރާށެވެ.

މާލެ ސަރަހައްދުގައި ބޯހިޔާވަހިކަމުގެ މައްސަލަ ބޮޑުވެ، އެ ކަމަށް ހައްލެއް ހޯދުމަށް ހުޅުވާލި މި ފްލެޓްތަކަށް ދޭނީ މާލޭ މީހުންނާއި މާލޭގައި ދިރިއުޅޭތާ 15 އަހަރު ވެފައިވާ މީހުންނަށް އެކަންޏެވެ.

މި ތަނުގައި ހިމެނެނީ ތިން ކޮޓަރީގެ 2،712 ފްލެޓާއި ދެ ކޮޓަރީގެ 1،188 ފްލެޓްގެ އިތުރުން އޭރު ކަސްޓަމްސް އަށް ހާއްސަކުރި 100 ފްލެޓެވެ.