ގަތަރުގެ ޖަނަވާރުތައް ވެސް ސައޫދީން ބޭރުކޮށްލަނީ

ސައޫދީ އަރަބިއްޔާ އާއި ގަތަރާ ދެމެދު އުފެދިފައިވާ ދެބަސްވުންތައް އިންސާނުން ފަހަނައަޅައި ނައަމް ސޫފިތަކަށް ވެސް ފޯރަން ފަށައިފި އެވެ. އެ ގޮތުން، ސައޫދީ އަރަބިއްޔާގެ އިމުގެ ތެރޭގައި މިހާރު ހުރި ގަތަރަށް ނިސްބަތްވާ ހުރިހާ ގެރި، ބަކަރި، ޖަމަލު ސައޫދީން ބޭރު ކުރުމަށް އެ ގައުމުން ގަތަރަށް އަންގައިފި އެވެ.

ސައޫދީ ސަރުކާރުގެ އެންގުމުގެ މަތިން، ސައޫދީން ބޭރުކުރި 15،000 ޖަމަލާއި 10،000 ކަންބަޅި މިހާރު ވަނީ ގަތަރަށް ގެނެސްފަ އެވެ. އަދި އިތުރު 7،000 ޖަމަލާއި 5،000 ބަކަރި މިހާރު ވެސް ގަތަރުގެ ސަރަހައްދީ ރޮނގު ކައިރި އަށް ޖަމާކޮށްފައި އެބަހުއްޓެވެ. މި ތަކެއްޗަކީ ގަތަރާ ގުޅުން ކަނޑައިލުމުގެ ކުރިން ގަތަރުން ސައޫދީ އަށް އެތެރެކޮށް ގެންގުޅެމުން އައި ތަކެއްޗެވެ.

ގަތަރުގައި ބަކަރި ހުއިހައްޕާ މީހުން ބަކަރި އާއި ޖަމަލު ފަދަ ތަކެތި ގެންގުޅެނީ ސައޫދީ ސަރަހައްދުގެ ތެރޭގަ އެވެ. އެއީ އެ ތަކެއްޗަށް ބޭނުންވާ ވިނަ ފަދަ ތަކެތި ގަތަރަށް ވުރެ ފަސޭހަ އިން ސައޫދީން ލިބޭތީ އެވެ. އަދި ސައޫދީގައި ގަތަރުގެ ބަކަރި އާއި ޖަމަލު ގެންގުޅުމަށް ސައޫދީން އެއްވެސް އަގެއް ނުވަތަ ޓެކުހެއް ނުނަގަ އެވެ.

ސައޫދީ އަރަބިއްޔާ އާއި ބައެއް އިސްލާމީ ގައުމުތަކުން ގަތަރާ ގުޅުން ކަނޑައިލީ މި މަހުގެ ކުރީކޮޅުގަ އެވެ. އެއީ ގަތަރުން ޓެރަރިޒަމަށް އެހީވާ ކަމަށް ތުހުމަތުކޮށް އަދި އީރާނާ ގުޅިގެން ސައޫދީ ސަރުކާރާ ދެކޮޅަށް ނުބައި ރޭވުންތައް ރާވާ ކަމަށް ތުހުމަތު ކޮށްފަ އެވެ.

ދެ ގައުމުގެ ގުޅުން ކަނޑައިލުމާ އެކު، ސައޫދީން ވަނީ ގަތަރާ އެކު އޭގެ ކުރިން ކުރަމުން އައި ވައިގެ ދަތުރުތަކާއި ކަނޑުމަގުގެ ދަތުރުތަކާއި އެއްގަމު ދަތުރުތައް ހުއްޓާލައިފަ އެވެ. އަދި ސައޫދީގައި ތިބި ގަތަރު މީހުން އެ ގައުމު ދޫކޮށް ދިއުމަށް 14 ދުވަހުގެ މުހުލަތެއް ދިނެވެ.